ភ្នំពេញ៖ កសិករនិងអាជីវករបន្លែអះអាងថា បន្លែក្នុងស្រុក ពិសេសប្រភេទបន្លែស្លឹកឡើងថ្លៃខ្ពស់រហូតដល់គុណនឹងពីរ ក្រោយមានគ្រោះទឹកជំនន់។ ពូកគាត់បញ្ជាក់បន្ថែមថា បន្លែស្លឹក មានដូចជា ស្ពៃក្តោប ស្ពៃក្រញ៉ាញ់ ស្ពៃតឿ ស្ពៃចង្កឹះ និងស្លឹកខ្ទឹមជាដើម ភាគីច្រើនត្រូវខូចខាតដោយសារជំនន់ទឹកភ្លៀង។
កសិករដាំបន្លែនៅស្រុករតនមណ្ឌល ខេត្តបាត់ដំបង លោក អ៊ឹម សុភ័ក្រ ដែលរងផលប៉ះពាល់បន្លែដោយសារភ្លៀងជន់ជោរបានបញ្ជាក់ថា ទោះបីស្លឹកខ្ទឹមរបស់លោកខូចមិនសូវល្អ ក៏លក់បានតម្លៃថ្លៃដែរ។ លោកបញ្ជាក់ថា តម្លៃលក់ចេញជាទូទៅគឺប្រមាណ៦ពាន់រៀលក្នុងមួយគីឡូក្រាម ហើយឥឡូវគឺឡើងថ្លៃដល់ ១២០០០រៀល។
«ដើមខ្ទឹមខ្ញុំជោរទឹកភ្លៀង ក្រហមស្លឹក ប៉ុន្តែលក់បាន១២០០០រៀលក្នុងមួយគីឡូក្រាម ឡើងថ្លៃខ្លាំងទូទៅខ្ញុំលក់បានតែ៦០០០រៀលទេ។ នេះព្រោះបន្លែដែលមានអាយុខ្លីដូចជាស្លឹកខ្ទឹម ស្ពៃ វាឆាប់ខូច មិនចាំបាច់លិចទឹកក៏អាចខូចបានដែរ ឲ្យតែភ្លៀងជាប់ហើយជោរទឹកក៏អន់និងខូចដែរ។ អ៊ីចឹងបានបន្លែប្រភេទនេះឡើងថ្លៃ»។ នេះបើតាមការលើកឡើងរបស់លោក អ៊ឹម សុភ័ក្រ ដែលដាំបន្លែលើផ្ទៃដីរាបស្មើ ទើបទឹកជន់លិច។
ដោយឡែក លោក លន សាវុធ ជាកិសករដាំបន្លែក្នុងផ្ទះសំណាញ់ នៅសង្កាត់ក្របីរៀល ក្រុងសៀមរាប ក៏អះអាងដែរថា បន្លែស្ពៃចង្កឹះ ស្ពៃក្រញ៉ាញ់ ស្ពៃតឿ និងសាលាដជាដើម គឺឡើងថ្លៃខ្ពស់គ្រប់មុខ ខណៈកសិករដទៃទៀតត្រូវខូចខាតបន្លែនៅពេលមានជំនន់ទឹកភ្លៀង។ ជាក់ស្ដែងសាលាដរបស់លោក កាលពីមិនទាន់មានទឹកជន់លិចលក់បាន៥ពាន់ទៅ៦ពាន់រៀលក្នុងមួយគីឡូក្រា ប៉ុន្តែឥឡូវលក់បាន១ម៉ឺនរៀលក្នុងមួយគីឡូក្រាម។
«ខ្ញុំដាំបន្លែមានស្ពៃគ្រប់ប្រភេទ ក្នុងផ្ទះសំណាញ់ លើករោងខ្ពស់ តាមបច្ចេកទេស ទើបបន្លែខ្ញុំមិនខូចខាត។ ហើយបន្លែអ្នកផ្សេងនៅម្ដុំខ្ញុំ ភាគច្រើនខូចទាំងអស់ ព្រោះលើរោងបន្លែផ្ទាល់ដីធម្មតា ឆាប់ត្រូវទឹកឬលិចទឹកខូចណាស់។ បន្លែសឹក ដូចជាស្ពៃគ្រប់ប្រភេទដែលខ្ញុំដាំគឺតម្លៃឡើងគ្រប់មុខហ្នឹង គ្រាន់ខ្លះឡើងគុណនឹងពីរ ហើយខ្លះខ្ពស់ទាបជាងគ្នាតិចតួច»។ នេះបើតាមការលើកឡើងរបស់លោក សាវុធ។
ទន្ទឹមនេះ អាជីវករដែលប្រមមូលទិញបន្លែពីតំបន់ផ្សេងៗក្នុងប្រទេស បានត្អូញត្អែរពីការខ្វះបន្លែ ផ្គត់ផ្គង់ដល់អតិថិជន ខណៈដែលបន្លែខ្លះបន្តឡើងថ្លៃជាបន្តបន្ទាប់។ អ្នកស្រី ឃ្លាំង តេងអាំម៉ារ៉ា ម្ចាស់ហាងបន្លែធម្មជាតិសង្កាត់បៃតងនៅរាជធានភ្នំពេញ ពោលប្រាប់សារព័ត៌មានថ្មីៗតាមទូរស័ព្ទថា ហាងរបស់ខ្លួនកំពុងខិតខំស្វែងរកបន្លែសុវត្ថិភាពពីតំបន់ផ្សេងៗ សម្រាប់ផ្គត់ផ្គង់ដល់អតិថិជន។ ជាមួយគ្នាដែរ អ្នកស្រីក៏បានដំឡើងតម្លៃបន្លែដល់កសិករដែរ ដើម្បីជួយសម្រួលការខូចខាតដល់កសិករដែលរងផលប៉ះពាល់ដោយសារទឹកជនន់លិច។
