អន្តរជាតិ
អនាគតអនុប្រធានាធិបតីស្ត្រីដំបូងរបស់អាមេរិក កាម៉ាឡា ហារីស មានប្រវត្តិបែបណា?
សមាជិកព្រឹទ្ធសភារដ្ឋ California អ្នកស្រី កាម៉ាឡា ហារីស (Kamala Harris)
×![]()
សមាជិកព្រឹទ្ធសភារដ្ឋ California អ្នកស្រី កាម៉ាឡា ហារីស (Kamala Harris) នឹងក្លាយជាស្ត្រីដំបូងគេ, ជនជាតិស្បែកខ្មៅទីមួយ និងអាមេរិកកាត់អាស៊ី (ឥណ្ឌា) ទីមួយ ដែលជាប់ឆ្នោតឡើងធ្វើជាអនុប្រធានាធិបតីអាមេរិក។ មុនឈានដល់ដំណាក់កាលនេះ តើអ្នកស្រីឆ្លងកាត់ការអប់រំដល់កម្រិតណា និងមានបទពិសោធការងារអ្វីខ្លះ?
កើតនៅថ្ងៃទី ២០ ខែតុលា ឆ្នាំ១៩៦៤ ក្នុងទីក្រុង Oakland រដ្ឋ California ឪពុករបស់អ្នកស្រី ហារីស ដែលជាជនជាតិហ្សាម៉ាអ៊ីក ជាគ្រូបង្រៀននៅសកលវិទ្យាល័យល្បីអាមេរិក Stanford។ ចំណែកម្ដាយអ្នកស្រី ដែលជាកូនស្រីអ្នកការទូតឥណ្ឌាម្នាក់ មានអាជីពជាអ្នកស្រាវជ្រាវជំងឺមហារីក។ អ្នកស្រី ហារីស មានប្អូនស្រីម្នាក់ ឈ្មោះថា ម៉ាយ៉ា (Maya) ដែលជាមេធាវី និងជាអ្នកផ្សព្ធផ្សាយគោលនយោបាយសាធារណៈ។
និយាយពីកម្រិតវប្បធម៌ ក្នុងឆ្នាំ១៩៨៦ យុវតី ហារីស បានបញ្ចប់បរិញ្ញាប័ត្រផ្នែកសេដ្ឋកិច្ចនិងវិទ្យាសាស្ត្រនយោបាយ នៅសកលវិទ្យាល័យ Howard ក្នុងរដ្ឋធានី វ៉ាស៊ីនតោន ដែលស្គាល់ទូទៅថាជាសកលវិទ្យាល័យសម្រាប់ពួកស្បែកខ្មៅ។ ៣ឆ្នាំបន្ទាប់ អ្នកស្រីបន្តយកសញ្ញាប័ត្រផ្នែកច្បាប់មួយទៀតពីសកលវិទ្យាល័យ California ។
រូបថតអ្នកស្រី កាម៉ាឡា ហារីស កាលរៀននៅសកលវិទ្យាល័យ Howard
ក្រោយរៀនច្បាប់ចប់រួច អ្នកស្រី ហារីស បានចូលធ្វើជាអនុប្រធានរដ្ឋអាជ្ញាតំបន់មួយក្នុងទីក្រុង Oakland រដ្ឋ California ចាប់ពីឆ្នាំ១៩៩០ដល់ឆ្នាំ១៩៩៨ ។ អ្នកស្រីល្បីថាម៉ឺងម៉ាត់ខ្លាំង នៅពេលកាត់ក្តីសំណុំរឿងរសើបៗ ដូចជា អំពើហិង្សាពួកពាល ការជួញដូរគ្រឿងញៀន និងការរំលោភបំពានផ្លូវភេទជាដើម។
