ជាតិ
សង្គមជាតិ
រដ្ឋមន្ត្រីអប់រំអំពាវនាវឲ្យគ្រឹះស្ថានសិក្សាដែលពាក់ព័ន្ធព្រឹត្តិការណ៍ ៣ វិច្ឆិកា រាយការណ៍ទៅក្រសួង
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា
×![]()
ភ្នំពេញ៖ក្រសួងអប់រំបានណែនាំដល់គ្រឹះស្ថានសិក្សាដែលបានពាក់ព័ន្ធនឹងលោក Peter Szijjarto រដ្ឋមន្ត្រីការបរទេសហុងគ្រីដោយមិនទាន់ផ្តល់ព័ត៌មានដល់ក្រសួង បន្តរាយការណ៍មកក្រសួងដើម្បីទប់ស្កាត់កុំឲ្យជំងឺកូវីដ-១៩រាតត្បាតចូលក្នុងសាលា បើសិនជាបុគ្គលអ្នកពាក់ព័ន្ធណាម្នាក់ឆ្លងជំងឺកូវីដ-១៩ពីលោករដ្ឋមន្ត្រីការបរទេសហុងគ្រីពិតមែន។ 
គិតត្រឹមថ្ងៃទី១១ ខែវិច្ឆិកា ក្រសួងអប់រំ បានរកឃើញថាមានគ្រឹះស្ថានសិក្សាឯកជនចំនួន១០ និងសាលារដ្ឋ៦ មន្ទីរអប់រំខេត្ត២ និងកន្លែងហាត់កីឡាការ៉ាតេដូនៅពហុដ្ឋានកីឡដ្ឋានជាតិអូឡាំពិក ដែលបានជាប់ពាក់ព័ន្ធនឹងលោក Peter Szijjarto រដ្ឋមន្ត្រីការបរទេសហុងគ្រីកាលពីថ្ងៃទី៣ ខែវិច្ឆិកា។
លោក ហង់ជួន ណារ៉ុន រដ្ឋមន្ត្រីក្រសួងអប់រំ បានណែនាំឲ្យគណៈគ្រប់គ្រងគ្រឹះស្ថានសិក្សា និងបុគ្គលិកអប់រំដែលមានពាក់ព័ន្ធដោយផ្ទាល់ ឬប្រយោលជាមួយនឹងលោករដ្ឋមន្ត្រីការបរទេសហុងគ្រីកន្លងមក ឲ្យរាយការណ៍ទៅអាជ្ញាធរខេត្ត។
«គណៈគ្រប់គ្រងគ្រឹះស្ថានសិក្សាត្រូវស្នើសុំយោបល់ពីអាជ្ញាធរខេត្ត និងវាយតម្លៃលើលទ្ធភាពផ្អាកការសិក្សារយៈពេល១៤ថ្ងៃ និងត្រូវរាយការណ៍មកក្រសួង»។ នេះជាការលើកឡើងរបស់លោករដ្ឋមន្ត្រីអប់រំបាន ដោយផ្អាកការសិក្សាតាមថ្នាក់រៀនចំនួន១៤ថ្ងៃសម្រាប់គ្រឹះស្ថានសិក្សានៅរាជធានីភ្នំពេញ និងខេត្តកណ្តាល។ ក្រសួងតម្រូវឲ្យពួកគេត្រូវបន្តសិក្សាតាមអនឡាញវិញ។
ក្រសួងអប់រំណែនាំឲ្យគណៈគ្រប់គ្រងគ្រឹះស្ថានសិក្សាទាំងនោះ ត្រូវបូកសរុបរបាយការណ៍ស្តីពីចំនួនបុគ្គលិកអប់រំ ឬសិស្សានុសិស្សដែលសង្ស័យថាបានចូលរួមប្រជុំ ឬប្រាស្រ័យទាក់ទងនឹងគណៈប្រតិភូហុងគ្រី។
គិតត្រឹមថ្ងៃទី១១ ខែវិច្ឆិកានេះ ក្រសួងសុខាភិបាលបានរកឃើញ និងធ្វើតេស្តលើកទី២ចំពោះអ្នកដែលជាប់ពាក់ព័ន្ធនឹងព្រឹត្តិការណ៍៣វិច្ឆិកាសរុបចំនួន១៤៨១នាក់ ក្នុងនោះមាន ៤នាក់វិជ្ជមាន។ អ្នកទាំងនោះ មានដូចជាអង្គរក្សខ្មែរម្នាក់ដែលការពារលោករដ្ឋមន្ត្រីការបរទេសហុងគ្រី លោក សួស យ៉ារ៉ា តំណាងរាស្ត្រ លោក ស ចិត្រា អគ្គលេខាធិការរងក្រសួងកសិកម្ម និងលោកឯកអគ្គរដ្ឋទូតហុងគ្រី។ អ្នកឆ្លងទាំង៤នាក់នោះកំពុងសម្រាកព្យាបាលនៅមន្ទីរពេទ្យមិត្តភាពខ្មែរសូវៀត ហើយអ្នកអវិជ្ជមានក៏ត្រូវចាំបាច់ធ្វើចត្តាឡីស័ក និងតេស្តលើកទី៣ និងទី៤ផងដែរ៕
Tag:
សាលារៀន
© រក្សាសិទ្ធិដោយ thmeythmey.com
