ដោយ៖ ប៉ូ សុភា
ក្រោយជំនន់ទឹកស្រកអស់ កំណាត់ផ្លូវលេខ២១៧ នៃខណ្ឌដង្កោ រាជធានីភ្នំពេញ ក៏ជួបបញ្ហាមួយទៀត គឺបញ្ហាសំរាម។ ចាប់តាំងពីទឹកស្រកមក បានបន្សល់នូវសំរាមជាច្រើន គរស្អុយរលួយ នៅក្បែរទីតាំងជិតផ្សារព្រែកជ្រៃ ដែលធ្វើឱ្យប៉ះពាល់សោភណ្ឌភាព និងហេដ្ឋារចនាសម្ព័ន្ធសាធារណៈ។
ពលរដ្ឋដែលធ្វើដំណើរឆ្លងកាត់ តាមបណ្ដោយផ្លូវ ២១៧ ស្ថិតនៅក្នុងភូមិព្រែកជ្រៃ ឃុំព្រៃកព្រៃ សង្កាត់ស្ពានថ្ម ខណ្ឌដង្កោ ប្រាកដជាឃើញទីតាំងខ្លះ មានសំរាមគរស្អុយរលួយតាមដងផ្លូវ ដែលជះក្លិនមិនល្អដល់អ្នកធ្វើដំណើរជាមិនខាន ជាពិសេសអ្នករស់នៅតាមបណ្ដាយផ្លូវ២១៧នេះផ្ទាល់តែម្តង ។
អ្នកស្រី ម៉េតចិន្ដា មានវ័យ ២៨ឆ្នាំ ជាអ្នកធ្វើការនៅក្នុងរោងចក្រមួយនៅតាមបណ្ដាយផ្លូវ ២១៧ បាននិយាយថា អ្នកស្រីដើរមកធ្វើការរាល់ព្រឹក មានអារម្មណ៍មិនល្អ ដោយសារក្លិនស្អុយចេញពីសំរាម ដែលគរចោលយូរថ្ងៃនេះ។ « ក្រោយទឹកជំនន់ស្រកទៅដូចជាគ្មានក្លិនអ្វីទេ តែបន្ទាប់ពីមានភ្លៀង២-៣ថ្ងៃមុន សំរាមមួយចំនួននៅតាមផ្លូវនេះចាមផ្តើម មានក្លិនស្អុយភាយចេញមក ពេលដើរកាត់មកតាមផ្លូវនេះពិបាកភ្នែកមើលណាស់ ហើយក៏មានក្លិនស្អុយខ្លាំង »។នេះជាការលើកឡើយរបស់ អ្នក ចិន្ដា។
គំនរសំរាមនៅតាមបណ្តោយផ្លូវ ២១៧ ក្នុងខណ្ឌដង្កោ នៅថ្ងៃទី ០១ ខែ វិច្ចិកា ២០២០។
អាជីវករម្នាក់លក់ ដូរនៅទល់មុខរោងចក្រកាត់សំលៀកបំពាក់មួយនៅក្នុងភូមិព្រែកជ្រៃ បាននិយាយថា អ្នករស់នៅទីនេះ រងផលប៉ះពាល់បន្តិចបន្តួចពីក្លិនសំរាមនៅជាប់របងរោងចក្រលើផ្លូវ២១៧នេះ ប៉ុន្ដែមិនដឹងជាធ្វើយ៉ាងណា ព្រោះវាជាបញ្ហារួមផ្សំជាមួយគ្រោះធម្មជាតិ(ទឹកជំនន់)។ « នៅជិតគំនរសំរាមដែលស្អុយរលួយ ចៀសអ្វីនឹងមានក្លិននោះ តែខ្ញុំនិយាយអ្វីមិនកើតទេ ព្រោះមើលទៅអ្នកគ្រប់គ្រងនៅរោងចក្រនេះ ខិតខំប្រឹងប្រែងប្រមូលដែរ តែមិនទាន់អស់ កាល២-៣ថ្ងែមុនច្រើនជាងនេះផង។ (សំរាម)នេះតិចហើយ »។ នេះជាការលើកឡើងរបស់ អ្នកស្រី ម៉ាក់ ធីតា។
សម្លឹងទៅ គំនរសំរាមតាមផ្លូវ លោក វៀន វិច្ឆិកា ជាជាងធ្វើម៉ូតូម្នាក់បាននិយាយថា អាជីវកម្មរបស់លោកមិនមានផលប៉ះពាល់អ្វីទេ គ្រាន់តែអង្គុយធ្វើម៉ូតូនៅជិតទីតាំងនេះ ។ « គំនរសំរាមនៅម្ខាងផ្លូវ ខ្ញុំនៅខាងនេះផ្លូវដូចជាគ្មានអ្វីប៉ះពាល់ដល់ជីវកម្មរបស់ខ្ញុំទេ គ្រាន់តែមានក្លិនស្អុយ នឹងមើលទៅផ្លូវឃើញតែសំរាម ក្រៅពីនេះ សម្រាប់ខ្ញុំ ដូចជាគ្មានអ្វីទេ។ ខ្ញុំគិតថា ប៉ុន្មានថ្ងៃទៀតសំរាមទាំងនេះ នឹងអស់ហើយព្រោះមានអ្នកមកសម្អាតបណ្ដើរៗហើយ »។ នេះជាការលើកឡើយរបស់ លោក វៀន វិច្ចិកា ជាងធ្វើម៉ូតូ នៅតាមបណ្ដាយផ្លូវ ២១៧។
លោក ហែម សីហា វ័យ ២៧ឆ្នាំជាប្រធានអនាម័យ និងក្រណាត់នៅក្នុងក្រុមហ៊ុន YW ដែលស្ថិតនៅតាមបណ្ដាយផ្លូវ ២១៧ ក្នុងភូមិព្រែកជ្រៃ ឃុំព្រែកជ្រៃ សង្កាត់ស្ពាន់ថ្ម មានថ្លែងថា គំនរសំរាមដែលបង្ករឱ្យមានក្លិននៅមុខរោងចក្រនេះ ដោយសារតែខាងរោងចក្រដឹកចេញមិនទាន់ ព្រោះក្រោយទឹកជំនន់ស្រកទៅ ក៏នៅមានភ្លៀងធ្លាក់មកបន្តបន្ទាប់ ដូច្នេះធ្វើឱ្យសំរាមកកស្ទះនៅទីនេះ។
លោក សីហា បន្តថា៖ ក្រុមហ៊ុនបានចាប់ដៃជាមួយក្រុមហ៊ុនស៊ីនទ្រីដើម្បីប្រមូលសំរាមនៅខាងមុខរោងចក្រហើយ ប្រហែលជា២ ឬ៣ថ្ងៃទៀត នៅមុខរោងចក្រនេះមានសភាពធម្មតាវិញហើយ»។
គួរបញ្ជាក់ថា សង្កាត់មួយចំនួននៅខណ្ឌដង្កោ រាជធានីភ្នំពេញ រួមមានសង្កាត់គងនយ សាក់សំពៅ ស្ពានថ្ម ទៀន រលួស និងព្រែកកំពឹសជាដើម រងការជន់លិច កាលពីអំឡុងខែតុលាកន្លងមក ដោយសារទឹកហូរពីស្ទឹងព្រែកត្នោត ដែលធ្វើឱ្យទំបន់ទឹក ៧មករា ទប់ទឹកលែងបាន។
គំនរសំរាមនៅតាមបណ្តោយផ្លូវ ២១៧ ក្នុងខណ្ឌដង្កោ នៅថ្ងៃទី ០១ ខែ វិច្ចិកា ២០២០។