អន្តរជាតិ
ជាងគំនូរម្នាក់ គូសរូបលោកបៃឌិន និងលោក ត្រាំ ក្នុងទីក្រុង Mumbai ឥណ្ឌា ។ រូបភាព ៖ AFP
×![]()
ក្រោយការបោះឆ្នោតចប់ វាអាចត្រូវការពេលប៉ុន្មានថ្ងៃ ឬសូម្បីតែសប្ដាហ៍ ដើម្បីដឹងលទ្ធផលថាតើលោក ដូណាល់ ត្រាំ ឬលោក ចូ បៃឌិន ក្លាយជាម្ចាស់សេតវិមានក្នុងការបោះឆ្នោតប្រធានាធិបតីអាមេរិកឆ្នាំ២០២០។ ក្នុងការបោះឆ្នោតឆ្នាំនេះ ដោយសារជំងឺរាតត្បាតសកលកូវីដ-១៩ ពលរដ្ឋអាមេរិករាប់លាននាក់ បានបោះឆ្នោតតាមរយៈប្រៃសណីយ៍។ នេះមានន័យថា វានឹងការយឺតយ៉ាវខ្លាំងក្នុងការរៀបសន្លឹកឆ្នោតទាំងអស់។ 
ជាធម្មតា លទ្ធផលបោះឆ្នោត ត្រូវបានប្រកាសនៅយប់ថ្ងៃបោះឆ្នោតធំ ដែលឆ្នាំនេះគឺត្រូវនឹងថ្ងៃទី ៣ ខែវិច្ឆិកា។ រដ្ឋផ្សេងគ្នានៅសហរដ្ឋអាមេរិក បញ្ចប់ការបោះឆ្នោតនៅម៉ោងខុសៗគ្នា។ មណ្ឌលបោះឆ្នោត ដែលបិទមុនគេ គឺនៅតាមបណ្ដារដ្ឋឆ្នេរភាគខាងកើត (East Coast) នៅម៉ោង ៧យប់ (ម៉ោងក្នុងស្រុកអាមេរិក)។
ការរាប់សន្លឹកឆ្នោតទាំងស្រុង មិនអាចកើតឡើងបានឡើយ តែជាធម្មតា សន្លឹកឆ្នោតគ្រប់គ្រាន់ គឺអាចបញ្ជាក់អ្នកឈ្នះឆ្នោតបានហើយ។ លទ្ធផលបោះឆ្នោតក្នុងរដ្ឋមួយ ត្រូវបានប្រកាសដោយប្រព័ន្ធផ្សព្វផ្សាយអាមេរិកធំៗ នៅពេលពួកគេជឿជាក់ថា បេក្ខជនរូបនោះ មានការនាំមុខដាច់លើគូប្រជែងខ្លួន។ តែក្នុងដំណាក់កាលនេះ ពុំទាន់ចាត់ទុកជាលទ្ធផលចុងក្រោយឡើយ។
ម្យ៉ាងប្រធានាធិបតីអាមេរិក ពុំត្រូវជ្រើសរើសដោយផ្ទាល់ពីសំណាក់ប្រជាជនអាមេរិកនោះទេ (Popular Vote) តែនឹងត្រូវជ្រើសរើសដោយប្រតិភូតំណាង (Elector) ។ បេក្ខជនប្រធានាធិបតីអាមេរិក ត្រូវការសំឡេងឆ្នោតយ៉ាងតិច ២៧០ សន្លឹកពីប្រតិភូដែលស្មើជាងពាក់កណ្ដាលនៃប្រតិភូសរុប (៥៣៨នាក់) ដើម្បីឈ្នះការបោះឆ្នោតអាមេរិក។
ក្នុងឆ្នាំ២០១៦ លទ្ធផលបោះឆ្នោតបញ្ជាក់ថា លោកដូណាល់ត្រាំឈ្នះ ត្រូវបានប្រកាសនៅម៉ោង ២៖៣០នាទីព្រឹក (ម៉ោងនៅវ៉ាស៊ីនតោន DC) ថ្ងៃបន្ទាប់នៃថ្ងៃបោះឆ្នោតធំ ក្រោយជោគជ័យក្នុងរដ្ឋ Wisconsin បង្គ្រាប់សន្លឹកឆ្នោតពីប្រតិភូតំណាងឲ្យលោក ២៧០សំឡេង។
ហេតុអ្វីការបោះឆ្នោតឆ្នាំនេះខុសប្លែកពីរាល់ដង?
