ក្រោយមានការបង្ហោះលើបណ្តាញសង្គមជុំវិញរឿងនគរបាលផ្ទុះអាវុធ ពេលចុះទៅធ្វើអន្តរាគមន៍បញ្ឈប់អំពើហិង្សាបង្កឡើងដោយមនុស្សមួយក្រុមនៅខេត្តកំពត ហើយបណ្តាលឲ្យបុរសម្នាក់ស្លាប់ ដោយសារត្រូវគ្រាប់កាំភ្លើង ស្នងការដ្ឋាននគរបាលខេត្តកំពត ក៏ចេញសេចក្តីបំភ្លឺព័ត៌មាន អំពីហេតុការណ៍នេះ ដើម្បីចៀសវាងការយល់ច្រឡំ។
ស្នងការដ្ឋាននគរបាលខេត្តកំពត រៀបរាប់ពីហេតុការណ៍ថា នៅម៉ោងជាង៩យប់ ថ្ងៃទី២ ខែវិច្ឆិកា ឆ្នាំ២០២០ មនុស្សមួយក្រុម មានគ្នា៥នាក់ បានកាប់យុវជនម្នាក់ឈ្មោះ តឿ ចាន់ អាយុ១៧ឆ្នាំ នៅភូមិកំពង់បាយខាងត្បូង សង្កាត់កំពង់បាយ ក្រុងកំពត បណ្តាលឲ្យរងរបួសក្បាលធ្ងន់។ ស្នងការដ្ឋាននគរបាលខេត្តកំពត លើកមូលហេតុថា យុវជនឈ្មោះ តឿ ចាន់ អង្គុយផឹកកាហ្វេ នៅក្បែរក្រុមមនុស្ស ដែលមានគ្នា៥នាក់នោះ ដោយយុវជន តឿ ចាន់ បានមើលមុខក្នុងចំណោមអ្នកទាំង៥ ហើយពួកគេខឹង ក៏តាមកាប់យុវជន តឿ ចាន់ ពេលចេញពីហាងកាហ្វេ។
ស្នងការដ្ឋាននគរបាលខេត្តកំពត បន្តថា កម្លាំងអធិការដ្ឋាននគបាលក្រុងកំពត បានចុះដល់កន្លែងកើតហេតុ ដើម្បីប្រមូលព័ត៌មាននិងពង្រាយកម្លាំងតាមដងផ្លូវស្ទាក់ចាប់អ្នកទាំង៥ ដែសមត្ថកិច្ច ចាត់ទុកជាជនសង្ស័យ។ ស្នងការដ្ឋាននគរបាលខេត្តកំពត បន្ថែមថា ភ្លាមៗនោះ កម្លាំងសមត្ថកិច្ចបានឃាត់ម៉ូតូ១គ្រឿងមានគ្នា២នាក់ ប៉ុន្តែពួកគេទាំង២នាក់ មិនព្រមឈប់ ហើយថែមទាំងបើកបុកកម្លាំងសមត្ថកិច្ចទៀត បណ្តាឲ្យសមត្ថកិច្ច២នាក់ រងរបួស។
ស្នងការដ្ឋាននគរបាលខេត្តកំពត បកស្រាយក្នុងសេចក្តីបំភ្លឺព័ត៌មានថា៖«ដោយឃើញស្ថានភាពបែបនេះ កម្លាំងសមត្ថកិច្ចដទៃទៀត ក៏បានផ្ទុះអាវុធផ្ចុចដី ដើម្បីឲ្យឈប់ [ហើយ] បណ្តាលឲ្យផ្លាតគ្រាប់ត្រូវជនសង្ស័យ១នាក់ស្លាប់ នៅពេលដែលបញ្ជូនទៅដល់មន្ទីរពេទ្យ និងឃាត់ខ្លួនគូកនបាន១នាក់»។
អ្នកទាំង៥នាក់នោះគឺ ឈ្មោះ ម៉ម វិបុល អាយុ២៩ឆ្នាំ ឈ្មោះ ធម្ម កុម្ភៈ អាយុ១៦ឆ្នាំ ឈ្មោះ ម៉ាត់ សើគីរីន អាយុ១៧ឆ្នាំ ឈ្មោះ សុខ ធា អាយុ១៧ឆ្នាំ និង ឈ្មោះ រ៉ាន់ អាយុជាង ២០ឆ្នាំ។ អ្នកដែលស្លាប់ដោយត្រូវគ្រាប់កាំភ្លើង គឺឈ្មោះ ម៉ម វិបុល ហើយឈ្មោះ ធម្ម កុម្ភៈ ត្រូវឃាត់ខ្លះ ខណៈ៣នាក់ សមត្ថកិច្ច ពុំបញ្ជាក់ថា ត្រូវឃាត់ខ្លួនដែរឬរត់គេចខ្លួន។
ស្នងការដ្ឋាននគរបាលខេត្តកំពត អះអាងថា សកម្មភាពរបស់កម្លាំងសមត្ថមកិច្ចខាងលើនេះ គឺស្របតាមមាត្រា៣១ រហូតដល់មាត្រា៣៧ នៃក្រមព្រហ្មទណ្ឌកម្ពុជា។ យ៉ាងណា ស្នងការដ្ឋាននគរបាលខេត្តកំពត បញ្ជាក់ថា បានឃាត់មន្ត្រីនគរបាល៣នាក់ ដែលបង្កឲ្យផ្ទុះអាវុធដើម្បីអនុវត្តតាមវិន័យរបស់កងកម្លាំងនគរបាលជាតិ និងកសាងសំណុំរឿងបញ្ជូនទៅតុលាការ ដើម្បីអនុវត្តតាមនីតិវិធី។
