ជាតិ
សង្គមជាតិ
ក្រុមប្រឹក្សាជាតិកម្ពុជាដើម្បីកុមារ អំពាវនាវឲ្យអាជ្ញាធរចាត់វិធានការតឹងរ៉ឹង លើករណីបោះបង់ទារក ទារកម្នាក់ ត្រូវដាក់ក្នុងកេសក្រដាស យកទៅបោះចោលនៅលើចិញ្ចើមផ្លូវជាប់របងវិទ្យាល័យ ហ៊ុន សែន ប៊ុនរ៉ានី វត្តភ្នំ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ
× ភ្នំពេញ៖ ក្រុមប្រឹក្សាជាតិកម្ពុជាដើម្បីកុមារ បានអំពាវនាវឲ្យគ្រប់ក្រសួង ស្ថានប័ន និងអ្នកពាក់ព័ន្ធទាំងអស់ចាត់វិធានការតាមផ្លូវច្បាប់ឲ្យតឹងរ៉ឹង ដើម្បីកុំឲ្យមានករណីបោះបង់ទារកកើតឡើងក្នុងសង្គមបន្តទៀត។ ការអំពាវនាវនេះ ធ្វើឡើងក្រោយប្រទះឃើញសាកសពទារកម្នាក់ស្លាប់ក្នុងកេសក្រដាស។
បើតាមសេចក្ដីថ្លែងការរបស់ក្រុមប្រឹក្សាជាតិដើម្បីកុមារ បង្ហាញការតក់ស្លុតនិងថ្កោលទោសយ៉ាងខ្លាំង ចំពោះករណីយកទារកម្នាក់ទៅបោះចោលនៅលើចិញ្ចើមផ្លូវជាប់របងវិទ្យាល័យ ហ៊ុន សែន ប៊ុនរ៉ានី វត្តភ្នំ ក្នុងសង្កាត់ស្រះចក ខណ្ឌដូនពេញ។ ទារកនេះ មានអាយុប្រមាណក្រោម២សប្ដាហ៍ហើយប្រទះឃើញបាត់បង់ជីវិតរួចយកទៅដាក់ក្នុងកេសក្រដាសនៅតាមចិញ្ចើមផ្លូវ។
ក្រុមប្រឹក្សាជាតិដើម្បីកុមារចាត់ទុកករណីនេះ ជាអំពើឃោរឃៅដែលបានរំលោភសិទ្ធិកុមារយ៉ាងធ្ងន់ធ្ងរ។ ជាមួយគ្នាដែរ ករណីនេះ សមត្ថកិច្ចកំពុងស្រាវជ្រាវរកអ្នកប្រព្រឹត្ត ដើម្បីចាត់វិធានការនីតិវិធីច្បាប់។
ជុំវិញករណីអំពើឃោរឃៅ យកទារកបោះចោលនេះ ក្រុមប្រឹក្សាជាតិកម្ពុជាដើម្បីកុមារបានអំពាវនាវដល់គ្រប់ក្រសួង ស្ថាប័ន និងអ្នកពាក់ព័ន្ធយកចិត្តទុកដាក់ចាត់វិធានការតាមផ្លូវច្បាប់យ៉ាងតឹងរ៉ឹងលើជនល្មើស។ លើសពីនេះ ត្រូវទប់ស្កាត់ចូលរួមកុំឥឲ្យមានករណីនេះកើតមានក្នុងសង្គមបន្តទៀត៕
© រក្សាសិទ្ធិដោយ thmeythmey.com