ករណីធ្វើអត្តឃាតនៅជប៉ុន កើនឡើងក្នុងខែតុលា ហើយក្លាយជាតួលេខខ្ពស់បំផុតក្នុងពេលជាង៥ឆ្នាំចុងក្រោយ។ ទិន្នន័យរបស់រដ្ឋាភិបាលជប៉ុន បង្ហាញបែបនេះនៅថ្ងៃទី ១០ ខែវិច្ឆិកា ដែលជាការបន្តកើន៤ខែផ្ទួនៗគ្នាតែម្ដង។ សម្រាប់និន្នាការនេះ ក្រុមសកម្មជននៅជប៉ុន បានទម្លាក់កំហុសលើផលប៉ះពាល់សេដ្ឋកិច្ចដែលបង្កឡើងដោយជំងឺកូវីដ-១៩ ជាពិសេសលើ ស្ត្រី តែម្ដងដែលរងផលប៉ះពាល់ខ្លាំងជាងគេ។
យោងតាមទិន្នន័យបឋមរបស់ប៉ូលិសជប៉ុន ករណីធ្វើអត្តឃាតសរុបក្នុងតុលាមានចំនួន ២១៥៣ករណី ដែលកើនឡើងជាង៣០០ករណី បើធៀបនឹងខែកញ្ញា ហើយក៏ជាតួលេខខ្ពស់បំផុតប្រចាំខែ ចាប់តាំងពីខែឧសភា ឆ្នាំ២០១៥មក។
ក្នុងចំណោមករណីអ្នកធ្វើអត្តឃាតក្នុងខែតុលា មនុស្សស្រីមាន៨៥១នាក់ ដែលហក់ឡើងជាង៨២ភាគរយ បើធៀបនឹងខែដូចគ្នាកាលពីឆ្នាំ២០១៩។ ចំណែកអត្រាអ្នកធ្វើអត្តឃាតបុរស កើន ២១,៣ភាគរយ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
នៅមុនខែកក្កដាឆ្នាំ២០២០ នេះ ករណីធ្វើអត្តឃាតនៅជប៉ុនបានធ្លាក់ចុះគួរឲ្យកត់សម្គាល់ តែក្រោយមកដោយសារផលប៉ះពាល់បង្កឡើងដោយការផ្ទុះរាលដាលជំងឺកូវីដ-១៩ ចំនួនអ្នកសម្លាប់ខ្លួនចាប់ផ្ដើមស្ទុះឡើងជាថ្មី។ ក្រុមសកម្មជនជប៉ុន ដែលធ្វើការលើបញ្ហានេះ អះអាងបែបនេះ។
ស្ត្រីជប៉ុន ដែលភាគច្រើនមានការងារមិនអចិន្ត្រៃយ៍ក្នុងឧស្សាហកម្មសេវាកម្ម ឬលក់រាយ ទទួលរងផលប៉ះពាល់ធ្ងន់ធ្ងរដោយសារបាត់បង់ការងារធ្វើ អំឡុងពេលវិបត្តិកូវីដ-១៩នេះ ដ្បិតរដ្ឋាភិបាលដាក់ចេញចំណាត់ការបិទប្រទេសទប់ស្កាត់ការផ្ទុះរាលដាល។
ជាយូរមកហើយក្នុងសង្គមជប៉ុន ការធ្វើអត្តឃាត ត្រូវបានមើលឃើញថាជាវិធីសាស្ត្រមួយដើម្បីបញ្ចៀសភាពអាម៉ាស់ ឬការបាត់បង់កិត្តិយស។ ម្យ៉ាង ការស្វែងរកការប្រឹក្សាផ្លូវចិត្ត មិនត្រូវបានឲ្យតម្លៃគ្រប់គ្រាន់ឡើយ ដូច្នេះទើបជប៉ុនមានអត្រាធ្វើអត្តឃាតខ្ពស់បំផុតក្នុងចំណោមក្រុមប្រទេសមានកំណើនសេដ្ឋកិច្ចជៀនលឿន G-7 ។
ក៏ប៉ុន្តែនៅពេលការធ្វើអត្តឃាតកើនដល់ចំណុចកំពូល ក្នុងឆ្នាំ២០០៣ ដែលមានរហូតដល់ ៣៤ ៤២៧ករណីនោះ ក្រុមអ្នកតាក់តែងគោលនយោបាយជប៉ុន បានភ្ញាក់ខ្លួន ហើយបានបង្កើតកម្មវិធីបង្ការការធ្វើអត្តឃាតមួយ ក្នុងឆ្នាំ២០០៧។
តាមរយៈកិច្ចប្រឹងប្រែងរបស់រដ្ឋាភិបាលក្នុងការកាត់បន្ថយម៉ោងការងារថែម និងបង្កើតភាពងាយស្រួលក្នុងការទទួលការការប្រឹក្សាផ្នែកផ្លូវចិត្ត គួបផ្សំនឹងដៃគូពាក់ព័ន្ធក្នុងការកំណត់អត្តសញ្ញាណក្រុមអ្នកងាយរងគ្រោះ ករណីធ្វើអត្តឃាតនៅជប៉ុន ថយចុះមកត្រឹម ២ម៉ឺនករណីប៉ុណ្ណោះ ក្នុងឆ្នាំ២០១៩៕