សម្តេចឧបនាយករដ្ឋមន្ត្រី ទៀ បាញ់ រដ្ឋមន្ត្រីការពារជាតិ លើកទស្សនៈថា ក្នុងនាមជាប្រទេសជិតខាង គឺត្រូវចេះជួយគ្នាទៅវិញទៅមក ជាពិសេសស្ថិតក្នុងកាលៈទេសៈនៃការប្រយុទ្ធប្រឆាំងនឹងជំងឺរាតត្បាតកូវីដ-១៩។ សម្តេច លើកពីទស្សនៈនេះឡើង ក្នុងពេលដែលកម្ពុជា កំពុងជួបការលំបាកដោយសារជំងឺកូវីដ-១៩ដែរនោះ ហ៊ានបរិច្ចាគម៉ាស់២,១លាន និងបរិក្ខារពេទ្យ១២មុខទៀត ដល់ប្រទេសឡាវ។
សម្តេច ទៀ បាញ់ ត្រូវបានចាត់តាំងឲ្យដឹកនាំគណៈប្រតិភូ នាំយកម៉ាស់និងសម្ភារពេទ្យទាំងនោះ ទៅកាន់ឡាវ នៅព្រឹកថ្ងៃទី១៦ ខែវិច្ឆិកា ឆ្នាំ២០២០នេះ។ បើតាមសម្តេចរដ្ឋមន្ត្រី ការបរិច្ចាគម៉ាស់និងសម្ភារពេទ្យទាំងនោះ ធ្វើឡើងបន្ទាប់ពីសម្តេចនាយករដ្ឋមន្ត្រី ហ៊ុន សែន និង លោក ថងលូន ស៊ីសូលីត នាយករដ្ឋមន្ត្រីឡាវ សន្ទនាគ្នាតាមទូរស័ព្ទរួច។
រៀបនឹងឡើងយន្តហោះធ្វើដំណើរទៅកាន់ឡាវ រដ្ឋមន្ត្រីការពារជាតិ ថ្លែងទៅកាន់អ្នកកាសែតដូច្នេះថា៖«...រឿងនេះ គឺជារឿងមួយដែលប្រពៃសម្បើមណាស់។ យើង អាចនិយាយបានថា មិត្តភក្តិនៅក្បែរគ្នា ក្នុងការរៀបចំប្រយុទ្ធប្រឆាំងជាមួយកូវីដ-១៩នេះ គឺយើង ឃើញថា កន្លែងណា ប្រសិទ្ធភាព មិនទាន់បានគ្រប់គ្រាន់ [មិនទាន់] ពេញលេញ គឺជួយបន្ថែមគ្នាទៅវិញទៅមក នេះគឺជាផ្នែកមួយដ៏សំខាន់តែម្តង...»។
សម្តេចនាយករដ្ឋមន្ត្រី ហ៊ុន សែន សរសេរលើទំព័រហ្វេសប៊ុកថា៖«សូមជូនពរបងប្អូនជនរួមជាតិកម្ពុជា និងប្រជាជនឡាវចៀសផុតពីជំងឺឆ្លងកូវីដទាំងអស់គ្នា។ ស្រឡាញ់គ្នាក្នុងគ្រាក្រ ស្គាល់មិត្តល្អក្នុងពេលលំបាក»។
សម្តេច ទៀ បាញ់ ហៅការផ្តល់ជំនួយរបស់កម្ពុជានេះ ថាជាការផ្តល់ភាពកក់ក្តៅដល់ឡាវ ក្នុងការទប់ស្កាត់នឹងជំងឺកូវីដ-១៩។ សម្តេច ថ្លែងថា៖«[ឡាវ] គឺហាក់ដូចជានៅមានបញ្ហា។ យើង អត់ហ៊ានថា នៅខ្វះខាតទេ ប៉ុន្តែ អត់ទាន់គត់មត់មាំទាំខ្លាំងក្លា ទើបសម្តេច [តេជោ] លោក បានសម្រេចផ្សារភ្ជាប់ទំនាក់ទំនង ដើម្បីរួមគ្នាប្រឆាំងឲ្យមានប្រសិទ្ធិភាពនូវជំងឺដ៏កាចសាហាវនេះ គឺបានសម្រេចផ្តល់សម្ភារ ដែលជាកម្លាំងជំនួយក្នុងការទប់ទល់ឲ្យកាន់តែមានប្រសិទ្ធភាពថែមទៅដល់មិត្តឡាវ»។
ជាមួយគ្នានេះ សម្តេច ទៀ បាញ់ ក៏បានសរសើរពីទឹកចិត្តរបស់សម្តេចនាយករដ្ឋមន្ត្រី ហ៊ុន សែន ផងដែរ ក្នុងការប្តូរផ្តាច់ប្រយុទ្ធប្រឆាំងនឹងជំងឺកូវីដ-១៩។ សម្តេច លើកឡើងថា កម្ពុជា បានបំពេញការងារយ៉ាងសកម្មក្នុងការប្រយុទ្ធប្រឆាំងនឹងជំងឺកូវីដ-១៩ ក្នុងប្រទេសកម្ពុជា ហើយបានរួមចំណែកប្រយុទ្ធប្រឆាំងនឹងជំងឺនេះ នៅក្នុងតំបន់ថែមទៀត ជាពិសេសជាមួយបណ្តាប្រទេសជិតខាង។
សម្តេចឧបនាយករដ្ឋមន្ត្រី មានប្រសាសន៍បែបនេះថា៖«នៅក្នុងតំបន់ជាប់គ្នា គឺយ៉ាងណាក៏ដោយ គឺរួមគ្នាឲ្យបានខ្លាំងក្លា ប្រើឧបករណ៍និងសម្ភារ ដែលមានប្រសិទ្ធភាពកាន់តែខ្ពស់ នោះគឺជាការទប់ស្កាត់ [ជំងឺកូវីដ-១៩] តាំងពីដើមទីរៀងៗខ្លួន ហ្នឹងគឺជាការត្រឹមត្រូវ»។
ក្នុងចំណោមប្រទេសទាំង៣ ដែលនៅជាប់កម្ពុជា ថៃ មានករណីឆ្លងជំងឺកូវីដ-១៩ច្រើនជាងគេ បន្ទាប់មក គឺវៀតណាម ហើយឡាវ មានករណីឆ្លងតិចជាងគេបង្អស់។ គិតត្រឹមថ្ងៃទី១៦ ខែវិច្ឆិកា ឆ្នាំ២០២០ដូចគ្នា តួលេខលើគេហទំព័រ Worldometers បង្ហាញថា ថៃ មានអ្នកឆ្លងជំងឺកូវីដ-១៩ ជាង៣,៨ពាន់នាក់ ស្លាប់៦០នាក់ ជាសះស្បើយជាង៣,៧ពាន់, វៀតណាម មានអ្នកឆ្លងជាង១,២ពាន់នាក់ ស្លាប់៣៥នាក់ ជាសះស្បើយជាង១,១ពាន់នាក់, កម្ពុជា មានអ្នកឆ្លង៣០២នាក់ ជាសះស្បើយ២៨៩នាក់ ដោយគ្មានអ្នកស្លាប់, ឡាវ មានអ្នកឆ្លង២៤នាក់ ជាសះស្បើយ២៣នាក់ ដោយគ្មានអ្នកស្លាប់៕