Europa ៖ Arsenal, Leicester និង Spurs បន្តឈ្នះ ឯ AC Milan ស្គាល់បរាជ័យលើកដំបូង

កីឡាអន្តរជាតិ

អន្តរជាតិ

Europa ៖ Arsenal, Leicester និង Spurs បន្តឈ្នះ ឯ AC Milan ស្គាល់បរាជ័យលើកដំបូង

06, Nov 2020 , 11:39 am

រូបភាព

ដោយ: ទេព ពិទូរ្យ

ក្រុមអង់គ្លេស Arsenal, Leicester City និង Tottenham Hotspur បានឡើងទៅឈរកំពូលតារាងរៀងៗខ្លួន ក្រោយពួកគេទទួលបានជ័យជម្នះក្នុងការប្រកួតក្របខណ្ឌ Europa League វគ្គសន្សំពិន្ទុ នៅរាត្រីថ្ងៃទី៥ ខែវិច្ឆិកា។ AC Milan រងបរាជ័យលើកដំបូងរដូវកាលនេះ បន្ទាប់ពីចាញ់ Lille ក្នុងផ្ទះខ្លួនឯងដល់ទៅ ៣-០។

Arsenal បានយកឈ្នះ Molde ក្នុងលទ្ធផល ៤-១ នាការប្រកួតពូល B នៅកីឡដ្ឋាន Emirates ដែលជាជ័យជម្នះលើកទី៣ក្នុងការប្រកួតក្របខណ្ឌទី២អឺរ៉ុបរដូវកាលនេះ។ ក្រុមកាំភ្លើងធំទទួលបាន៩ពិន្ទុពេញ ដោយឈរកំពូលតារាងពូល B ដោយនាំមុខ Molde ដែលនៅលេខ២ចំនួន ៣ពិន្ទុ។ ក្រុមលេខ៣ Rapid Wien រកបាន៣ពិន្ទុលើកដំបូងក្រោយឈ្នះក្រុមបាតតារាង Dundalk ៤-៣។

Leicester ក៏បានបន្តជ័យជម្នះរបស់ពួកគេផងដែរ តាមរយៈការយកឈ្នះ SC Braga ៤-០ នៅ King Power។ ក្រុមកញ្ជ្រោងស្ថិតនៅចំណាត់ថ្នាក់ទី១ពូល G ដោយរកបាន៩ពិន្ទុពីការប្រកួត៣លើក តាមពីក្រោយដោយ Braga ដែលមាន៦ពិន្ទុ។ AEK Athens ឡើងទៅលេខ៣ក្រោយរកបាន៣ពិន្ទុដំបូង បន្ទាប់ពីឈ្នះក្រុមបាតតារាង Zorya ៤-១។

Spurs បានឡើងទៅឈរកំពូលតារាងពូល J វិញ ក្រោយយកឈ្នះ Ludogorets Razgrad ៣-១។ ឆ្លងកាត់ការប្រកួត៣លើក មាន់ខ្នាយមាសឈ្នះពីរចាញ់មួយមាន៦ពិន្ទុ ស្មើគ្នាជាមួយក្រុម Royal Antwerp និង LASK ខណៈ Razgrad នៅបាតតារាងមានសូន្យពិន្ទុ។ Antwerp បានធ្លាក់ទីលេខពូល J វិញ ក្រោយចាញ់ LASK ១-០។

ដោយឡែកក្រុមអ៊ីតាលី AC Milan ឯណោះវិញ ទើបស្គាល់បរាជ័យលើកដំបូងគិតទាំងលីគក្នុងស្រុក និងក្របខណ្ឌអឺរ៉ុប ក្រោយចាញ់ក្រុមបារាំង Lille ៣-០ នៅ San Siro។ តាមរយៈបរាជ័យនេះបានធ្វើឲ្យ AC Milan ធ្លាក់ទៅលេខ២ក្នុងពូល H ដោយមាន៦ពិន្ទុ ខណៈ Lille ឡើងទៅកំពូលតារាងវិញដោយរកបាន៧ពិន្ទុពីការប្រកួត៣លើកដូចគ្នា។ Sparta Prague ដែលឈ្នះ Celtic ៤-១ នៅលេខរៀងទី៣ មាន៣ពិន្ទុ។

លទ្ធផលការប្រកួតវគ្គសន្សំពិន្ទុ Europa League ពីពូល A ដល់ L ៖

ពូល A
Roma ៥ – ០ CFR Cluj

Young Boys ៣ - ០ PFC CSKA-Sofia

ពូល B

Rapid Wien ៤ - ៣ Dundalk

Arsenal ៤ - ១ Molde

ពូល C

Hapoel Beer Sheva ២ – ៤ Bayer Leverkusen

Slavia Prague ៣ – ២ Nice

ពូល D

Benfica ៣ – ៣ Rangers

Lech Poznan ៣ – ១ Standard Liege