«ខាងខ្ញុំបន្លែខ្លះ អតិថិជនសួររកអត់មានប្រហែលមួយអាទិត្យ តាំងពីមានទឹកជំនន់មក ពិសេសបន្លែស្លឹក ប្រភេទស្ពៃ ហើយបន្លែមើមមួយចំនួនក៏ខ្លះដែរ ដោយសារហាងខ្ញុំលក់តែបន្លែក្នុងស្រុក។ ប្រភេទបន្លែស្លឹក ដូចស្ពៃក្រញ៉ាញ់ឡើងមួយគីឡូ១ម៉ឺនរៀល រកទិញមិនបានទៀត។ ហើយបន្លែស្លឹកខ្លះ អ្នកប្រមូលទិញឡើងថ្ងៃបន្តបន្ទាប់គ្នា ហើយខ្លះគេយកមកលក់បន្តចំណេញតិច ចំណេញច្រើន ព្រោះភាគច្រើនបន្លែឥឡូវខូចខាតដោយទឹកជំនន់...»។ នេះបើតាមការបញ្ជាក់អ្នកស្រី តេងអាំម៉ារ៉ា។
រីឯ លោក ហម គ្រឹស្នា ម្ចាស់ហាងបន្លែ កសិដ្ឋានធម្មជាតិ ក៏លើកឡើងដូចអ្នកស្រីអាំម៉ារ៉ាដែរ ដោយអះអាងថា បន្ទាប់ពីមានទឹកជំនន់ បន្លែឡើងថ្លៃខ្ពស់ដោយសារបន្លែភាគច្រើនត្រូវខូចខាត។ ប៉ុន្តែលោក គ្រឹស្នា ថា ការដំឡើងថ្លៃបន្លែឲ្យកសិករ គឺជាផ្នែកក្នុងការទប់ទល់ដល់ការខាតបង់របស់កសិរ។
«ជាក់ស្ដែងកន្លងគាត់ធ្លាប់ដាំបាន១០០គីឡូក្រាម ហើយមកដល់ពេលនេះ រងការខូចខាតសល់ត្រឹម១០ទៅ២០គីឡូក្រាម។ អ៊ីចឹងចង់មិនចង់ត្រូវដំឡើងតម្លៃឲ្យគាត់ ហើយកសិករខ្លះសុំឡើងថ្លៃតែម្ដង ឡើងទប់ទល់ការខាតបង់។ បែបនេះហើយបាន បន្លែស្លឹងដែលធ្លាប់តែសម្បូរ ខ្លះឡើងថ្លៃគុណនឹងពីរ គុណនឹងបី ហើយបន្តឡើងរហូត»។ នេះបើតាមការលើកឡើងរបស់លោក គ្រឹស្នា ហើយបន្ថែមថា បញ្ហានេះ ក៏បង្កផលប៉ះពាល់ដល់អាជីវកម្មរបស់ខ្លួនដែរ ព្រោះផ្គត់ផ្គង់បន្លែដល់អតិថិជនមិនគ្រប់គ្រាន់។
ជុំវិញការខូចខាតក្នុងវិស័យកសិកម្ម ដោយគ្រោះទឹកជំនន់នេះ សម្ដេច ហ៊ុន សែន នាយករដ្ឋមន្រី្តបានឲ្យ ក្រសួងកសិកម្មរៀបចំអនុវត្តផែនការស្ដារការខូចខាតជាបន្ទាន់ ដោយឲ្យមន្រី្តកសិកម្មទាំងអស់ចុះពិនិត្យនិងវាយតម្លៃលើផលប៉ះពាល់។ លើសពីនេះ មន្រី្តជំនាញកសិកម្មដែលបានរក្សាគ្រាប់ពូជស្រូវ បន្លែ និងដំណាំផ្សេងៗ ត្រូវនាំយកពូជទាំងនោះ ទៅចែកជូនពលរដ្ឋតាមតំបន់រងគ្រោះឲ្យបានទាន់ពេលវេលា។ នេះបើតាមរបាយការណ៍របស់ក្រសួងកសិកម្មដែលសារព័ត៌មានថ្មីៗទទួលបានពីលោក ស្រី វុឌ្ឍី អ្នកនាំពាក្យក្រសួងកសិកម្ម។
បើតាមរបាយការណ៍ដដែល គិតត្រឹមថ្ងៃទី២៨តុលានេះ ដំណាំស្រូវ ដំណាំសាកវប្បកម្ម ដំណាំឧស្សាហកម្មររយៈពេលខ្លី រងផលប៉ះពាល់ជាង៣៨ម៉ឺនហិកតា។ ទន្ទឹមនឹងនេះ ក្នុងចំណោមដំណាំដែលរងផលប៉ះពាល់ជាង៣៨ម៉ឺនហិកតា គឺបានខូចខាតអស់ប្រមាណ១៣ម៉ឺនហិកតា ក្នុងស្រូវខូចខាតជាងម៉ឺនហិកតា ដំណាំសាកវប្បកម្មខូចខាតជាង៧ហិកតា និងដំណាំឧស្សាហកម្មរយៈពេលខ្លីខូចខាតជាងម៉ឺនហិកតា៕