ជាមួយគ្នានេះ ស្នងការដ្ឋាននគរបាលខេត្តកំពត បាននាំយកថវិកា៤ពាន់៥រយដុល្លារ ទៅជូនក្រុមគ្រួសារសព សម្រាប់ចាត់ចែងធ្វើបុណ្យតាមប្រពៃណី។ ស្នងការដ្ឋាននគរខេត្តកំពត ចាត់ទុក ការចូលថវិកា៤ពាន់៥រយដុល្លារនេះ ថាជាសន្តានចិត្តប្រកបដោយមនុស្សធម៌ និងជាការចូលរួមរំលែកទុក្ខជាមួយក្រុមគ្រួសារសព។
លោក ម៉ៅ ច័ន្ទមធុរិទ្ធ ស្នងការខេត្តកំពត ប្រាប់សារព័ត៌មានថ្មីៗតាមទូរស័ព្ទថា នគរបាលទាំង៣នាក់នោះ អាចនឹងត្រូវកសាងសំណុំរឿងបញ្ជូនទៅតុលាការនៅល្ងាចថ្ងៃទី៥ ខែវិច្ឆិកានេះ។ លោក និយាយមានន័យដូចនឹងសេចក្តីបំភ្លឺព័ត៌មានដែរថា ការជូនថវិកាពាន់៥រយដុល្លារដល់ក្រុមគ្រួសារសព ជាការចូលរួមរំលែកទុក្ខ មិនមែនជាការសូកប៉ាន់ដូចការចោទប្រកាន់លើបណ្តាញសង្គមឡើយ។
អ្នកប្រើប្រាស់បណ្តាញសង្គមខ្លះ បានចោទជាសំណួរថា នគរបាលខេត្តកំពត បានបាញ់បុរសនោះស្លាប់ ហើយដឹកសពមកទៅដល់ផ្ទះ ជាមួយនឹងការសងជំងឺចិត្ត៤ពាន់៥រយដុល្លារ ដើម្បីបញ្ជប់រឿង តើច្បាប់នៅកម្ពុជា មានចែងបែបនេះដែរឬអត់? ហើយនគរបាល ធ្វើអ៊ីចឹងត្រូវឬខុស?
លោក ម៉ម បានី ជាឪពុករបស់បុរសឈ្មោះ ម៉ម វិបុល ដែលបាត់បង់ជីវិត មិនជឿឡើយថា សមត្ថកិច្ច បាញ់កាំភ្លើងផ្ទុចទៅនឹងដី ហើយលោក ក៏មិនអាចទទួលយកបានដែរចំពោះការបកស្រាយបែបនេះរបស់ស្នងការដ្ឋាននគរបាលខេត្តកំពត។ ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ លោក ម៉ម បានី មានប្រសាសន៍ថា៖«អ្នកចេះច្បាប់ គេវិភាគទៅដឹងហើយ...។ បើបាញ់ផ្ចុចទៅដី ទោះបីត្រូវ ក៏មិនអាចបាត់បង់ជីវិតដែរ ព្រោះបើបាញ់ផ្ចុចទៅដី គ្រាប់កាំភ្លើង អស់ខ្យល់ហើយ...»។
លោក ម៉ម បានី មានប្រសាសន៍ទៀតថា ថវិកា៤ពាន់៥រយដុល្លារ ដែលជូនទៅក្រុមគ្រួសារលោក គឺមិនទាន់សមរម្យទេ។ លោក ចង់ឲ្យមានការសងសំណងសមរម្យ តែលោក ពុំបានបញ្ជាក់ឡើងថា ក្រុមគ្រួសារលោក ចង់បានសំណងប៉ុន្មាន។ លោក លើកឡើងថា៖«ឮគេថា ៤ពាន់៥រយដុល្លារហ្នឹង គ្រាន់តែជាការចូលបុណ្យទេ គេថា នឹងមានដំណោះស្រាយតាមក្រោយទៀត យើង មានតែចាំមើលតាមហ្នឹងសិន»។
ម្យ៉ាងទៀត លោក ម៉ម បានី ចង់ឲ្យមានការផ្តល់យុត្តិធម៌ជូនក្រុមគ្រួសារលោក ដោយចាត់ការតាមនីតិវិធីលើនគរបាល ដែលបានបង្កការផ្ទុះអាវុធបណ្តាលឲ្យកូនរបស់លោកស្លាប់។ តែលោក ប្រាប់ថា ក្រុមគ្រួសារលោក មិនចង់ដាក់បណ្តឹង [ផ្នែករដ្ឋប្បវេណី] ទៅតុលាការឡើយ ដ្បិតលោក យល់ថា ការប្តឹងផ្តល់តាមផ្លូវតុលាការ ធ្វើឲ្យអស់ថវិកា ខណៈក្រុមគ្រួសារលោក មិនសូវមានថវិកា៕