សង្គមអន្តរជាតិ
អន្តរជាតិ
លោក ដូណាល់ ត្រាំ ប្រធានាបតីអាមេរិកជិតអស់អាណត្តិ ។ រូបភាព៖ AFP
×![]()
ប្រធានាធិបតីអាមេរិក ដូណាល់ ត្រាំ បានដកពាក្យសម្ដីភ្លាមវិញបន្ទាប់ពីព្រមទទួលស្គាល់ជាលើកដំបូងថាលោក ចូ បៃឌិន ឈ្នះឆ្នោត។ លោក ត្រាំ អះអាងថា លោកអត់ព្រមចុះចាញ់អ្វីទាំងអស់ ហើយបន្តចោទថា ការបោះឆ្នោតមានការលួចបន្លំ។ 
ដោយមិននិយាយចំៗឈ្មោះបេក្ខជនបក្សប្រជាធិបតេយ្យ ចូ បៃឌិន ប្រធានាធិបតី ដូណាល់ ត្រាំ បានសរសេរសារមួយលើ Twitter នៅថ្ងៃទី១៥ខែវិច្ឆិកាដូច្នេះថា៖«លោកឈ្នះព្រោះតែការបោះឆ្នោតមានការលួចបន្លំ»។ សាររបស់លោក ត្រាំ បែបនេះ ត្រូវបានអ្នកឃ្លាំមើលជាច្រើនចាត់ទុកជាការសារភាពចុះចាញ់ក្នុងការបោះឆ្នោតដែលរៀបចំឡើងនាថ្ងៃទី៣ ខែវិច្ឆិកា។
ក៏ប៉ុន្តែ ប្រហែលមួយម៉ោងក្រោយមក លោក ត្រាំ ហាក់និយាយក្រឡាស់ភ្លាមៗ ដោយបញ្ជាក់ថា លោក បៃឌិន ឈ្នះបានត្រឹមតែក្នុងក្រសែភ្នែកពួកប្រព័ន្ធផ្សព្វផ្សាយព័ត៌មានក្លែងក្លាយប៉ុណ្ណោះ។ «ខ្ញុំអត់ព្រមចុះចាញ់អ្វីទាំងអស់! យើងមានផ្លូវវែងឆ្ងាយទៀតដើម្បីទៅ។ នេះគឺការបោះឆ្នោតដែលមានការលួចបន្លំ»។ លោក ត្រាំ សង្កត់ធ្ងន់បែបនេះក្នុងសារបន្ទាប់ទៀត។
ជាងមួយសប្ដាហ៍ហើយ លោក ដូណាល់ ត្រាំ មិនទាន់ព្រមសារភាពថា ចាញ់ឆ្នោតជាមួយលោកបៃឌិន ដែលត្រូវប្រកាសថាឈ្នះ កាលពីថ្ងៃទី ៧ ខែវិច្ឆិកា ក្រោយទទួលសំឡេងប្រតិភូគ្រប់គ្រាន់។ ក្រោយឈ្នះរដ្ឋមួយចំនួនទៀត បច្ចុប្បន្ន លោក បៃឌិន មានសំឡេងប្រតិភូ ៣០៦ ក្នុងដៃ ដែលច្រើនឆ្ងាយជាង ២៧០ ប្រតិភូសម្រាប់ឈ្នះតំណែងគ្រប់គ្រងសេតវិមាន។
អនាគតប្រធានបុគ្គលិកសេតវិមានអាមេរិកដែលលោក បៃឌិន ទើបជ្រើសរើស លោក Ron Klain បានប្រាប់ទូរទស្សន៍អាមេរិក NBC ថា ការបង្ហោះលើ Twitter របស់លោក ត្រាំ មិនបានសម្រេចឲ្យលោកបៃឌិនជាប្រធានាធិបតី ឬអត់ឡើយ តែពលរដ្ឋអាមេរិកទេជាអ្នកសម្រេចនោះ។
ការប្ដឹងតវ៉ាប្រឆាំងលទ្ធផលបោះឆ្នោតក្នុងរដ្ឋគន្លឹះៗពីសំណាក់ក្រុមឃោសនាលោក ត្រាំ ភាគច្រើនត្រូវបានបដិសេធ ហើយកាលពីសប្ដាហ៍ មន្ត្រីចាត់ចែងការបោះឆ្នោតអាមេរិកប្រកាសថាគ្មានការលួចបន្លំសន្លឹកឆ្នោតឡើយ ហើយវាក៏ជាការបោះឆ្នោតមានសុវត្ថិភាពបំផុតក្នុងប្រវត្តិសាស្តិអាមេរិក។
បក្សប្រជាធិបតេយ្យ និងក្រុមអ្នកតាមដានបោះឆ្នោតអាមេរិក បានរិះគន់លោកត្រាំថាព្យាយាមធ្វើឲ្យភាពជោគជ័យរបស់លោក បៃឌិន អត់ស្របច្បាប់ ហើយក៏កំពុងបំផ្លាញទំនុកចិត្តសាធារណៈក្នុងដំណើរការអាមេរិកផងដែរ។ តាំងពីមុនការបោះឆ្នោតមក លោក ត្រាំ ក៏ធ្លាប់បដិសេធតាំងចិត្តផ្ទេរអំណាចដោយសន្តិវិធីផងដែរ។
ទោះបីជាលោកត្រាំមិនទាន់ព្រមចុះចេញក្តី លោក បៃឌិន បានចាប់ផ្ដើមដំណើរការផ្ទេរអំណាច ខណៈមេដឹកនាំពិភពលោកជាច្រើនបានផ្ញើសារអបអរ ក្នុងនោះក៏មានចិនផងដែរ។ ការស្បថចូលកាន់តំណែងលោក បៃឌិន នឹងរៀបចំឡើងនាថ្ងៃទី ២០ ខែមករា ឆ្នាំ២០២០៕
Tag:
ដូណាល់ ត្រាំ
ការបោះឆ្នោតអាមេរិក
ចូ បៃឌិន
© រក្សាសិទ្ធិដោយ thmeythmey.com
