ប្រមុខការទូតអាមេរិក លោកម៉ៃ ប៉ុមប៉េអូ នៅថ្ងៃទី២ ខែវិច្ឆិកា បានថ្កោសទោសអាជ្ញាធរហុងកុងជុំវិញការចាប់ខ្លួនអ្នកនយោបាយចំនួន៨នាក់ ដែលមាននិន្នាការគាំទ្រលទ្ធិប្រជាធិបតេយ្យ។ ក្នុងចំណោម៨នាក់នោះ ក៏មានសមាជិកសភាហុងកុងចំនួន ៥នាក់។
នៅថ្ងៃទី១ និងទី២ ខែវិច្ឆិកា អាជ្ញាធរហុងកុង បានចាប់ខ្លួនអ្នកនយោបាយដែលមាននិន្នាការទៅរកលទ្ធិប្រជាធិបតេយ្យចំនួន ៨នាក់ ដែលក្នុងនោះមានសមាជិកសភាចំនួន៥នាក់ពាក់ព័ន្ធការបង្អាក់កិច្ចប្រជុំសភាកាលពីខែឧសភាកន្លងទៅ។ បើតាមអាជ្ញាធរហុងកុង ពួកគេត្រូវចាប់ខ្លួន ដោយសារពាក់ព័ន្ធការស្រែកតវ៉ា និងការវាយតបគ្នាក្នុងកិច្ចប្រជុំសភា។
ប្រមុខការទូតអាមេរិក ម៉ៃ ប៉ុមប៉េអូ បានចេញមកប្រតិកម្មទង្វើបែបនេះ។ ក្នុងសេចក្តីថ្លែងការណ៍ថ្ងៃទី២ ខែវិច្ឆិកា លោក ប៉ុមប៉េអូ បានលើកឡើងយ៉ាងដូច្នេះថា៖ «ការចាប់ខ្លួនសមាជិកសភា បន្ទាប់ពីហេតុការណ៍បានកើតឡើងរយៈពេល ៦ខែ គឺច្បាស់ណាស់ថា ជាការរំលោភបំពានការអនុវត្តច្បាប់ និងក្រោមគោលបំណងនយោបាយ»។ បើតាមលោកប៉ុមប៉េអូ អាមេរិក ថ្កោលទោសលើការចាប់ខ្លួននេះ និងទាមទារឲ្យអាជ្ញាធរហុងកុងគោរពសិទ្ធិមនុស្ស។
លោកប្រមុខការទូតអាមេរិក បានបន្ថែមទៀតថា ការចាប់ខ្លួនសមាជិកសភា និងអ្នកនយោបាយខាងលើនេះ ជាចេតនារបស់រដ្ឋាភិបាលក្រុងហុងកុង ដើម្បីបំបិទចោលការប្រឆាំងនៅក្នុងទីក្រុងដែលតែងតែបង្កភាពស្មុគស្មាញដល់បក្សកុម្មុយនីស្តចិន។
ចំណែកអ្នកដែលជិតស្និទ្ធនឹងសមាជិកសភាត្រូវគេចាប់ខ្លួនវិញ បានរិះគន់អាជ្ញាធរហុងកុងថាលម្អៀង និងចាប់ខ្លួនតែមួយភាគី បើទោះបីជាការវាយតបគ្នានេះក៏ចូលរួមដោយសមាជិកសភាមាននិន្នការរកប៉េកាំងក្ដីក៏ដោយ។ នេះបើតាមការចុះផ្សាយរបស់កាសែត South China Morning Post។
ការស្រែកតវ៉ា និងការប៉ះទង្គិចគ្នារវាងសមាជិកសភាដែលមានទំនោរទៅរកទីក្រុងប៉េកាំង និងសមាជិកសភាមានទំនោរទៅរកលទ្ធិប្រជាធិបតេយ្យ បានកើតឡើងនៅថ្ងៃទី៨ ខែឧសភា។ នៅពេលនោះ គណៈកម្មាធិការសភាហុងកុងកំពុងប្រជុំត្រួតពិនិត្យលើសេចក្តីស្នើច្បាប់មួយចំនួន រួមទាំងសេចក្តីស្នើច្បាប់ភ្លេងជាតិចិនផងដែរ មុននឹងដាក់ឲ្យកិច្ចប្រជុំសភាពេញអង្គពិនិត្យ។
ក្នុងកិច្ចប្រជុំនេះ សមាជិកសភាដែលមានទំនោរទៅរកទីក្រុងប៉េកាំង បានបណ្តេញសមាជិកសភាដែលមានទំនោរទៅរកលទ្ធិប្រជាធិបតេយ្យចំនួន១១នាក់ចេញ ដើម្បីគ្រប់គ្រងគណៈកម្មាធិការសភានោះ។ ដោយសារបញ្ហានេះ ទើបធ្វើឲ្យសមាជិកសភាទាំងពីរក្រុមវាយតបគ្នា និងស្រែកដាក់គ្នា។
សូមបញ្ជាក់ថា ចាប់តាំងពីច្បាប់សន្តិសុខជាតិហុងកុង ចូលជាធរមានមក អាមេរិក តែងតែរិះគន់ចិន ក៏ដូចជាអាជ្ញាធរហុងកុង ជាញឹកញាប់ ជុំវិញការបំពានសិទ្ធិមនុស្ស សិទ្ធិបញ្ចេញមតិ និងសិទ្ធិផ្សេងទៀតនៅក្នុងទីក្រុង។ លើសពីនេះ អាមេរិក ក៏បានអនុម័តច្បាប់ ដើម្បីដាក់ទណ្ឌកម្មលើប្រមុខដឹកនាំហុងកុង លោកស្រី ការី ឡាំ និងអ្នកពាក់ព័ន្ធផ្សេងទៀតផងដែរ៕