COVID-19
ជាតិ
សង្គមជាតិ
គ្រឹះស្ថានអប់រំ ដែលមានបុគ្គលិក សិស្សនិស្សិត ជួបផ្ទាល់ប្រមុខការទូតហុងគ្រី ត្រូវផ្អាកការសិក្សា
×![]()
ភ្នំពេញ៖ ក្រសួងអប់រំ យុវជន និងកីឡា នៅយប់ថ្ងៃទី ៤ ខែវិច្ឆិកានេះ បានប្រកាសឲ្យគ្រឹះស្ថានសិក្សា ដែលមានបុគ្គលិក សិស្ស និងនិស្សិត បានជួបផ្ទាល់នឹងប្រមុខការទូតហុងគ្រី ត្រូវផ្អាកការសិក្សា ប៉ុន្តែត្រូវបន្តបង្រៀន និងរៀនតាមប្រព័ន្ធអនឡាញ។ បើតាមលិខិតរបស់ក្រសួង បុគ្គលិកអប់រំ និងសិស្សនិស្សិតទាំងនោះ ត្រូវធ្វើចត្តាឡីស័ករយៈពេល១៤ថ្ងៃទៀតផង។ 
លិខិតប្រកាសព័ត៌មានរបស់ក្រសួងអប់រំបានបញ្ជាក់ថា សាស្ត្រាចារ្យ បុគ្គលិកអប់រំ និងសិស្សនិស្សិត ដែលបានជួបផ្ទាល់នឹងរដ្ឋមន្ត្រីការបរទេសហុងគ្រី ដែលទើបរកឃើញកូវីដ-១៩ ត្រូវរាយការណ៍មកក្រសួងអប់រំតាមរយៈលេខទូរសព្ទ ០១២ ៣៣ ៥៩៩៩ នៅត្រឹមថ្ងៃទី៥ខែវិច្ឆិកានេះ។
ចំពោះគណៈគ្រប់គ្រងគ្រឹះស្ថានសិក្សា បុគ្គលិកអប់រំ សិស្សនិស្សិត មាតាបិតានិងអាណាព្យាបាល នៅតាមគ្រឹះស្ថាននោះ ត្រូវប្រុងប្រយ័ត្នឱ្យខ្ពស់បំផុត និងត្រូវតាមដានសុខភាពផ្ទាល់ខ្លួន ហើយក្នុងករណីសង្ស័យ ត្រូវទាក់ទងទៅទូរសព្ទទាន់ហេតុការណ៍របស់ក្រសួងសុខាភិបាល។
គួរជម្រាបថា លោក Peter Szijarto រដ្ឋមន្ត្រីការបរទេសហុងគ្រី ដែលទើបបញ្ចាប់ដំណើរទស្សនាកិច្ចនៅកម្ពុជា ត្រូវបានរកឃើញ មានផ្ទុកកូរ៉ូណាវីរុស អំឡុងពេលដាក់ចត្តាឡីស័កពេលទៅដល់ប្រទេសថៃ។ ក្នុងដំណើរទស្សនាកិច្ចនៅកម្ពុជាកន្លងទៅ ប្រមុខការទូតហុងគ្រីរូបនេះ បានជួបផ្ទាល់ជាមួយ សម្ដេចនាយករដ្ឋមន្ត្រី ហ៊ុន សែន និងថ្នាក់ដឹកនាំកម្ពុជាផ្សេងទៀតរួមមាន លោកវេង សាខុន រដ្ឋមន្ត្រីក្រសួងកសិកម្ម ,លោក ប្រាក់ សុខុន រដ្ឋមន្ត្រីការបរទេស ,លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម, លោក លឹម គានហោ រដ្ឋមន្ត្រីក្រសួងធនធានទឹក និងលោក សួស យ៉ារ៉ា សមាជិកសភាកម្ពុជា។
រដ្ឋាភិបាល បានសម្រេចឱ្យ ថ្នាក់ដឹកនាំ និងមន្ត្រីទាំងអស់ដែលបានជួបប្រាស្រ័យផ្ទាល់ជាមួយ ប្រតិភូប្រមុខការទូតហុងគ្រី ត្រូវធ្វើចត្តាឡីស័កតាមការកំណត់របស់ក្រសួងសុខាភិបាល។ ជាមួយគ្នានេះ សម្ដេច ហ៊ុន សែន បានប្រកាសនៅក្នុងហ្វេសប៊ុករបស់សម្ដេចនៅយប់ថ្ងៃនេះថា សម្ដេចនឹងដាក់ខ្លួននៅដាច់ដោយឡែករយៈពេល១៤ថ្ងៃ ក្រោយបានជួប រដ្ឋមន្ត្រីការបរទេសហុងគ្រី។ រីឯ រដ្ឋមន្ត្រីក្រសួងកសិកម្ម លោក វេង សាខុន និងលោក លឹម គានហោ រដ្ឋមន្ត្រីក្រសួងធនធានទឹក ក៏បានប្រកាសចាប់ផ្ដើមធ្វើចត្តាឡីស័កផងដែរ។ នេះបើតាមរដ្ឋមន្ត្រីទាំងពីរ បានប្រាប់សារព័ត៌មានថ្មីៗ តាមទូរសព្ទ៕
Tag:
ក្រសួងអប់រំ
COVID-19
© រក្សាសិទ្ធិដោយ thmeythmey.com
