ជាតិ
រយៈពេល ៩ខែ កម្ពុជារកចំណូលពីសហគមន៍ទេសចរណ៍បានជាង ២៥លានដុល្លារ
× ការផ្ដល់សេវាកម្មទេសចរណ៍ ក្នុងតំបន់ការពារធម្មជាតិមិនត្រឹមតែជួយការពារធនធានធម្មជាតិ ថែមទាំងជាផ្នែកមួយ រកចំណូលបានរាប់លានដុល្លារជួយដល់សេដ្ឋកិច្ចជាតិ។ ការផ្ដល់សេវាកម្មទេសចរណ៍ ក្នុងតំបន់ការពារធម្មជាតិ ១២កន្លែង ក្នុងរយៈពេល៩ខែនេះ ប៉ាន់ស្មានថាបានចាក់បញ្ចូលថវិកាជាង ២៥លានដុល្លារ ដល់សេដ្ឋកិច្ចមូលដ្ឋាន។ នេះបើតាមលោក នេត្រ ភក្ត្រា រដ្ឋលេខាធិការក្រសួងបរិស្ថាន។
រយៈពេល៩ខែ នៃឆ្នាំ២០២០ ទេសចរជាង ៥៣,៦ម៉ឺននាក់ បានដើរកម្សាន្តនៅតាមសហគមន៍ទេសចរណ៍ធម្មជាតិចំនួន២២ ដោយក្នុងនោះមានទេសចរជាតិជិត ៥៣ម៉ឺននាក់ និងទេសចរអន្តរជាតិជាង ៧ពាន់នាក់។ ការផ្តល់សេវាកម្មទេសចរណ៍ក្នុងសហគមន៍ទេសចរណ៍ធម្មជាតិ ដល់ទេសចរក្នុងចំនួននេះ បានរកថវិកាចំនួន ២៥.២១លានដុល្លារ ចាក់ចូលក្នុងសេដ្ឋកិច្ចមូលដ្ឋាន។ នេះជាការលើកឡើងរបស់លោក នេត្រ ភក្ត្រា នៅថ្ងៃទី៥ ខែវិច្ឆិកា ឆ្នាំ២០២០។
រូបភាពដោយលោក ឈន សុផាត
លោក នេត្រ ភក្ត្រា បានបន្តថា ដើម្បីអភិរក្ស ក៏ដូចជាអភិវឌ្ឍតំបន់ការពារធម្មជាតិ គឺតម្រូវឲ្យមានការជួយដល់ប្រជាជនក្នុងតំបន់ការពារធម្មជាតិឲ្យមានជីវភាពប្រសើរឡើង ដោយមានការបង្កើតមុខរបរថ្មី ជម្រើសនៃការរកប្រាក់ចំណូល ក្រៅពីការពឹងផ្អែកលើទិន្នផលរបស់ព្រៃឈើ។ លើសពីនេះ តម្រូវឲ្យមានការអប់រំ ណែនាំប្រជាសហគមន៍ឲ្យបានយល់ដឹងពីគុណសម្បត្តិនៃធនធានធម្មជាតិ ជៀសវាង ការកាប់បំផ្លាញព្រៃឈើ ដោយខុសច្បាប់។
រដ្ឋលេខាធិការក្រសួងបរិស្ថាន បានបញ្ជាក់ដូច្នេះថា៖ « រាជរដ្ឋាភិបាលកម្ពុជាមាន គោលនយោបាយប្រែក្លាយទីតាំងមួយចំនួនក្នុងតំបន់ការពារធម្មជាតិខ្លះ ដែលមានសក្តានុពលទេសចរណ៍ទៅជាតំបន់ទេសចរណ៍ធម្មជាតិដើម្បីបង្កើនសេដ្ឋកិច្ចសម្រាប់សហគមន៍មូលដ្ឋាន ចូលរួមអភិវឌ្ឍ និងធ្វើឱ្យមានកំណើន សេដ្ឋកិច្ចជាតិ ហើយចូលរួមពង្រឹងប្រសិទ្ធភាពអភិរក្សធនធានធម្មជាតិនិង ជីវៈចម្រុះ » ។
សហគមន៍ទេសចរណ៍ធម្មជាតិ បច្ចុប្បន្នមានចំនួន ២២ គ្របដណ្តប់លើផ្ទៃដីទំហំ ៣៥ ០០៣ ហិកតាក្នុងតំបន់ការពារធម្មជាតិចំនួន ១២ ស្ថិតក្នុងភូមិសាស្ត្រខេត្តចំនួន ៨ រួមមាន រតនគិរី កំពង់ស្ពឹ កោះកុង ពោធិ៍សាត់ ព្រះវិហារ កំពង់ធំ កំពត កំពង់ឆ្នាំង។ នេះបើតាមការឲ្យដឹងពីលោក នេត្រ ភក្ត្រា៕
រូបភាពដោយលោក ឈន សុផាត
Tag:
សហគមន៍ទេសចរណ៍
ThmeyThmey25
© រក្សាសិទ្ធិដោយ thmeythmey.com