រក្សាគម្លាតសុវត្ថិភាព និងកាត់បន្ថយការជួបជុំ ដើម្បីបង្ការកូវីដ-១៩ ចូលក្នុងសហគមន៍

COVID-19

ជាតិ

រក្សាគម្លាតសុវត្ថិភាព និងកាត់បន្ថយការជួបជុំ ដើម្បីបង្ការកូវីដ-១៩ ចូលក្នុងសហគមន៍

12, Nov 2020 , 7:59 am

រូបភាព

គម្លាតសុវត្ថភាព

ដោយ: ឡាយ សុភាវតី

ភ្នំពេញ៖ ក្រសួងសុខាភិបាលបានណែនាំឲ្យសាធារណជនទាំងអស់ រក្សាគម្លាតសុវត្ថិភាព និងកាត់បន្ថយការជួបជុំ ដើម្បីបង្ការការឆ្លងរីករាលដាលនៃវីរុសកូវីដ-១៩ ក្នុងសហគមន៍។ ក្រសួងស្នើឲ្យពលរដ្ឋទាំងអស់ អនុវត្តវិធានការអនាម័យស្អាត លាងដៃ ពាក់ម៉ាស់ ក្នុងការរស់នៅឲ្យបានខ្ជាប់ខ្ជួនផងដែរ។

ក្រសួងសុខាភិបាល បានបញ្ជាក់ក្នុងសេចក្ដីណែនាំចុះថ្ងៃទី១០វិច្ឆិកាថា សាធារណជនទាំងអស់ត្រូវរក្សាគម្លាតសុវត្ថិភាពបុគ្គលពីម្នាក់ទៅម្នាក់ ខណៈដែលអង្គុយនិងឈរ យ៉ាងតិច១,៥ម៉ែត្រឡើងទៅ។ បុគ្គលទាំងអស់ត្រូវជៀសវាងការឱប ថើប ចាប់ដៃ ដោយជំនួសមកអនុវត្តជាការសំពះ លើកដៃជាសញ្ញាឬងក់ក្បាលវិញ។ ចំណែកការប្រជុំ បណ្ដុះបណ្ដាល និងសិក្ខាសាលា ត្រូវធ្វើតាមប្រព័ន្ធអនឡាញ។ ប៉ុន្តែបើករណីចាំបាច់ត្រូវរៀបចំឲ្យមានកន្លែងធំទូលាយ រក្សាគម្លាត១,៥ម៉ែត្រ ពាក់ម៉ាស់ រួមទាំអវាស់កម្ដៅផងដែរ។

រីឯ ការរក្សាគម្លាតសុវត្ថិភាពសង្គម គឺត្រូវកាត់បន្ថយការជួបជុំគ្នាក្នុងសង្គមដែលមានមនុស្សច្រើន ដូចជា កម្មវិធីអាពាហ៍ពិពាហ៍ បុណ្យជាតិ សាសនា ការប្រគុំតន្ត្រីជាដើម។ ជាមួយគ្នាដែរ ត្រូវជៀសវាងការហាត់ប្រាណជាក្រុមនៅតាមក្លឹប និងការប្រមូលផ្ដុំគ្នានៅកន្លែងបិទជិត។ ក្រៅពីនេះ អ្នកដែលមានហានិភ័យនៃការចម្លងជំងឺ ដូចជាចាស់ជរា អ្នកមានជំងឺប្រចាំកាយ ស្រី្តមានផ្ទៃពោះ និងកុមារតូចៗជាដើម មិនត្រូវចូលរួមការជួបជុំឡើយ ប្រសិនបើមិនចាំបាច់។ នេះជាការបញ្ជាក់របស់ក្រសួង។

គិតត្រឹមថ្ងៃទី១១វិច្ឆិកា កម្ពុជារកឃើញអ្នកឆ្លងកូវីដ-១៩ ចំនួន៣០១នាក់។ ក្នុងនោះមាន ២៨៨នាក់ បានជាសះស្បើយ និង១៣នាក់ទៀត កំពុងព្យាបាលនៅមន្ទីរពេទ្យ៕