អន្តរជាតិ
សមាជិកសភាហុងកុងដែលគាំទ្រប្រជាធិបតេយ្យទាំងអស់ នឹងលាលែង ក្រោយគ្នា៤នាក់ត្រូវបញ្ចប់តំណែង សមាជិកសភាហុងកុងទាំង១៩រូប ដែលមាននិន្នាការទៅរកលទ្ធិប្រជាធិបតេយ្យ។ រូបភាព៖ AFP
× រដ្ឋាភិបាលហុងកុង នៅថ្ងៃទី១១ ខែវិច្ឆិកា បានបញ្ចប់សមាជិកភាពសភាពីសមាជិក ៤រូប ដែលមាននិន្នាការទៅរកលទ្ធិប្រជាធិបតេយ្យ។ ការបញ្ចប់សមាជិកភាពនេះធ្វើឡើង បន្ទាប់ពីគណៈអចិន្ត្រៃយ៍នៃសភាប្រជាជនចិន បានអនុម័តសេចក្តីសម្រេចមួយដែលចែងពីគុណសម្បត្តិរបស់សមាជិកសភាហុងកុង។ ក្រោយការបញ្ចប់សមាជិកភាពនេះដែរ សមាជិកឯទៀត ក៏ប្រកាសលាលែងពីតំណែងដែរ។
បន្ទាប់ពីសេចក្តីសម្រេចគុណសម្បត្តិរបស់សមាជិកសភាហុងកុង ចូលជាធរមាន និងត្រូវបានបង្ហាញដោយទីភ្នាក់ងារព័ត៌មានចិន Xinhua រដ្ឋាភិបាលក្រុងហុងកុង បានប្រកាសដកសិទ្ធិសមាជិកសភាចំនួន ៤នាក់ ពីកៅអីសភា។ ការដកសិទ្ធិនេះ គឺមានសុពលភាពភ្លាមៗតែម្ដង។
សេចក្តីសម្រេច ដែលត្រូវបានអនុម័តដោយគណៈអចិន្ត្រៃយ៍នៃសភាប្រជាជនចិននាកិច្ចប្រជុំថ្ងៃទី១១ ខែវិច្ឆិកា បានផ្តល់អំណាចឲ្យរដ្ឋាភិបាលហុងកុង ដកសិទ្ធិសមាជិកសភាទាំងឡាយណា ដែលគាំទ្រឯករាជ្យភាពរបស់ហុងកុង, មិនទទួលស្គាល់អធិបតេយ្យភាពរបស់ចិន និងស្វែងរកការជ្រៀតជ្រែកពីបរទេស។ ការដកសមាជិកសភាបែបនេះ អាចធ្វើឡើងដោយមិនចាំបាច់ឆ្លងកាត់តុលាការឡើយ។
បើតាមហេតុផលរបស់រដ្ឋាភិបាលហុងកុង សមាជិកសភាទាំងបួននាក់នេះ បានគាំទ្រច្បាប់សិទ្ធិមនុស្ស និងប្រជាធិបតេយ្យរបស់អាមេរិក និងគាំទ្រការដាក់ទណ្ឌកម្មអាមេរិកមកលើសមាជិករដ្ឋាភិបាលហុងកុង ទាក់ទិនបាតុកម្មថែមទៀត។ កន្លងមក សមាជិកសភាត្រូវបានដកសិទ្ធិទាំង៤នាក់នេះ ក៏ត្រូវបានហាមឃាត់ក្នុងការឈរឈ្មោះបោះឆ្នោតសភា ដែលត្រូវបានលើកយកទៅធ្វើនៅពេលខាងមុខផងដែរ។ បន្ទាប់ពីការប្រកាសនេះ កិច្ចប្រជុំសភាហុងកុងត្រូវផ្អាក។
«វានឹងគ្មានអនាគតល្អទេសម្រាប់សភាហុងកុង»។ លោក Kenneth Leung សមាជិកសភាម្នាក់ដែលត្រូវបានដកសិទ្ធិ បានលើកឡើងបែបនេះ ដោយបន្ថែមថា ការដកសិទ្ធិនេះ នឹងធ្វើឲ្យសភាហុងកុងគ្មានប្រសិទ្ធភាព។
ប៉ុន្មានម៉ោងក្រោយ សមាជិកសភាដែលគាំទ្រប្រជាធិបតេយ្យ១៥នាក់ទៀត ក៏ប្រកាសលាលែងពីតំណែង។ ពួកគេនឹងដាក់ពាក្យលាលែងនៅថ្ងៃទី១២ ខែវិច្ឆិកា។ តំណាងក្រុមសមាជិកសភាប្រជាធិបតេយ្យ លោក Wu Chi-wai និយាយក្នុងសន្និសីទសារព័ត៌មានថ្ងៃទី១១ ខែវិច្ឆិកា ថា ក្រុមរបស់លោកនឹងលាលែងពីតំណែង ព្រោះដៃគូ និងសហសេវិក ត្រូវបានដកសិទ្ធិ។ ប៉ុន្តែលោក Wu បញ្ជាក់ ក្រុមរបស់លោកនឹងមិនបោះបង់គោលដៅឡើយ៕
© រក្សាសិទ្ធិដោយ thmeythmey.com