សង្គមអន្តរជាតិ
អន្តរជាតិ
គ្រូបង្វឹកស៊ុយអែតបដិសេធ Ibrahimovic ត្រឡប់ចូលជម្រើសជាតិវិញ
× ពាក្យចចាមអារ៉ាមក្នុងការវិលត្រឡប់របស់ Zlatan Ibrahimovic ទៅកាន់ក្រុមកីឡាបាល់ទាត់ជម្រើសជាតិស៊ុយអែតវិញត្រូវបានគ្រូបង្វឹកលោក Janne Andersson បដិសេធ។
Ibrahimovic ខ្សែប្រយុទ្ធក្រុម AC Milan បានបង្ហើបប្រាប់កាលពីដើមសប្តាហ៍នេះថា ខ្លួនបានត្រៀមខ្លួនរួចជាស្រេចហើយក្នុងការត្រឡប់ពីការចូលនិវត្តន៍ពីក្រុមជម្រើសជាតិដែលមានរយៈពេលជាង៤ឆ្នាំកន្លងមកនេះ។
មួយថ្ងៃបន្ទាប់ពីរកគ្រាប់បាល់ទី៨ ដោយជួយ AC Milan ឈ្នះ Udinese ២-១ ក្នុងក្របខណ្ឌ Serie A ខ្សែប្រយុទ្ធវ័យ៣៩ឆ្នាំរូបនេះ ក៏បានបង្ហោះរូបដែលរូបគេពាក់អាវរបស់ក្រុមជម្រើសជាតិស៊ុយអែតនៅលើបណ្តាញសង្គមហ្វេសប៊ុកផ្ទាល់របស់ខ្លួន។
Ibrahimovic បានដាក់ចំណងជើងរូបភាពនោះថា «ខានឃើញយូរហើយ»។ ការបង្ហោះរូបភាពដោយភ្ជាប់ពាក្យបែបនេះ ហាក់ដូចជាបង្ហាញថា អតីតកីឡាករ Manchester United, Barcelona, PSG រូបនេះនឹកនា និងចង់ត្រឡប់ទៅកាន់ក្រុមជម្រើសជាតិវិញ។
https://www.facebook.com/ZlatanIbrahimovic/posts/3726444414041599
យ៉ាងណាក៏ដោយ នៅក្នុងការប្រកាសសមាសភាពសមាជិកក្រុមស៊ុយអែតនៅថ្ងៃទី៥ ខែវិច្ឆិកា ដើម្បីត្រៀមប្រកួតពាន National League គ្រូបង្វឹកលោក Andersson បានបញ្ជាក់ច្បាស់ថា ទ្វារត្រូវបានបិទហើយសម្រាប់ការវិលត្រឡប់របស់អតីតប្រធានក្រុមរូបនេះ។
លោក Andersson បានប្រាប់កាសែតស៊ុយអែត Aftonbladet ថា៖ «មានអ្នកខ្លះ បាននិយាយថាមានអ្វីនៅពីក្រោយការបង្ហោះរូបថតនោះ។ ប៉ុន្តែខ្ញុំមិនយល់ពីអត្ថន័យរបស់វាទេ។ ខ្ញុំមិនចង់បន្ថែមកម្លាំងច្រើនពេកទេ។ រយៈពេល៤ឆ្នាំកន្លះចាប់តាំងពីគាត់បាននិយាយថាគាត់បញ្ចប់អាជីពឲ្យក្រុមជម្រើសជាតិ ហើយខ្ញុំគោរពគាត់បំផុតដូចជាកីឡាករដទៃទៀតដែលបានសម្រេចចិត្តដូចគ្នា»។
ស៊ុយអែត នឹងត្រូវទទួលក្រុមក្រូអាស៊ីក្នុងការប្រកួត National League នៅថ្ងៃទី១៥ ខែវិច្ឆិកា មុនធ្វើដំណើរទៅប៉ះបារាំងនៅ៣ថ្ងៃបន្ទាប់៕
Tag:
Zlatan Ibrahimovic
Janne Andersson
© រក្សាសិទ្ធិដោយ thmeythmey.com