អន្តរជាតិ
មិនត្រឹមមិនទាន់ទទួលស្គាល់លទ្ធផលបោះឆ្នោត លោក ត្រាំ ក៏រាំងខ្ទប់ការផ្ទេរអំណាចដែរ
លោកប្រធានាធិបតីត្រាំ ក្នុងសុន្ទរកថាក្រោយការបោះឆ្នោត។ រូបភាព៖ AFP
×![]()
ការផ្ទេរតំណែងប្រធានាធិបតីអាមេរិក កំពុងជួបបញ្ហារង្គោះរង្គើ ក្រោយពេលលោកប្រធានាធិបតី ដូណាល់ ត្រាំ អនុញ្ញាតឲ្យរដ្ឋមន្ត្រីយុត្តិធម៌ស៊ើបអង្កេតលើការបន្លំសន្លឹកឆ្នោត បណ្តេញរដ្ឋមន្ត្រីការពារជាតិចេញពីតំណែង និងជាពិសេសរារាំងមិនឲ្យមន្ត្រីរដ្ឋាភិបាលសហការជាមួយក្រុមការងាររបស់ប្រធានាធិបតីជាប់ឆ្នោត លោក ចូ បៃឌិន ។
ដោយមិនព្រមទទួលស្គាល់លទ្ធផលបោះឆ្នោត លោក ដូណាល់ ត្រាំ បានអនុញ្ញាតឲ្យរដ្ឋមន្ត្រីយុត្តិធម៌ លោកWilliam Barr បើកការស៊ើបអង្កេតលើការសង្ស័យបន្លំសន្លឹកឆ្នោត ទាំងមិនមែនភស្តុតាងរឹងមាំផង។ បន្ថែមពីនេះ មេដឹកនាំព្រឹទ្ធសភាបក្សសាធារណៈរដ្ឋ លោកMitch McConnell ថែមទាំងចេញការពារលោកត្រាំ ដោយអះអាងថា លោកប្រធានាធិបតីត្រាំមានសិទ្ធិ១០០ភាគរយ ក្នុងការពិនិត្យទៅលើការសង្ស័យនៃភាពមិនប្រក្រតីនៃការបោះឆ្នោត និងលើកឡើងពីជម្រើសផ្លូវច្បាប់ដែលមាន។
ស្របពេលជាមួយគ្នានេះ លោកបានចាប់ផ្តើមដកតំណែងមនុស្សក្នុងរដ្ឋបាលលោក ដែលលោកគិតថាមិនមានភក្តីភាពទៅនឹងរូបលោក។ ជាក់ស្តែងលោកបានដក លោក Mark Esper ចេញពីតំណែងរដ្ឋមន្ត្រីការពារជាតិ។ បើតាម AFP បុគ្គលសំខាន់ៗមួយចំនួនដូចជាលោក Christopher Wray នាយក FBI លោក Gina Haspel ប្រធានCIA និងលោកវេជ្ជបណ្ឌិត Anthony Fauci ដែលជាអ្នកជំនាញជំងឺឆ្លង និងទទួលបន្ទុកក្រុមការងារCOVID-19 ក៏ប្រឈមមុខការបណ្ដេញចេញ។
លើសពីនោះ សេវារដ្ឋបាលទូទៅ (GAS) ដែលទទួលបន្ទុកលើកិច្ចការផ្ទេរអំណាចឲ្យអ្នកជាប់ឆ្នោតថ្មី បានផ្អាកការចាប់ផ្តើមផ្ទេរតំណែងផ្លូវការ។ ការណ៍នេះ បានរារាំងមិនឲ្យក្រុមការងារលោក បៃឌិន អាចទាក់ទងនឹងភ្នាក់ងាររដ្ឋាភិបាលសហព័ន្ធបាន។ អ្នកនាំពាក្យអង្គភាពខាងលើ អះអាងថា ការផ្ទេរតំណែងនឹងត្រូវផ្អាករហូតដល់ពេលលោក ត្រាំ ព្រមចុះចាញ់ ឬប្រតិភូបោះឆ្នោតជួបគ្នានៅខែក្រោយ។
ខណៈរដ្ឋបាលលោក ត្រាំ មិនមានឆន្ទៈសហការជាមួយក្រុមការងារប្រធានាធិបតីជាប់ឆ្នោត ក៏មានអង្គភាពដទៃទៀតដែលកំពុងត្រៀមខ្លួនបំពេញការងារឲ្យលោក បៃឌិន ផងដែរ។ ជាក់ស្តែង ទីភ្នាក់ងារសម្ងាត់ និងអាជ្ញាធរអាកាសចរណ៍អាមេរិក បានពង្រីកការការពារទៅលើគេហដ្ឋានលោកបៃឌិននៅរដ្ឋDelaware រហូតដល់ថ្ងៃស្បថកាន់តំណែង។ បន្ថែមពីនេះ សុវត្ថិភាពរបស់លោក បៃឌិន ក៏ត្រូវពង្រឹងថែមទៀតក្រោមការការពាររបស់ភ្នាក់ងារសន្តិសុខប្រធានាធិបតីដែរ។
ដោយលោកត្រាំមិនព្រមទទួលស្គាល់លទ្ធផលបោះឆ្នោត ក្រុមការងាររបស់លោកបៃឌិនវិញ បានលើកឡើងពីលទ្ធភាពក្នុងការប្តឹងសេវារដ្ឋបាលទូទៅ(GAS) ឲ្យទទួលស្គាល់លោក បៃឌិន ជាប្រធានាធិបតីជាប់ឆ្នោត ដើម្បីអាចបើកផ្លូវឲ្យក្រុមការងារអាចបំពេញការងារបាន។
ក្រុមការងារលោកបៃឌិន ត្រូវការការទទួលស្គាល់នេះ ដើម្បីអាចបើកប្រាក់ខែ ធ្វើការប្រឹក្សា និងដំណើរសំខាន់ៗផ្សេងទៀតក៏ដូចជាការទទួលបានព័ត៌មានសម្ងាត់ផងដែរ។ បន្ថែមពីនេះទៅទៀត ក្រុមការងារត្រូវការក្រសួងការបរទេសអាមេរិកក្នុងការសម្របសម្រួលទំនាក់ទំនងជាមួយថ្នាក់ដឹកនាំបរទេស៕
Tag:
អាមេរិក
© រក្សាសិទ្ធិដោយ thmeythmey.com