ជំងឺរាតត្បាតសកលកូវីដ-១៩ បង្កឲ្យពលរដ្ឋអាមេរិកកាន់តែច្រើនលើសពេលណាៗទាំងអស់ បោះឆ្នោតមុនកំណត់ ដោយតាមរយៈប្រៃសណីយ៍ ឬដោយផ្ទាល់នៅមណ្ឌលឆ្នោត។ ការបោះឆ្នោតតាមប្រៃសណីយ៍ ជាទូទៅ ត្រូវការពេលយូរដើម្បីរាប់ ដ្បិតថា ពួកវាត្រូវឆ្លងកាត់ជំហានច្រើនដើម្បីបញ្ជាក់ ដូចជា ហត្ថលេខា និងអាសយដ្ឋានជាដើម។
រដ្ឋអាមេរិកខ្លះ ដូចជា រដ្ឋ Florida និងរដ្ឋ Ohio អនុញ្ញាតឲ្យបើកដំណើរការបោះឆ្នោតបែបនេះច្រើនសប្ដាហ៍មុនថ្ងៃបោះឆ្នោតធំ ដូច្នេះសន្លឹកឆ្នោត អាចរាប់ទាន់ពេល។ ក្នុងរដ្ឋទាំងនេះ វាប្រហែលអាចទៅរួចក្នុងការប្រកាសអ្នះឈ្នះនៅយប់បោះឆ្នោតធំ។
ក៏ប៉ុន្តែ រដ្ឋផ្សេងទៀត ដូចជា រដ្ឋ Pennsylvania និងរដ្ឋ Wisconsin មិនអនុញ្ញាតឲ្យអនុវត្តដំណើរការបោះឆ្នោតមុនពេលកំណត់ឡើយ។ រដ្ឋទាំងនេះគឺសំខាន់ក្នុងកំណត់ជោគវាសនាម្ចាស់សេតវិមាន ហើយខាងមន្ត្រីរៀបចំការបោះឆ្នោតអាមេរិក អះអាងថា ការរាប់សន្លឹកឆ្នោតក្នុងរដ្ឋទាំងនេះ អាចប្រើពេលរាប់ថ្ងៃ។
ក៏មានកត្ដាផ្សេងទៀត ដែលធ្វើឲ្យការរាប់សន្លឹកឆ្នោតយឺតយ៉ាវផងដែរ។ ប្រមាណពាក់កណ្ដាលនៃរដ្ឋទាំងអស់របស់អាមេរិក នឹងទទួលយកការផ្ញើសន្លឹកឆ្នោតតាមប្រៃសណីយ៍ ដែលមកដល់ក្រោយថ្ងៃបោះឆ្នោតធំផងដែរ ដរាបណាសន្លឹកឆ្នោតទាំងនេះ បានចុះត្រាប្រៃសណីយ៍ក្នុងថ្ងៃទី ៣ ខែវិច្ឆិកា។ ដូច្នេះ សន្លឹកឆ្នោតខ្លះ នឹងពុំត្រូវបានរាប់ឡើយរហូតដល់ប៉ុន្មានថ្ងៃក្រោយបោះឆ្នោតចប់។
ម្យ៉ាងទៀត ពលរដ្ឋអាមេរិករាប់លាននាក់ នឹងនៅតែចេញទៅតម្រង់ជួរបោះឆ្នោតនៅថ្ងៃបោះឆ្នោតធំ។ ក៏ប៉ុន្តែមណ្ឌលឆ្នោតតិចជាងធម្មតា នឹងត្រូវបើកទ្វារដោយសារតែបញ្ហាជំងឺកូវីដ-១៩ និងក្តីបារម្ភពីនិយោជកពាក់ព័ន្ធរឿងអស់បុគ្គលិកធ្វើការ ព្រោះឈរតម្រង់ជួររង់ចាំបោះឆ្នោតវែងពេក។ បញ្ហាដែលកើតឡើងរាល់ឆ្នាំ ដូចជា បញ្ហាបច្ចេកទេសម៉ាស៊ីនបោះឆ្នោត ក៏អាចបង្កភាពយឺតយ៉ាវផងដែរ។
តើមានអ្វីកើតឡើងប្រសិនបើលទ្ធផលបោះឆ្នោត ពុំត្រូវបានទទួលស្គាល់?