ជាមួយកេរ្តិ៍ឈ្មោះកាន់តែល្បី អ្នកស្រីត្រូវបានដំឡើងឋានៈមួយកម្រិតទៀត ដោយក្លាយជាប្រធានរដ្ឋអាជ្ញាតំបន់ក្នុងឆ្នាំ២០០៤។ ៦ឆ្នាំក្រោយ អ្នកស្រី ហារីស ត្រូវបានបោះឆ្នោតឲ្យឡើងធ្វើជាអគ្គរដ្ឋអាជ្ញាប្រចាំរដ្ឋ California ហើយក្លាយជាស្ត្រីដំបូង ក៏ដូចជាជនជាតិអាមេរិកកាត់អាស៊ីទីមួយ ដែលកាន់តំណែងខ្ពស់បែបនេះ។ ក្រោយចូលកាន់តំណែងនេះ អ្នកស្រី ប្រកាសជំហរឯករាជ្យ ហើយបដិសេធសម្ពាធនយោបាយដែលព្យាយាមដាក់លើអ្នកស្រី។
នៅដើមឆ្នាំ២០១៥ អ្នកស្រី ហារីស បានប្រកាសឈរឈ្មោះជាបេក្ខជនព្រឹទ្ធសភាតំណាងរដ្ឋ California។ អំឡុងឃោសនារកសំឡេងឆ្នោត អ្នកស្រីបានទាមទារកែទម្រង់ប្រព័ន្ធយុត្តិធម៌ និងគោលនយោបាយអន្តោប្រវេសន៍, បង្កើនប្រាក់ឈ្នូលអប្បបរមា និងកិច្ចការពារលើសិទ្ធិបន្តពូជ ។ អ្នកស្រី ហារីស បានឈ្នះការបោះឆ្នោតឆ្នាំ២០១៦ ដោយស្រួល។
អ្នកស្រី ហារីស ពេលស្បថចូលកាន់តំណែងជាសមាជិកព្រឹទ្ធសភាអាមេរិករដ្ឋ California មកពីបក្សប្រជាធិបតេយ្យ
ក្រោយចូលកាន់តំណែងនេះក្នុងខែមករា ឆ្នាំ២០១៧ អ្នកស្រី បានចូលបម្រើការក្នុងគណៈកម្មាធិការនីតិកម្ម (Judiciary Committee) របស់ព្រឹទ្ធសភាអាមេរិក។ ៥ខែក្រោយធ្វើការងារនេះ អ្នកស្រីបានទាញចំណាប់អារម្មណ៍ពីសំណាក់ប្រព័ន្ធផ្សព្វផ្សាយអាមេរិក និងពលរដ្ឋអាមេរិកទូទៅ ក្រោយបើកការសាកសួរចម្លើយលោក Jeff Sessions រដ្ឋមន្ត្រីយុត្តិធម៌អាមេរិក ពាក់ព័ន្ធសំណុំរឿងជ្រៀតជ្រែកការបោះឆ្នោតអាមេរិកពីសំណាក់រុស្ស៊ីក្នុងឆ្នាំ២០១៦។ កាលនោះអ្នកស្រីថែមទាំងបានទាមទារឲ្យលោក Sessions ចុះចេញពីតំណែងទៀតផង។
ទោះអាណត្តិជាសមាជិកព្រឹទ្ធសភាមានរយៈពេលខ្លីមែន អ្នកស្រី ជាអ្នកជំរុញការធ្វើកំណែទម្រង់ប្រព័ន្ធសុខាភិបាលអាមេរិក ការផ្ដល់សញ្ជាតិឲ្យពួកអន្តោប្រវេសន៍ខុសច្បាប់ កំណែទម្រង់ពន្ធដារ និងការហាមឃាត់ការប្រើអាវុធជាដើម។
មហិច្ឆតាមានកាន់តែធំឡើងសម្រាប់ស្ត្រីស្បែកខ្មៅកាត់ឥណ្ឌារូបនេះ។ នៅដើមឆ្នាំ២០១៩ អ្នកស្រី ហារីស បានប្រកាសឈរឈ្មោះប្រជែងតំណែងប្រធានាធិបតីតំណាងបក្សប្រជាធិបតេយ្យក្នុងការបោះឆ្នោតឆ្នាំ២០២០។ ពីដំបូងឡើយ អ្នកស្រី ត្រូវបានមើលឃើញថាជាគូប្រជែងនាំមុខម្នាក់ក្នុងជួរបក្សប្រជាធិបតេយ្យ ពោលគឺនៅពេលអ្នកស្រីប៉ះសម្តីគ្នាជាមួយលោក ចូ បៃឌិន អំឡុងការជជែកដេញដោលបឋមមួយ។
