អន្តរជាតិ
មេដឹកនាំអាស៊ាន ចាប់ផ្ដើមជំនួបកំពូលក្នុងបរិបទនៃការប្រជែងឥទ្ធិពលពួកមហាអំណាច
នាយករដ្ឋមន្ត្រីវៀតណាម ង្វៀន ស៊ួនហ្វុក ថ្លែងសុន្ទរកថាបើកកិច្ចប្រជុំកំពូលអាស៊ានលើកទី៣៧ នៅថ្ងៃទី ១២ ខែវិច្ឆិកា ដែលរៀបចំឡើងនៅទីក្រុង ហាណូយ។ រូបភាព៖ Reuters
×![]()
មេដឹកនាំនៃបណ្ដាប្រទេសក្នុងតំបន់អាស៊ីអាគ្នេយ៍ បានចាប់ផ្ដើមជំនួបកំពូលពហុភាគី នៅថ្ងៃទី ១២ ខែវិច្ឆិកា ដើម្បីដោះស្រាយភាពតានតឹងក្នុងសមុទ្រចិនខាងត្បូង និងរៀបចំផែនការសម្រាប់ស្រោចស្រង់សេដ្ឋកិច្ចក្រោយវិបត្តិកូវីដ-១៩ក្នុងតំបន់ដែលកំពុងប្រទាញប្រទង់គ្នាខ្លាំងចន្លោះសហរដ្ឋអាមេរិកនិងចិនមួយនេះ។ 
កិច្ចប្រជុំកំពូលអាស៊ានលើក៣៧និងកិច្ចពាក់ព័ន្ធអាស៊ានឆ្នាំ២០២០ កំពុងរៀបចំឡើងតាមរយៈប្រព័ន្ធអនឡាញ ដោយសារជំងឺរាតត្បាតសកលកូវីដ-១៩ ដែលនៅបន្តអុកលុកខ្លាំងក្នុងតំបន់នេះ។ វៀតណាម ជាម្ចាស់ផ្ទះនៃកិច្ចប្រជុំកំពូលឆ្នាំ២០២០ ដែលប្រព្រឹត្តទៅក្រោមមូលបទ«ការឆ្លើយតបនិង ស្អិតល្មួត»។
ក្នុងសុន្ទរកថាបើកកិច្ចប្រជុំកំពូលអាស៊ានលើកទី៣៧ ក្នុងទីក្រុង ហាណូយ នាយករដ្ឋមន្ត្រីវៀតណាម ង្វៀន ស៊ួនហ្វុក គូសបញ្ជាក់ថា មកទល់ពេលនេះ សមាគមប្រជាជាតិអាស៊ីអាគ្នេយ៍ (អាស៊ាន) ពុំទាន់ធ្លាក់ចូលនឹមនៃការប្រកួតប្រជែងឥទ្ធិពលរបស់ពួកមហាអំណាច ហើយបង្កបញ្ហាប្រឈមដល់ប្រព័ន្ធពហុភាគីអន្តរជាតិនៅឡើយទេ។
«៧៥ឆ្នាំបានកន្លងផុតទៅហើយ ចាប់តាំងពីសង្គ្រាមលោកលើកទី២ចប់រលត់។ យ៉ាងណាមិញ សន្តិសុខនិងសន្តិភាពពិភពលោក មិនទាន់ត្រូវបានរក្សាឲ្យគង់វង្សនៅឡើយទេ»។ លោក ហ្វុក លើកឡើងបែបនេះ មុនបន្ថែមថា សម្រាប់ឆ្នាំ២០២០នេះ អាស៊ានទាំង១០ ស្ថិតក្រោមការគំរាមកំហែងដ៏ធំធេង ដែលកើតចេញពីការមិនចុះសម្រុងគ្នានិងការប្រកួតប្រជែងឥទ្ធិពលរបស់ពួកមហាអំណាច។
បញ្ហាសមុទ្រចិនខាងត្បូង នៅតែប្រធានបទក្តៅក្នុងរបៀបវារៈរបស់អាស៊ានឆ្នាំនេះ ខណៈការស្រោចស្រង់សេដ្ឋកិច្ចក្រោយវិបត្តិកូវីដ-១៩ ក៏ជាប្រធានបទចម្បងផងដែរសម្រាប់កិច្ចប្រជុំឆ្នាំនេះ។ តួយ៉ាង មេកដឹកនាំអាស៊ាន ក៏រំពឹងថាចុះហត្ថលេខាលើកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) នាថ្ងៃទី១៥ ខែវិច្ឆិកាខាងមុខ ដែលអាចក្លាយជាកិច្ចព្រមព្រៀងពាណិជ្ជកម្មធំបំផុតរបស់ពិភពលោក
កិច្ចព្រមព្រៀងនេះ ទំនងជាពង្រឹងវត្តមានរបស់ចិនកាន់តែរឹងមាំថែមទៀតក្នុងនាមជាដៃគូសេដ្ឋកិច្ចជាមួយអាស៊ាន ជប៉ុន និងកូរ៉េខាងត្បូង ហើយកាន់តែធ្វើឲ្យចិនមានតួនាទីកាន់តែសំខាន់ថែមទៀតផងដែរ ក្នុងការរៀបចំក្បួនច្បាប់ពាណិជ្ជកម្មរបស់តំបន់នេះ។ ហើតនេះក៏កើតឡើងស្របពេលដែលលទ្ធផលបោះឆ្នោតដ៏ចម្រូងចម្រាសនៅអាមេរិក បង្កើតជាសំណួរចំពោះការឲ្យតម្លៃរបស់ក្រុងវ៉ាស៊ីនតោនមកលើតំបន់នេះ៕
Tag:
ជំនួបកំពូលអាស៊ាន
វៀតណាម
© រក្សាសិទ្ធិដោយ thmeythmey.com
