អត្ថបទពាណិជ្ជកម្ម
លោក ពេជ សោភ័ន កំណើនផលិតភាព នឹងជួយពង្រឹងភាពប្រកួតប្រជែង បង្កើតការងារ និងជំរុញការធ្វើពិពិធកម្មសេដ្ឋកិច្ច
×![]()
ដោយ: សារព័ត៌មានថ្មីៗ
ភ្នំពេញ៖ លោក ពេជ សោភ័ន រដ្ឋលេខាធិការប្រចាំការ នៃក្រសួងការងារ និងបណ្តុះបណ្តាលវិជ្ជាជីវៈ បញ្ជាក់ថា កំណើនផលិតភាព នឹងជួយពង្រឹងភាពប្រកួតប្រជែង ព្រមទាំងជំរុញការធ្វើពិពិធកម្មសេដ្ឋកិច្ចជាតិនៅក្នុងល្បឿន និងជីវភាពកាន់តែខ្ពស់ ដើម្បីធានាចីរភាពកំណើន និងការបង្កើតការងារកាន់តែល្អគ្រប់គ្រាន់សម្រាប់ប្រជាជន។ លោក សោភ័ន ថ្លែងដូច្នេះ នៅក្នុងសុន្ទរកថាគន្លឹះ ស្តីពីការលើកកម្ពស់ការយល់ដឹង អំពីការបង្កើនផលិតភាព ក្នុងអំឡុងពេលរីករាលដាលជំងឺឆ្លងកូវីដ-១៩ នៃពិព័រណ៍ការងារ និងផលិតភាពជាតិ ឆ្នាំ២០២០ ដែលរៀបចំតាមប្រព័ន្ធអនឡាញ នារសៀលថ្ងៃទី១៤ ខែវិច្ឆិកា ឆ្នាំ២០២០។
តាមរដ្ឋលេខាធិការប្រចាំការ នៃក្រសួងការងារ និងបណ្តុះបណ្តាលវិជ្ជាជីវៈ កំណើនផលិតភាព អាចកើតមាន តាមរយៈការរៀនពីការអនុវត្តជោគជ័យ និងបច្ចេកវិទ្យាថ្មីៗ ពីប្រទេសអភិវឌ្ឍ ព្រមទាំងរៀនពីគ្នាទៅវិញទៅមក។ ការបណ្តុះផ្នត់គំនិតអំពីផលិតភាព ក្នុងចំណោមប្រជាជនកម្ពុជាទាំងមូល ជាពិសេសក្នុងចំណោមកម្មករ និយោជិត យុវជន សិស្ស និស្សិត ក៏នឹងរួមចំណែកដល់កំណើនផលិតភាពផងដែរ។
អ្វីដែលពិសេសទៀតនោះ គឺការជំរុញឱ្យមានការផ្លាស់ប្តូរផ្នត់គំនិត របស់និយោជកពីការចាត់ទុក«កម្មករនិយោជិត» គ្រាន់តែជាធនធាន ដូចជាធនធានផលិតកម្មដទៃទៀត ទៅជាការចាត់ទុកថាជា «មូលធន» ដែលត្រូវការចាំបាច់វិនិយោគជាប្រចាំ ដើម្បីលើកកម្ពស់ និងពង្រីកជំនាញឱ្យមានសមត្ថភាពប្រកួតប្រជែង និងឆ្លើយតបបានទៅនឹងការប្រែប្រួល គ្រប់កាលៈទេសៈ។ នេះបើតាមលោក ពេជ សោភ័ន ដោយលោកបានបន្តសង្កត់ធ្ងន់ថា៖ «កំណើនផលិតភាព ដើរតួនាទីយ៉ាងសំខាន់ ក្នុងការទ្រទ្រង់កំណើនសេដ្ឋកិច្ចនៃប្រទេសមួយ ដោយផ្តល់លទ្ធភាពឱ្យសេដ្ឋកិច្ចជាតិនៃប្រទេសនោះ អាចផលិតបានផលិតផលដែលមានតម្លៃបន្ថែមកាន់តែច្រើន ខណៈពេលដែលការប្រើប្រាស់ធនធាន កាន់តែមានប្រសិទ្ធភាព រួមចំណែកដល់ការបង្កើនភាពប្រកួតប្រជែងរបស់ប្រទេស។ កំណើនផលិតភាព ក៏ជាមធ្យោបាយសម្រាប់សេដ្ឋកិច្ចជាតិមួយ ក្នុងការដំឡើងប្រាក់ឈ្នួលឱ្យប្រជាពលរដ្ឋរបស់ខ្លួន ប្រកបដោយចីរភាព»។
ផលិតភាព គឺជាទំនាក់ទំនងរវាងបរិមាណនៃមុខចេញ (output) និងបរិមាណនៃមុខចូល (input) ដែលត្រូវបានប្រើប្រាស់ក្នុងការផលិតមុខចេញនោះ។ ក្នុងន័យនេះ ផលិតភាព មិនគ្រាន់តែជាការផលិតមុខចេញ ប្រកបដោយប្រសិទ្ធភាពប៉ុណ្ណោះទេ ថែមទាំងប្រកបដោយស័ក្តិសិទ្ធភាពផងដែរ។
ដូច្នេះ កំណើនផលិតភាព អាចត្រូវសម្រេចបាន តាមរយៈការប្រើប្រាស់កាន់តែមានប្រសិទ្ធភាព និងស័ក្តិសិទ្ធភាព នូវធនធានដូចជា ពលកម្ម មូលធន និងវត្ថុធាតុដើម ក្នុងផលិតកម្មនៃផលិតផលនិងសេវា។ ក្នុងន័យនេះ កំណើនផលិតភាពការងារ គឺជាការកើនឡើង នូវប្រសិទ្ធភាព និងស័ក្តិសិទ្ធភាព នៃពលកម្មនៅក្នុងការផលិត និងការលក់ ដែលកំណត់ដោយឥរិយាបថ និងជំនាញរបស់កម្មករនិយោជិត ព្រមទាំងកត្តាដទៃទៀត ដែលជះឥទ្ធិពលលើមុខចេញ និងមុខចូល រួមមានបច្ចេកវិទ្យា នវានុវត្តន៍ ប្រព័ន្ធ និងដំណើរការ ការវិនិយោគលើគ្រឿងម៉ាស៊ីន និងឧបករណ៍ និងកត្តាតម្រូវការ៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
