COVID-19
អន្តរជាតិ
នាយករដ្ឋមន្ត្រីអង់គ្លេស ធ្វើចត្តាឡីស័កជាថ្មី បន្ទាប់ពីប៉ះពាល់អ្នកផ្ទុកកូវីដ-១៩ លោកបូរីស ចនសុន នាយករដ្ឋមន្រ្តីអង់គ្លេស។ រូបភាព៖ AFP
× នាយករដ្ឋមន្ត្រីអង់គ្លេស លោក បូរីស ចនសុន នៅថ្ងៃទី១៥ ខែវិច្ឆិកា បានប្រកាសថា លោកត្រូវដាក់ចត្តាឡីស័កជាថ្មី បន្ទាប់ពីលោកមានទំនាក់ទំនងជាមួយអ្នកផ្ទុកកូវីដ-១៩។ នេះគឺជាលើកទី២ហើយ ដែលលោកនាយករដ្ឋមន្ត្រីដាក់ចត្តាឡីស័កខ្លួនឯង។
«ថ្ងៃនេះ ខ្ញុំបានទទួលដំណឹងពីទីភ្នាក់ងាររដ្ឋាភិបាល NHS ថា ខ្ញុំត្រូវតែដាក់ចត្តាឡីស័ក»។ លោក បូរីស ចនសុន នាយករដ្ឋមន្ត្រីអង់គ្លេស បានសរសេរយ៉ាងដូច្នេះតាមរយៈបណ្តាញសង្គម Twitter ។ បើតាមលោកចនសុន ការធ្វើចត្តាឡីស័កនេះ កើតឡើងបន្ទាប់ពីលោក មានទំនាក់ទំនងជាមួយសមាជិកសភាដែលមានផ្ទុកកូវីដ-១៩ នៅនិវេសនដ្ឋានរបស់នាយករដ្ឋមន្ត្រី 10 Downing Street។
មកទល់ពេលនេះ លោកនាយករដ្ឋមន្ត្រីអង់គ្លេស មិនទាន់ចេញរោគសញ្ញាអ្វីឡើយ។ ក្នុងបណ្តាញសង្គម Twitter ដដែល លោកចនសុន បានបន្តថា លោកនៅតែគោរពតាមវិធានការរបស់ក្រសួងសុខាភិបាល បន្តធ្វើការ និងដឹកនាំរដ្ឋាភិបាល ដើម្បីឆ្លើយតបនឹងកូវីដ-១៩ ពីអាគារ10 Downing Street ដដែល ។
កាលពីខែមេសាកន្លងទៅ លោកនាយករដ្ឋមន្ត្រីអង់គ្លេស បានជាសះស្បើយពីកូវីដ-១៩ដែរ។ ក្នុងអំឡុងពេលផ្ទុកកូវីដ-១៩ លោក ត្រូវបានគេបញ្ជូនទៅក្នុងបន្ទប់សង្គ្រោះបន្ទាន់រយៈពេល ៣យប់។ បើតាមលោកនាយករដ្ឋមន្ត្រី ករណីកូវីដ-១៩ របស់លោក មានស្ថានភាពមិនល្អឡើយ ដោយសារលោកលើសទម្ងន់។
គិតត្រឹមថ្ងៃទី១៥ ខែវិច្ឆិកា ចក្រភពអង់គ្លេស មានករណីកូវីដ-១៩ សរុបចំនួនជាង ១,៣លានករណី និងអ្នកស្លាប់មានចំនួនជាង ៥ម៉ឺននាក់។
ដើម្បីទប់ស្កាត់ករណីឆ្លង ដែលមានជាប្រចាំថ្ងៃ រដ្ឋាភិបាលអង់គ្លេស បានសម្រេចបិទប្រទេសជាថ្មីចាប់ពីថ្ងៃទី៥ ខែវិច្ឆិកា រហូតដល់ថ្ងៃទី៥ ខែធ្នូ។ វិធានការបិទប្រទេសនេះ ក៏បានតម្រូវឲ្យតៀមស្រា ភោជនីយដ្ឋាន និងអាជីវកម្មមិនចាំបាច់មួយចំនួន ដូចជាកន្លែងហាត់ប្រាណ ធ្វើសក់ជាដើម ក៏ត្រូវបិទដែរ។
ជាមួយគ្នានេះ អង់គ្លេស ក៏បានអំពាវនាវឲ្យពលរដ្ឋរបស់ខ្លួន ធ្វើការពីផ្ទះ និងជៀសវាងការធ្វើដំណើរមួយចំនួន ដែលមិនចាំបាច់។ រដ្ឋាភិបាល មិនអនុញ្ញាតឲ្យមានពិធីជួបជុំលើសពី១៥នាក់ឡើយ ចំណែកអាពាហ៍ពិពាហ៍ និងបុណ្យសព អនុញ្ញាតឲ្យមនុស្សចូលរួមត្រឹមតែ ២៥នាក់ប៉ុណ្ណោះ។ ក្រៅពីវិធានខាងលើ អង់គ្លេស បានដាក់ចេញវិធានជាច្រើនផ្សេងទៀត ដើម្បីទប់ស្កាត់កូវីដ-១៩ នៅក្នុងប្រទេស៕
© រក្សាសិទ្ធិដោយ thmeythmey.com