មហាផ្ទៃឲ្យអភិបាលភ្នំពេញ និងកណ្តាល ផ្អាករៀបចំវេទកាពិគ្រោះយោបល់ និងកិច្ចប្រជុំ២សប្តាហ៍

ជាតិ

សង្គមជាតិ

មហាផ្ទៃឲ្យអភិបាលភ្នំពេញ និងកណ្តាល ផ្អាករៀបចំវេទកាពិគ្រោះយោបល់ និងកិច្ចប្រជុំ២សប្តាហ៍

11, Nov 2020 , 9:59 pm

រូបភាព

រូបភាពពីរដ្ឋបាលរាជធានីភ្នំពេញ

ដោយ:

ភ្នំពេញ៖ ក្រសួងមហាផ្ទៃបានក្រើនរំលឹកឲ្យអភិបាលរាជធានីភ្នំពេញ និងអភិបាលខេត្តកណ្តាល ផ្អាករៀបចំវេទិកាផ្សព្វផ្សាយ ពិគ្រោះយោបល់ និងកិច្ចប្រជុំដែលមានមនុស្សច្រើនចូលរួមរយៈពេល២សប្តាហ៍សិន ដើម្បីទប់ស្កាត់ការរាតត្បាតជំងឺកូវីដ-១៩ ខណៈខេត្តទាំងពីរនេះកំពុងមានហានិភ័យឆ្លងជំងឺកូវីដ-១៩ ចូលសហគមន៍ខ្ពស់ ក្រោយពីមានមនុស្សជាង១៤០០នាក់ដែលប្រាស្រ័យទាក់ទងផ្ទាល់ និងប្រយោលនឹងលោក Peter Szijjarto រដ្ឋមន្ត្រីការបរទេសហុងគ្រី។

លិខិតរបស់ក្រសួងមហាផ្ទៃដែលផ្ញើជូនអភិបាលរាជធានីភ្នំពេញ និងខេត្តកណ្តាលបានរៀបរាប់ដូច្នេះថា៖«ក្នុងអំឡុងពេលថ្មីៗកន្លងមកនេះ ស្ថានភាពនៃជំងឺកូវីដ-១៩ នៅក្នុងភូមិសាស្ត្រារាជធានីភ្នំពេញ និងខេត្តកណ្តាលមានហានិភ័យខ្ពស់ក្នុងការបន្តចម្លងទៅក្នុងសហគមន៍ មូលដ្ឋាន ដែលចាំបាច់ត្រូវបន្តប្រុងប្រយ័ត្នខ្ពស់ និងត្រូវយកចិត្តទុកដាក់ក្នុងការអនុវត្តវិធានការនានាដើម្បីទប់ស្កាត់ការរីករាលដាលនៃជំងឺកូវីដ-១៩របស់ក្រសួងសុខាភិបាលឲ្យបានហ្មត់ចត់»។

ដើម្បីបញ្ចៀសកុំឲ្យជំងឺកូវីដ-១៩ ឆ្លងចូលក្នុងសហគមន៍ ក្រសួងអប់រំបានផ្អាកដំណើរការសាលារៀននៅរាជធានីភ្នំពេញ និងខេត្តកណ្តាលរយៈពេល២សប្តាហ៍ ដោយសិស្សានុសិស្សបន្តរៀនតាមអនឡាញ។ រួមទាំងរោងភាពយន្ត សារមន្ទីរជាតិ ខារ៉ាអូខេ(KTV) មណ្ឌលកម្សាន្ត ម៉ាស្សា និងក្លឹបហាត់ប្រាណនៅទូទាំងប្រទេសក៏ផ្អាកឲ្យដំណើរការផងដែរ។

គិតត្រឹមថ្ងៃទី១១ ខែវិច្ឆិកា កម្ពុជាមានអ្នកឆ្លងជំងឺកូវីដ-១៩ ចំនួន៣០១នាក់ ដោយក្នុងនោះមានមនុស្សចំនួន៤នាក់បានឆ្លងជំងឺកូវីដ-១៩ពីលោក Peter Szijjarto រដ្ឋមន្ត្រីការបរទេសហុងគ្រី ដែលផ្ទុកជំងឺកូវីដ-១៩ ពេលទៅដល់ប្រទេសថៃ។

បច្ចុប្បន្នក្រសួងសុខាភិបាល បានរកឃើញ និងធ្វើតេស្តជាលើកទី២ លើមនុស្សចំនួន១៤៨១នាក់ ដែលបានជាប់ពាក់ព័ន្ធដោយផ្ទាល់ និងប្រយោលជាមួយនឹងរដ្ឋមន្ត្រីការបរទេសហុងគ្រី កាលពីថ្ងៃទី៣ ខែវិច្ឆិកា ដោយលទ្ធផលបង្ហាញថាអវិជ្ជមានទាំងអស់។ ទោះបីអវិជ្ជមានប៉ុន្តែពួកគេនឹងបន្តធ្វើតេស្តជាលើកទី៣ នៅថ្ងៃទី១៤ និងតេស្តលើកទី៤នៅថ្ងៃទី១៨ ខែវិច្ឆិកា៕