ជាតិ
សង្គមជាតិ
សិស្ស និងមន្ត្រីអង្គភាព១៩កន្លែង មានប្រាស្រ័យទាក់ទងនឹងរដ្ឋមន្ត្រីការបរទេសហុងគ្រី
លោក ហង់ជួន ណារ៉ុន រដ្ឋមន្ត្រីអប់រំ យុវជន និងកីឡា
×![]()
ភ្នំពេញ៖ គិតត្រឹមថ្ងៃទី១០ ខែវិច្ឆិកា ក្រសួងអប់រំបានរកឃើញសិស្សនៅសាលារៀនឯកជន និងឯកជន និងមន្ត្រីអង្គភាព ១៩កន្លែង មានប្រាស្រ័យទាក់ទងនឹងលោក Peter Szijjarto រដ្ឋមន្ត្រីការបរទេស និងពាណិជ្ជកម្មហុងគ្រី កាលពីថ្ងៃទី៣ ខែវិច្ឆិកា។ នេះបើតាមលោក រស់ សុវាចា អ្នកនាំពាក្យក្រសួងអប់រំ ដែលបានបញ្ជាក់មកអ្នកសារព័ត៌មានថ្មីៗតាមតេឡេក្រាម។ 
លោក រស់ សុវាចា បានបញ្ជាក់ថា គ្រឹះស្ថានសិក្សាឯកជនចំនួន១០ និងគ្រឹះស្ថានសិក្សារដ្ឋចំនួន៦ ដែលមានសិស្សានុសិស្ស រួមទាំងឪពុកម្ដាយមួយចំនួន បានប្រាស្រ័យទាក់ទងនឹងលោករដ្ឋមន្ត្រីការបរទេសហុងគ្រីនោះ ត្រូវបានក្រសួងអប់រំផ្អាកឲ្យសិក្សាចំនួន២សប្តាហ៍ ដោយបន្តរៀនតាមអនឡាញវិញ។
ចំពោះមន្ទីរអប់រំ យុវជន និងកីឡាខេត្តចំនួន២ ត្រូវបានផ្អាកដំណើរការ និងណែនាំឲ្យអនុវត្តតាមវិធានការក្រសួងសុខាភិបាល។ មន្ទីរអប់រំខេត្តទាំងពីរនេះ មានបុគ្គលិកចំនួន២៣នាក់ បានទទួលទានអាហារ ជាមួយនឹងបុគ្គលដែលបានប៉ះពាល់ជាមួយរដ្ឋមន្ត្រីការបរទេសហុងគ្រី។ សម្រាប់មន្ទីរអប់រំខេត្តមួយទៀត មានសមាជិខ្លះ បានចូលរួមប្រជុំជាមួយអ្នកប៉ះពាល់រដ្ឋមន្ត្រីការបរទេសហុងគ្រី។
ចំណែកក្លឹបហាត់កីឡាការ៉ាតេចំនួន១កន្លែងនៅពហុកីឡដ្ឋានជាតិអូឡាំពិកដែលមានអ្នកប៉ះពាល់ផ្ទាល់ជាមួយនឹងលោករដ្ឋមន្ត្រីហុងគ្រី ក៏ត្រូវបានក្រសួងផ្អាកឲ្យដំណើរការមួយរយៈផងដែរ ដើម្បីទប់ស្កាត់កុំឲ្យរាតត្បាតជំងឺកូវីដ-១៩។ នេះបើតាមលោក រស់ សុវាចា ។
ដើម្បីទប់ស្កាត់កុំឲ្យជំងឺកូវីដ-១៩រាតត្បាត ក្រសួងអប់រំ បានបិទដំណើរការកីឡដ្ឋានជាតិអូឡាំពិកបណ្តោះអាសន្ន និងបិទសាលារៀននៅរាជធានីភ្នំពេញ និងខេត្តកណ្តាលរយៈពេល២សប្តាហ៍ ដោយពួកគេត្រូវបន្តរៀនតាមអនឡាញវិញ។
ក្រសួងអប់រំបានណែនាំឲ្យ សិស្សានុសិស្ស និងឪពុកម្តាយ ឬអាណាព្យាបាលសិស្សដែលបានប្រាស្រ័យទាក់ទឹងនឹងលោករដ្ឋមន្ត្រីការបរទេសហុងគ្រី បន្តអនុវត្តតាមការណែនាំរបស់ក្រសួងសុខាភិបាល។ ក្រសួងអប់រំក៏ណែនាំឲ្យអ្នកដែលជាប់ពាក់ព័ន្ធនឹងលោករដ្ឋមន្ត្រីការបរទេសហុងគ្រី បន្តរាយការណ៍មកក្រសួងអប់រំផងដែរ (លេខទូរសព្ទ ០១២ ៣៣៥ ៩៩៩)។
បច្ចុប្បន្នកម្ពុជាមានអ្នកឆ្លងជំងឺកូវីដ-១៩ ចំនួន៣០១នាក់ហើយ ដោយក្នុងនោះមានចំនួន៤នាក់ដែលបានឆ្លងជំងឺកូវីដ-១៩ពីលោក Peter Szijjarto រដ្ឋមន្ត្រីការបរទេសហុងគ្រី គឺមានអង្គរក្សខ្មែរម្នាក់ដែលការពារលោករដ្ឋមន្ត្រីការបរទេសហុងគ្រី លោក សួស យ៉ារ៉ា តំណាងរាស្ត្រ លោក ស ចិត្រា អគ្គលេខាធិការក្រសួងកសិកម្ម និងលោកឯកអគ្គរដ្ឋទូតហុងគ្រី។ ចំណែកអ្នកដែលពាក់ព័ន្ធសរុបទាំងអស់ចំនួន១៤៨១នាក់ ក៏បានធ្វើតេស្តជាលើកទី២ ដោយលទ្ធផលគឺអវិជ្ជមានទាំងអស់។
តែយ៉ាងណាអ្នកពាក់ព័ន្ធទាំងអស់នោះក៏ត្រូវបន្តអនុវត្តតាមគោលការណ៍ណែនាំរបស់ក្រសួងសុខាភិបាល និងបន្តធ្វើតេស្តជាលើកទី៣ នៅថ្ងៃទី១៤ ខែវិច្ឆិកា និងតេស្តលើកទី៤ នៅថ្ងៃទី១៨ ខែវិច្ឆិកា៕
Tag:
សាលារៀន
© រក្សាសិទ្ធិដោយ thmeythmey.com
