COVID-19
អន្តរជាតិ
រូបភាព៖ Vietnam News Agency
×![]()
ដោយ: ធៀន ភារិន្ទ
មន្ត្រីសុខាភិបាលវៀតណាមម្នាក់ នៅថ្ងៃទី៣ ខែវិច្ឆិកា បានបញ្ជាក់ថា វៀតណាម អាចនឹងសាកល្បងវ៉ាក់សាំងCOVID-19 របស់ខ្លួននៅដើមខែវិច្ឆិកានេះ។ ការសាកល្បងដំបូង មានមនុស្សចូលរួមចំនួន ២០នាក់។ 
ប្រសិនបើគ្មានការប្រែប្រួលទេ វ៉ាក់សាំងមួយប្រភេទ ដែលត្រូវបានស្រាវជ្រាវដោយក្រុមហ៊ុន Nanogen Pharmaceutical Biotechnology នឹងក្លាយជាវ៉ាក់សាំងដំបូងគេរបស់វៀតណាម ក្នុងការសាកល្បងលើមនុស្ស ប្រសិនបើទទួលបានការយល់ព្រម។ នេះបើតាមការបញ្ជាក់របស់លោក Nguyen Ngo Quang អនុប្រធានរដ្ឋបាលវិទ្យាសាស្ត្រ បច្ចេកវិទ្យា និងការហ្វឹកហ្វឺន នៃក្រសួងសុខាភិបាលវៀតណាម។
តាមការចុះផ្សាយរបស់ព័ត៌មានក្នុងស្រុក Vietnam Express ក្រសួងសុខាភិបាលវៀតណាម ក៏បានជំរុញឲ្យក្រុមហ៊ុន Nanogen ត្រៀមខ្លួនឲ្យបានរួចរាល់ ក្នុងការសាកល្បងវ៉ាក់សាំងលើរោគវិនិច្ឆ័យនៃដំណាក់កាលទី៣ ផងដែរ។ ក្នុងពេលដំបូង វៀតណាម នឹងសាកល្បងលើមនុស្សចំនួន ២០នាក់ បន្ទាប់មក ៦០០នាក់ និងចុងក្រោយគឺ ១ម៉ឺននាក់។
ក្រៅពីវ៉ាក់សាំងរបស់ក្រុមហ៊ុនNanogen វៀតណាមក៏មានក្រុមហ៊ុន៣ផ្សេងទៀត កំពុងស្រាវជ្រាវរកវ៉ាក់សាំង COVID-19 ផងដែរ។ ក្នុងចំណោមក្រុមហ៊ុនទាំង៣នេះ ក្រុមហ៊ុន Vabiotech ក៏បានសាកល្បងលើសត្វស្វាចំនួន ១២ក្បាលផងដែរ និងត្រូវបានគេប៉ាន់ប្រមាណថា វ៉ាក់សាំងក្រុមហ៊ុនេះ នឹងឈានដល់ដំណាក់កាលចុងក្រោយប្រមាណរយៈពេល ១ខែទៀត។
សូមបញ្ជាក់ថា គិតមកត្រឹមថ្ងៃទី៣ ខែវិច្ឆិកា វៀតណាម មានករណីឆ្លងCOVID-19 សរុបចំនួន ១១៩២ករណី អ្នកស្លាប់មានចំនួន ៣៥នាក់ ខណៈអ្នកជាសះស្បើយមានចំនួន ១០៦៥នាក់៕
Tag:
វៀតណាម
COVID-19
© រក្សាសិទ្ធិដោយ thmeythmey.com
