អន្តរជាតិ
នាយករដ្ឋមន្ត្រីបារ៉ែន ដែលកាន់តំណែង៥០ឆ្នាំ ចូលទិវង្គតនៅមន្ទីរពេទ្យអាមេរិក នាយករដ្ឋមន្ត្រីបារ៉ែន ព្រះអង្គម្ចាស់ Sheikh Khalifa bin Salman al Khalifa ។ រូបភាព៖ Reuters
× នាយករដ្ឋមន្ត្រីបារ៉ែន ព្រះអង្គម្ចាស់ Sheikh Khalifa bin Salman al Khalifa ចូលទិវង្គតហើយ នៅថ្ងៃទី ១១ ខែវិច្ឆិកា នៅព្រះជន្ម ៨៤ឆ្នាំ។ រាជវាំងបារ៉ែន ប្រកាសបែបនេះ។ ទ្រង់ បានកាន់តំណែងនេះអស់ពេល៥០ឆ្នាំហើយ។
នាយករដ្ឋមន្ត្រីបារ៉ែន បានចូលទិវង្គតក្នុងថ្ងៃពុធនេះ នៅមន្ទីរពេទ្យ Mayo Clinic ក្នុងសហរដ្ឋអាមេរិក ទីដែលទ្រង់សម្រាកព្យាបាលជំងឺ។ ទីភ្នាក់ងារព័ត៌មានបារ៉ែន បានរាយការណ៍បែបនេះ។
ព្រះមហាក្សត្របារ៉ែន Sheikh Hamad bin Isa Al Khalifa បានប្រកាសកម្មវិធីកាន់ទុក្ខផ្លូវការរយៈពេល១សប្ដាហ៍ពេញ ដែលទង់ជាតិនឹងត្រូវបង្ហូតត្រឹមពាក់កណ្ដាលដង។ ចំណែក ព្រះរាជពិធីបុណ្យ នឹងរៀបចំឡើងកាលណាសពទ្រង់ដឹកមកដល់ប្រទេសវិញ។
ព្រះអង្គម្ចាស់ Sheikh Khalifa bin Salman គឺជានាយករដ្ឋមន្ត្រីដែលកាន់តំណែងយូរបំផុតមួយលើពិភពលោក ដែលដឹកនាំប្រទេសឈូងសមុទ្រពែកនេះ តាំងពីឆ្នាំ១៩៧០មកម្ល៉េះ ពោលគឺមួយឆ្នាំប៉ុណ្ណោះមុនពេលបារ៉ែនទទួលបានឯករាជ្យ នាថ្ងៃទី ១៥ ខែសីហា ឆ្នាំ១៩៧១។
ក្រោមរដ្ឋធម្មនុញ្ញឆ្នាំ២០០២ ទ្រង់បានបាត់បង់អំណាចខ្លះ ខណៈដែលព្រះមហាក្សត្របារ៉ែនមានអំណាចតែងតាំង និងបណ្ដេញរដ្ឋមន្ត្រីចេញពីតំណែង។ ព្រះអង្គម្ចាស់ Sheikh Khalifa bin Salman គឺជាព្រះបិតុលារបស់ព្រះមហាក្សត្របារ៉ែនដែលគ្រងរាជ្យបច្ចុប្បន្ន ព្រះអង្គម្ចាស់ Sheikh Hamad bin Isa Al Khalifa៕
© រក្សាសិទ្ធិដោយ thmeythmey.com