កីឡាអន្តរជាតិ
អន្តរជាតិ
ស្កុតឡែន បានកៅអីទៅ Euro 2020 លើកដំបូងក្នុងពេល២៤ឆ្នាំ ឯម៉ាសេដ្វានបង្ហាញមុខលើកទី១
×![]()
ដោយ: ទេព ពិទូរ្យ
ក្រុមកីឡាបាល់ទាត់ជម្រើសជាតិស្កុតឡែនបានឈានទៅកាន់វគ្គផ្តាច់ព្រ័ត្រ Euro 2020 ជាលើកដំបូងក្នុងរយៈពេល ២៤ ឆ្នាំ តាមរយៈការឈ្នះស៊ែប៊ីដោយការស៊ុតបាល់កាត់សេចក្តីប៉េណាល់ទី ៥-៤ ក្នុងការប្រកួតវគ្គ play-off។ ម៉ាសេដ្វានខាងជើង ក៏ទទួលបានកៅអីទៅកាន់ព្រឹត្តិការណ៍ពានរង្វាន់ប្រចាំទ្វីបអឺរ៉ុបនេះជាលើកដំបូងក្នុងប្រវត្តិសាស្ត្រផងដែរ ក្រោយឈ្នះហ្សកហ្ស៊ី ១-០។
ក្រោយការប្រកួតបញ្ចប់៩០នាទីក្នុងលទ្ធផល ១-១ រវាងម្ចាស់ផ្ទះស៊ែប៊ីនិងស្កុតឡែនក្នុងការប្រកួត play-off លើកចុងក្រោយពូល C នៅរាត្រីថ្ងៃទី១២ ខែវិច្ឆិកា ក្រុមទាំងពីរតម្រូវឲ្យទាត់បាល់កាត់សេចក្តី១១ម៉ែត្រ។ ស្កុតឡែនបានទទួលជ័យជម្នះលើការទាត់នេះ ស្របពេលអ្នកចាំទី David Marshall ក្លាយជាវីរបុរសដោយសង្គ្រោះពីការស៊ុតលើកទី៥របស់ខ្សែប្រយុទ្ធស៊ែប៊ី Aleksandar Mitrovic ដោយបញ្ចប់ទៅក្នុងលទ្ធផល ៥-៤។
នេះជាការបង្ហាញខ្លួនលើកដំបូងរបស់ស្កុតឡែនសម្រាប់ពានប្រចាំទ្វីបអឺរ៉ុបនៅឆ្នាំ២០២០ ខណៈក្រុមដែលដឹកនាំដោយគ្រូបង្វឹកលោក Steve Clarke បង្ហាញមុខលើកចុងក្រោយនៅឆ្នាំ១៩៩៦។
ស្កុតឡែន នឹងត្រូវប៉ះអង់គ្លេស ក្រូអាស៊ី និងឆែក ក្នុងពូល D ក្នុងការប្រកួត Euro 2020 ដែលត្រូវពន្យារពេលទៅឆ្នាំ២០២១។
ចំណែកក្រុមជម្រើសជាតិម៉ាសេដ្វានខាងជើង តាមរយៈជ័យជម្នះ ១-០ លើក្រុមហ្សកហ្ស៊ីក្នុងប្រកួតចុងក្រោយពូល D ក៏ឈានទៅកាន់វគ្គផ្តាច់ព្រ័ត្រពានរង្វាន់អឺរ៉ុបនេះជាលើកដំបូងក្នុងប្រវត្តិសាស្ត្រផងដែរ។ ក្រុមដែលមានចំណាត់ថ្នាក់ទី៦៥ពិភពលោក នឹងត្រូវចូលរួមក្នុងពូល C ដោយជួបហូឡង់ អ៊ុយក្រែន និងអូទ្រីស។
សម្រាប់ក្រុមជម្រើសជាតិចំនួនពីរទៀតដែលដែលឈ្នះក្នុងការប្រកួត play-off រួមមាន ហុងគ្រី និងស្លូវ៉ាគី។ ហុងគ្រីបានយកឈ្នះអៀរឡង់ក្នុងលទ្ធផល ២-១ ក្នុងការប្រកួតចុងក្រោយពូល A ឯ ស្លូវ៉ាគី ឈ្នះអៀរឡង់ខាងជើង ២-១ ពូល B។
ហុងគ្រី ត្រូវតតាំងជាមួយ ម្ចាស់ការពារជើងឯកព័រទុយហ្គាល់ បារាំង និងអាល្លឺម៉ង់ ក្នុងពូល F។ ស្លូវ៉ាគីស្ថិតក្នុងពូល E ជួបអេស្ប៉ាញ ស៊ុយអែត និងប៉ូឡូញ។ ការប្រកួត Euro 2020 នឹងចាប់ផ្តើមការប្រកួតនៅថ្ងៃទី១១ ខែមិថុនា ដល់ថ្ងៃទី១១ ខែកក្កដា ឆ្នាំ២០២១៕
Tag:
Euro 2020
© រក្សាសិទ្ធិដោយ thmeythmey.com