ជាមួយរឿងដែលថាប្រធានាធិបតីអាមេរិក ដូណាល់ ត្រាំ ធ្លាប់បដិសេធតាំងចិត្តទទួលស្គាល់លទ្ធផលបោះឆ្នោត ហើយបក្សទាំងពីរត្រៀមមេធាវីរៀងៗខ្លួនតទល់ បើមានអ្វីថ្លោះធ្លោយនោះ សហរដ្ឋអាមេរិក អាចប្រឈមភាពមិនច្បាស់លាស់រាប់សប្ដាហ៍ ពាក់ព័ន្ធនឹងរឿងនរណានឹងក្លាយជាប្រធានាធិបតីទី៤៦សហរដ្ឋអាមេរិក។
ដរាបណាគ្មានលទ្ធផលបោះឆ្នោតដាច់ស្រាច់ទេនោះ សហរដ្ឋអាមេរិក នឹងប្រឈមមុខនឹងការបោះឆ្នោតមានជម្លោះលើកទី២ ក្នុងពេល២០ឆ្នាំចុងក្រោយ ជាមួយលទ្ធផលឆ្នោតអាចធ្លាក់ដល់ដៃតុលាការកំពូល ឬសូម្បីតែក្នុងដៃសភាអាមេរិក។
ជាមួយគ្នានេះ បញ្ហាជំងឺកូវីដ-១៩ បានបង្កភាពមិនប្រក្រីតី ៣០០ករណីហើយក្នុងដំណើរការបោះឆ្នោតអាមេរិក ក្នុងរដ្ឋចំនួន៤៤។ បញ្ហាស្នូល គឺស្ថិតត្រង់ ការរាប់សន្លឹកឆ្នោត ដោយខាងបក្សសាធារណរដ្ឋ អះអាងថា ការបោះឆ្នោតតាមរយៈប្រៃសណីយ៍ នឹងបង្កឲ្យកើតមានការកេងបន្លំជាដើម។ លោក ត្រាំក៏ធ្លាប់ប្រកាសថា លទ្ធផលឆ្នោតឆ្នាំនេះ អាចធ្លាក់ដល់ដៃតុលាការកំពូលជាអ្នកកាត់ក្តីឈ្នះឬចាញ់ ។
ជាឧទាហរណ៍ ក្នុងឆ្នាំ២០០០ បេក្ខជនបក្សប្រជាធិបតេយ្យ លោក Al Gore បានចាញ់ក្នុងរដ្ឋ Florida ត្រឹម ៥៣៧សំឡេងប៉ុណ្ណោះ ក្នុងចំណោមសន្លឹកឆ្នោតសរុបជិត ៦លានសំឡេង។ លោកបានតវ៉ាឲ្យមានការរាប់សន្លឹកឆ្នោតឡើងវិញយ៉ាងតានតឹងបំផុត ដែលបានអូសបន្លាយជាង១ខែ ហើយចុងក្រោយ តុលាការកំពូលអាមេរិក បានកាត់ក្តីឲ្យលោក George W Bush បេក្ខជនប្រធានាធិបតីមកពីបក្សសាធារណរដ្ឋឈ្នះ។ ឈ្នះ Florida គឺលោក Bush ក្លាយជាម្ចាស់សេតវិមានអាមេរិក ក្នុងសំឡេងគាំទ្រ ២៧១ ទល់នឹង ២៦៦ សំឡេងពីប្រតិភូតំណាង៕
Tag:
ការបោះឆ្នោតអាមេរិក
ដូណាល់ ត្រាំ
ចូ បៃឌិន
© រក្សាសិទ្ធិដោយ thmeythmey.com
