COVID-19
ជាតិ
អ្នកស្រី ឱ វណ្ណឌីន រំលឹកអ្នកកាសែតឲ្យប្រុងប្រយ័ត្នពេលប្រើក្បាលមេក្រូសម្ភាសដើម្បីទប់ស្កាត់កូវីដ-១៩
×![]()
ដោយ: សារព័ត៌មានថ្មីៗ
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានផ្ញើសារជាពិសេសមួយសម្រាប់អ្នកសារព័ត៌មាន ជុំវិញវិធានការការពារពីការឆ្លងកូវីដ-១៩ និងជំងឺឆ្លងមួយចំនួនទៀត។ អ្វីៗទាំងអស់ មិនខុសពីវិធានការទូទៅនោះឡើយ ប៉ុន្តែចំណុចដ៏សំខាន់សម្រាប់ក្រុមអ្នកសារព័ត៌មាន គឺការប្រុងប្រយ័ត្នចំពោះការប្រើប្រាស់ក្បាលមេក្រូ នៅពេលដាក់ឲ្យបុគ្គលណាម្នាក់និយាយ។
«ប្រុងប្រយ័ត្នការប្រើក្បាលមេក្រូ មុនពេលដាក់ក្បាលមេក្រូឱ្យបុគ្គលម្នាក់និយាយ ត្រូវសម្អាតជាមុនដោយប្រើអាល់កុល ឬទឹកសម្លាប់មេរោគ ពេលចប់ ត្រូវសម្អាតម្តងទៀត»។ នេះជាការរំលឹករបស់លោកស្រី ឱ វណ្ណឌីន ទៅកាន់អ្នកសារព័ត៌មាន ហើយលោកស្រីស្នើឲ្យចៀសវាងការទាញក្បាលមេក្រូ ដាក់ពីបុគ្គលម្នាក់ទៅបុគ្គលម្នាក់ ឬទាញយកទៅនិយាយខ្លួនឯងផ្ទាល់ ដោយមិនបានជូតសម្អាតដោយប្រើអាល់កុល ឬទឹកសម្លាប់មេរោគ។
ក្រៅពីនេះ អ្នកនាំពាក្យក្រសួងសុខាភិបាល បានស្នើឲ្យអ្នកកាសែតពាក់ម៉ាសជាប្រចាំរាល់ពេលយកព័ត៌មាន ឧស្សាហ៍លាងដៃ រក្សាគម្លាតសុវត្ថិភាពបុគ្គលក្នុងចម្ងាយយ៉ាងតិចមួយម៉ៃត្រកន្លះឡើង និងមិនត្រូវប្រជ្រៀតគ្នានៅក្នុងស្ថានភាពយកព័ត៌មានដែលចង្អៀតកកកុញ ទោះជានៅកន្លែងណាក៏ដោយ។
លោកស្រី ឱ វណ្ណឌីន ដែលជារដ្ឋលេខាធិការក្រសួងសុខាភិបាលផងដែរនោះ បានសរសេរបន្ថែមថា៖ «បុគ្គលដែលមានបញ្ហាសុខភាព ឬមិនសូវស្រួលខ្លួន ត្រូវសម្រាកនៅផ្ទៈ អាចធ្វើការពីផ្ទៈបាន ប្រសិនបើនៅអាចធ្វើការបាន មិនត្រូវចេញដើរទៅយកព័ត៌មាននោៈឡើយ ហើយស្វែងរកការពិគ្រោៈពិនិត្យព្យាបាល នៅមន្ទីរពេទ្យរដ្ឋដែលនៅជិតលោកអ្នក ឬហៅទៅលេខ ១១៥»។
សម្រាប់ព្រឹត្តិការណ៍៣វិច្ឆិកា ដែលពាក់ព័ន្ធនឹងដំណើរទស្សនកិច្ចប្រមុខការទូតហុងគ្រី អ្នកសារព័ត៌មានខ្មែរជាច្រើន ស្ថិតក្នុងចំណោមអ្នកប៉ះពាល់ផ្ទាល់ និងមិនផ្ទាល់ ហើយក៏ត្រូវបានដាក់ក្រោមវិធានចត្តាឡីស័ក ដើម្បីតេស្តរកកូវីដ-១៩ ជាបន្តបន្ទាប់ផងដែរ។ ក្នុងចំណោមអ្នកឆ្លង៤នាក់ក្នុងព្រឹត្តិការណ៍៣វិច្ឆិកា មិនមានសមាជិកសារព័ត៌មានឡើយ។
កន្លងមក វិទ្យាស្ថានក្លិបអ្នកសារព័ត៌មាន National Press Club Journalism Institute ដែលមានមូលដ្ឋាននៅក្នុងវ៉ាស៊ីនតោន បានសាកសួរទៅមេដឹកនាំសារព័ត៌មាននៅប្រទេសចំនួន១៧ដែលឆ្លងកូវីដ-១៩ ច្រើនជាងគេលើពិភពលោក ប៉ុន្តែមិនទទួលបានរបាយការណ៍លម្អិតឡើយ។
តាមទិន្នន័យមួយរបស់ Poynter កាលពីខែកញ្ញា អ្នកកាសែតយ៉ាងហោចណាស់៣០នាក់ បានស្លាប់ដោយសារកូវីដ-១៩ ដោយភាគច្រើននៅឥណ្ឌា សហរដ្ឋអាមេរិក និងបណ្តាប្រទេសដែលរាលដាលខ្លាំង៕
Tag:
COVID-19
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