អ្នកស្រី ហារីស ប៉ះសម្តីជាមួយលោក បៃឌិន អំឡុងការជជែកដេញដោលក្នុងជួរបក្សប្រជាធិបតេយ្យ
ថ្វីបើមានការចាប់ផ្ដើមល្អក្តី ក្រុមឃោសនាអ្នកស្រីជួបបញ្ហាធ្ងន់ធ្ងរក្នុងខែកញ្ញាឆ្នាំ២០១៩ ក្រោយការស្ទង់មតិជាបន្តបន្ទាប់បង្ហាញថា អ្នកស្រីធ្លាក់ប្រជាប្រិយភាពខ្លាំង។ ទីបំផុត ក្នុងខែធ្នូ អ្នកស្រីបានប្រកាសដកខ្លួនចេញពីប្រណាំងប្រជែងកៅអីបេក្ខជនតំណាងបក្សប្រជាធិបតេយ្យ។
ទោះដកខ្លួនក៏ពិតមែន អ្នកស្រី នៅបន្តចេញមុខចេញមាត់ខ្លាំងទាមទារធ្វើកំណែទម្រង់យុត្តិធម៌សង្គម បន្ទាប់ពីការស្លាប់លោក George Floyd បុរសស្បែកខ្មៅ ក្រោមដៃប៉ូលិសក្នុងពេលស៊ើបសួរ។ ដោយមើលឃើញថា អយុត្តិធម៌សង្គមផ្នែកពូជសាសន៍និងពណ៌សម្បុរ ក្លាយជាប្រធានចម្បងក្នុងសហរដ្ឋអាមេរិក ខាងបក្សប្រជាធិបតេយ្យភាគច្រើន បានស្នើឲ្យលោក បៃឌិន ជ្រើសរើសស្ត្រីស្បែកខ្មៅ ធ្វើជាបេក្ខជនអនុប្រធានាធិបតីរបស់លោក។
ដូចការរំពឹងទុក ក្នុងខែសីហា ឆ្នាំ២០២០ លោក ចូ បៃឌិន រើសយកអ្នកស្រី ហារីស។ ទោះសន្លឹកឆ្នោតក្នុងបោះឆ្នោតអាមេរិកមិនទាន់រាប់អស់ក្តី លោក ចូ បៃឌិន និងអ្នកស្រី ហារីស មានសំឡេងគ្រប់គ្រាន់ទៅហើយ។ បើគ្មានអ្វីប្រែប្រួល អ្នកស្រី នឹងក្លាយជាស្ត្រីស្បែកខ្មៅដំបូងដែលជាប់ឆ្នោតក្លាយជាអនុប្រធានាធិបតីអាមេរិកដែរ។
ជាវិភាគទានសម្រាប់វិស័យអប់រំ អ្នកស្រី ហារីស បានសរសេរសៀវភៅ៣ចំណងជើង រួមមាន Smart on Crime បោះពុម្ពឆ្នាំ២០០៩, The Truths We Hold បោះពុម្ពឆ្នាំ២០១៩ និង Superheroes Are Everywhere ជាសៀវភៅកូនក្មេង បោះពុម្ពដើមឆ្នាំ២០១៩៕
លោក ចូ បៃឌិន និងអ្នកស្រី កាម៉ាឡា ហារីស ក្រោយប្រកាសថាឈ្នះការបោះឆ្នោតឆ្នាំ២០២០
Tag:
សហរដ្ឋអាមេរិក
កាម៉ាឡា ហារីស
ចូ បៃឌិន
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
