COVID-19
អន្តរជាតិ
ម៉ុងហ្គោលី បិទរដ្ឋធានីអ៊ូឡង់បាទ័រ ក្រោយមានករណីឆ្លងកូវីដ-១៩ ជាសហគមន៍លើកដំបូង
បុគ្គលិកសុខាភិបាល និងប៉ូលិសម៉ុងហ្គោលី ពាក់សំលៀកបំពាក់ការងារ នៅរដ្ឋធានី អូឡង់បាទ័រ កាលពីខែឧសភា កន្លងទៅ ។ រូបភាព៖ AFP
×![]()
ក្រសួងសុខាភិបាលម៉ុងហ្គោលី បានរកឃើញករណីឆ្លងជាសហគមន៍លើកទីមួយនៅថ្ងៃទី ១១ ខែវិច្ឆិកា។ ជាការឆ្លើយតប អាជ្ញាធរម៉ុងហ្គោលីបានបញ្ជាឲ្យបិទរដ្ឋធានីអ៊ូឡង់បាទ័រដែលមានករណីឆ្លងទាំងស្រុងចំនួន៣ថ្ងៃដើម្បីទប់ស្កាត់ការរាលដាល។ 
ក្នុងសន្និសីទព័ត៌មានថ្ងៃទី១១ ខែវិច្ឆិកា រដ្ឋមន្ត្រីសុខាភិបាលម៉ុងហ្គោលី Munkhsaikhan Togtmol បញ្ជាក់ថា ស្ត្រីម្នាក់ដែលរស់នៅរដ្ឋធានីអ៊ូឡង់បាទ័រ បានឆ្លងពីប្ដីអ្នកស្រី ដែលជាអ្នកបើករថយន្តដឹកទំនិញពីប្រទេសរុស្ស៊ី។ បុរសរូបនេះបានតេស្តវិជ្ជមានកូវីដ-១៩ ក្រោយធ្វើចត្តាឡីស័កបាន២១ថ្ងៃ។
ជាមួយគ្នានេះ មនុស្ស២៤នាក់ផ្សេងទៀតដែលប៉ះពាល់ដោយផ្ទាល់ជាមួយប្ដីប្រពន្ធទាំងពីរនាក់នេះ ក៏ត្រូវធ្វើចត្តាឡីស័កផងដែរ។
តាមការចុះផ្សាយរបស់ទីភ្នាក់ងារព័ត៌មាន Reuters អាជ្ញាធរម៉ុងហ្គោលី បានដាក់ចេញបញ្ជាឲ្យបិទទីក្រុងអ៊ូឡង់បាទ័រ ដែលមានប្រជាជនរស់នៅជាង១,៥លាននាក់នេះរយៈពេល៣ថ្ងៃ ហើយសាលារៀនក៏ត្រូវបិទទ្វារផងដែរ។ ម្យ៉ាងទៀត ក្រសួងសុខាភិបាលម៉ុងហ្គោលី ក៏បានទទូចឲ្យអ្នកទៅលេងកម្មវិធីតន្ត្រីមួយ ដែលប្តីប្រពន្ធកើតកូវីដ-១៩ ទាំងពីរនាក់បានចូលរួមដែរនោះ នាំគ្នាទៅធ្វើតេស្តជំងឺកូវីដ-១៩ ដូចគ្នា។
រដ្ឋាភិបាល ម៉ុងហ្គោលី ទទួលបានការកោតសរសើរសម្រាប់វិធានការទប់ស្កាត់ជំងឺរាតត្បាតសកលកូវីដរបស់ពួកគេ។ ប្រទេសអាស៊ីបូព៌ានេះ បានបិទព្រំដែនភាគខាងត្បូងរបស់ខ្លួនជាមួយប្រទេសចិន ក្នុងចុងខែមករា ហើយបានប្រញាប់បិទសាលារៀន និងទីកន្លែងសាធារណៈដទៃទៀត។
អគ្គនាយកអង្គការសុខភាពពិភពលោក លោក Tedros Adhanom Ghebreyesus តាមរយៈTwitter កាលពីសប្ដាហ័៍មុន បានសរសើររដ្ឋាភិបាលម៉ុងហ្គោលីសម្រាប់បង្ហាញពិភពលោកថា ការអនុវត្តតាមការណែនាំសុខាភិបាល ពិតជាអាចទប់ស្កាត់ការរាលដាលជំងឺកូវីដ-19មែន។
គិតត្រឹមថ្ងៃទី ១១ ខែវិច្ឆិកា ម៉ុងហ្គោលី មានករណីឆ្លងសរុប ៣៧៦ករណី ខណៈគ្មានអ្នកស្លាប់ឡើយ៕
Tag:
ម៉ុងហ្គោលី
កូវីដ-១៩
© រក្សាសិទ្ធិដោយ thmeythmey.com
