សង្គមអន្តរជាតិ
អន្តរជាតិ
ថៃ នឹងបង់ពន្ធថែម១៩លានដុល្លារ ក្រោយអាមេរិកដកប្រព័ន្ធអនុគ្រោះលើទំនិញខ្លួន២៣១មុខ ប្រធានាធិបតី ដូណាល់ ត្រាំ ចាប់ដៃជាមួយនាយករដ្ឋមន្ត្រីថៃ ប្រាយុទ្ធ ចន្ទអូចា អំឡុងជំនួបមួយក្នុងសេតវិមានអាមេរិក កាលពីឆ្នាំ២០១៧ ។ រូបភាព AP
× ក្រសួងពាណិជ្ជកម្មថៃ បានអះអាងថា ការប្រកាសដកការអនុគ្រោះពន្ធលើទំនិញថៃ២៣១មុខ ក្រោមប្រព័ន្ធអនុគ្រោះពន្ធទូទៅ (Generalized System of Preferences (GSP)) មិនប៉ះពាល់ច្រើនឡើយលើការនាំចេញទំនេញថៃទៅកាន់ទីផ្សារសហរដ្ឋអាមេរិក។ មន្ត្រីជាន់ខ្ពស់នៃក្រសួងពាណិជ្ជកម្មថៃ អះអាងថា ថៃនឹងត្រូវបង់ពន្ធថែមជាង១៩លានដុល្លារ ក្រោយវិធានការនេះចូលជាធរមាន។
ប្រធានាធិបតីអាមេរិក ដូណាល់ ត្រាំ នៅថ្ងៃទី៣១ ខែតុលា បានប្រកាសថា ការអនុគ្រោះពន្ធលើទំនិញនាំចេញពីថៃទៅអាមេរិកប្រមាណ៨១៧លានដុល្លារ នឹងត្រូវដកហូត។ វិធានការនេះ នឹងចូលជាធរមាន ចាប់ពីថ្ងៃទី ៣០ ខែធ្នូ ឆ្នាំ២០២០តទៅ ។ ការផ្អាកនេះ ធ្វើឡើងក្រោមហេតុផលថា ទីផ្សារថៃចង្អៀតសម្រាប់ផលិតផលសាច់ជ្រូកអាមេរិក។
តាមការចុះផ្សាយរបស់កាសែត បាងកកប៉ុស្តិ៍ អគ្គនាយកនៃអគ្គនាយកដ្ឋានលើកកម្ពស់ពាណិជ្ជកម្មអន្តរជាតិរបស់ថៃ Keerati Rushchano នៅថ្ងៃទី១ ខែវិច្ឆិកា អះអាងថា ផលិតផលដែលមានឈ្មោះក្នុងបញ្ជីទាំង២៣១មុខ នឹងត្រូវជាប់ពន្ធនាំចូល មិនមែនត្រូវបានហាមនាំចូលទីផ្សារអាមេរិកឡើយ។
ទោះរងការដកហូតការអនុគ្រោះលើទំនិញថៃ២៣១មុខ លោក Keerati អះអាងថា ទំនិញត្រឹម១៤៧មុខប៉ុណ្ណោះ នឹងរងផលប៉ះពាល់ ដ្បិតថាពួកវានឹងត្រូវជាប់ពន្ធនាំចេញខ្ពស់ចន្លោះពី៣-៤ភាគរយ ហើយគិតជាលុយប្រមាណ ៦០០លានបាត ឬជាង១៩,២លានដុល្លារ។ ចំណែកទំនិញសេសសល់ក្នុងបញ្ជីអនុគ្រោះកន្លងមក មិនត្រូវបានថៃនាំចេញទៅអាមេរិកឡើយ។
ផលិតផលថៃដែលនឹងឈប់ទទួលបានការអនុគ្រោះពន្ធពីអាមេរិកក្រោមកម្មវិធីអនុគ្រោះពន្ធ GSP មានដូចជា គ្រឿងបន្លាស់យានយន្ត សម្ភារអេឡិចត្រូនិក និងសម្ភារផ្ទះបាយមួយចំនួន ។ នេះបើតាមការបញ្ជាក់របស់ការិយាល័យតំណាងពាណិជ្ជកម្មអាមេរិក (USTR) ។
តាមបាងកកប៉ុស្តិ៍ លោកអគ្គនាយក Keerati អះអាងថា ប្រសិនបើទំនិញថៃបន្តរក្សាគុណភាព និងភាពល្បីល្បាញ លោកជឿថា ពន្ធនេះមិនប៉ះពាល់ដល់ទំនុកចិត្តរបស់អ្នកនាំចូលក្នុងសហរដ្ឋអាមេរិកឡើយ។
GSP ជាកម្មវិធីអនុគ្រោះពន្ធធំបំផុតរបស់សហរដ្ឋអាមេរិក ដែលបង្កើតឡើងដើម្បីជំរុញកំណើនសេដ្ឋកិច្ចក្នុងបណ្ដាប្រទេសកំពុងអភិវឌ្ឍជាង១០០ ដោយអនុញ្ញាតឲ្យនាំចេញទំនិញប្រមាណ៣៥០០មុខដោយគ្មានបង់ពន្ធចូលទៅទីផ្សារអាមេរិក។ GSP ក៏មានគោលដៅលើកស្ទួយសិទ្ធិកម្មករ ការពារសិទ្ធិកម្មសិទ្ធិបញ្ញា ក៏ដូចជាពង្រីកទីផ្សារឲ្យធំទូលាយផងដែរ៕
Tag:
សហរដ្ឋអាមេរិក
ថៃ
GSP
ដូណាល់ ត្រាំ
USTR
© រក្សាសិទ្ធិដោយ thmeythmey.com