ជាតិ
សង្គមជាតិ
រដ្ឋមន្ត្រីសាធារណការ រំលឹកពីការដាក់ពិន័យក្រុមហ៊ុនដឹកជញ្ជូនដែលផ្ទុកទំនិញលើសទម្ងន់២០ភាគរយ ប្រភពរូប៖ក្រសួងសាធារណការ និងដឹកជញ្ជូន
× ម្ចាស់ក្រុមហ៊ុនដឹកជញ្ជូន ម្ចាស់និងអ្នកបើកបររថយន្តធុនធ្ងន់ទាំងអស់ នឹងត្រូវដកហូតបណ្ណបើកបរព្យួរទុក២ឆ្នាំ ប្រសិនបើនៅតែបន្តដឹកទំនិញលើសទម្ងន់ពី២០ភាគរយនៃទម្ងន់សរុប។ នេះការព្រមានរបស់លោក ស៊ុន ចាន់ថុល រដ្ឋមន្ត្រីសាធារណការ និងដឹកជញ្ជូន ដោយសង្កត់ធ្ងន់ថា ក្នុងករណីក្រុមហ៊ុនបានទទួលរងការពិន័យអន្តរការណ៍ម្តងរួចហើយ នៅតែប្រព្រឹត្តល្មើសទៀត នោះមន្ត្រីមានសមត្ថកិច្ចនឹងបញ្ឈប់អាជីវកម្មដឹកជញ្ជូនរបស់ក្រុមហ៊ុនក្នុងរយៈពេល១ឆ្នាំ។
តាមរយៈសេចក្តីជូនដំណឹងស្តីពីការពង្រឹងវិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ដែលបើកបរលើបណ្តាញផ្លូវថ្នល់ របស់ក្រសួងសាធារណការ និងដឹកជញ្ជូន កាលពីថ្ងៃទី២៨តុលា ឆ្នាំ២០២០ លោក ស៊ុន ចាន់ថុល បានបញ្ជាឱ្យប្រធានស្ថានីយជញ្ជីងចល័ត និងអចល័តទាំងអស់ជាអ្នកចាត់វិធានការតាមបទប្បញ្ញត្តិខាងលើដែលមាននៅក្នុងមាត្រា៦០នៃច្បាប់ស្តីពីផ្លូវថ្នល់ ចំពោះក្រុមហ៊ុនដឹកជញ្ជូន ម្ចាស់និងអ្នកបើកបររថយន្តធុនធ្ងន់ណាមួយនៅតែបណ្តែតបណ្តោយឱ្យដឹកជញ្ជូន ឬផ្ទុកទម្ងន់លើស២០ភាគរយ ដែលនឹងត្រូវអនុវត្តចាប់ពីថ្ងៃទី១៦វិច្ឆិកា នេះតទៅ។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងជញ្ជូន
បើតាមរដ្ឋមន្រី្តសាធារណការរូបនេះ ម្ចាស់ក្រុមហ៊ុនដឹកជញ្ជូននិងអ្នកបើកបររថយន្តធុនធ្ងន់ដែលនៅបន្តដឹកជញ្ជូនទំនិញលើសទម្ងន់២០ភាគរយនោះ ក្រៅពីបាត់បង់បណ្ណបើកបរដោយព្យួរក្នុងរយៈពេល២ឆ្នាំ និងបញ្ឈប់អាជីវកម្មរបស់ក្រុមហ៊ុន១ឆ្នាំ ហើយនោះ ក៏ត្រូវឃាត់យានជំនិះដែលដឹកទំនិញលើសនោះទុកក្នុងរយៈពេល១ឆ្នាំ នៅទីតាំងសមស្របណាមួយ ដោយម្ចាស់យានយន្តជាអ្នកទទួលខុសត្រូវលើថ្លៃឈ្នួលលើកដាក់ទំនិញ ថ្លៃថែទាំទំនិញ និងយានជំនិះ។
លោក ស៊ុន ចាន់ស៊ុន បានបញ្ជាក់យ៉ាងខ្លី នៅក្នុងសេចក្តីជូនដំណឹងដដែលថា៖« ម្ចាស់ក្រុមហ៊ុនដឹកជញ្ជូននិងអ្នកបើកបររថយន្តធុនធ្ងន់ ដែលរងនូវការពិន័យអន្តរការណ៍ និងការឃាត់ទុកយានជំនិះ [ដូចខាងលើនេះ] គឺអាចមានសិទ្ធិប្តឹងតវ៉ា ស្របតាមនិតីវិធីដូចមានចែងក្នុងបទប្បញ្ញត្តិមាត្រា៤៧ នៃច្បាប់ស្តីពីផ្លូវថ្នល់»។
ជាមួយនឹងគ្នានេះ លោក ស៊ុន ចាន់ថុល ក៏បានព្រមានដល់មន្ត្រីរបស់ខ្លួន ដែលមានសមត្ថកិច្ចបំពេញការងារនៅស្ថានីយជញ្ជីងអចល័តនិងចល័តទាំងអស់ ដែលអនុញ្ញាតឱ្យរថយន្តផ្ទុកទំនិញលើសទម្ងន់កំណត់ខាងលើ(២០ភាគរយ) ធ្វើចរាចរណ៍នៅលើបណ្តាញផ្លូវថ្នល់ នឹងត្រូវទទួលទណ្ឌកម្មវិន័យដោយមានចែកនៅក្នុងច្បាប់ស្តីពីសហលក្ខន្តិកៈមន្ត្រីរាជការស៊ីវិល៕
Tag:
ដឹកជញ្ជូន
បណ្ណបើកបរ
អាជីវកម្ម
លោក ស៊ុន ចាន់ថុល
© រក្សាសិទ្ធិដោយ thmeythmey.com