COVID-19
អន្តរជាតិ
រដ្ឋមន្ត្រីសុខាភិបាលកូរ៉េខាងត្បូង៖ ស្ថានភាពកូវីដ-១៩ ឈានដល់ចំណុចរបត់គ្រោះថ្នាក់ខ្លាំង លោករដ្ឋមន្ត្រីសុខាភិបាលកូរ៉េខាងត្បូង Park Neung-hoo ។ រូបភាព៖ Korea Harald
× កូរ៉េខាងត្បូង នៅថ្ងៃទី ១៦ ខែវិច្ឆិកា បានរាយការណ៍ជំងឺកូវីដ-១៩ ជាង២០០ករណី ដែលជាតួលេខពីររយករណីសម្រាប់ពេល៣ថ្ងៃជាប់គ្នា។ ដោយចាត់ទុកស្ថានការណ៍នេះ ជាចំណុចរបត់គ្រោះថ្នាក់ខ្លាំង រដ្ឋមន្ត្រីសុខាភិបាលកូរ៉េខាងត្បូង បានពិចារណារឹតបន្តឹងវិធានការគម្លាតសុវត្ថិភាពដើម្បីទប់ស្កាត់ការឆ្លងរាលដាលជំងឺរាតត្បាតសកលនេះ។
«យើងស្ថិតនៅដំណាក់កាលសំខាន់ ដែលយើងប្រហែលជាត្រូវកែទម្រង់លើវិធានការគម្លាតសុវត្ថិភាព»។ រដ្ឋមន្ត្រីសុខាភិបាលកូរ៉េខាងត្បូង Park Neung-hoo ប្រាប់កិច្ចប្រជុំមួយបែបនេះ មុននឹងបន្ថែមថា ស្ថានការណ៍កូវីដ-១៩បច្ចុប្បន្ន កំពុងឈានដល់របត់គ្រោះថ្នាក់ខ្លាំង បើមើលទៅលើការកើនឡើងករណីឆ្លងប្រចាំថ្ងៃនិងល្បឿនឆ្លង។
ទីភ្នាក់ងារគ្រប់គ្រងនិងបង្កាជំងឺឆ្លងកូរ៉េ (KDCA) បានរាយការណ៍ករណីឆ្លងកូវីដ-១៩ចំនួន ២២៣ ករណី កាលពីយប់ថ្ងៃទី ១៥ ខែវិច្ឆិកា ដែលជាតួលេខខ្ពស់បំផុតគិតចាប់ពីដើមខែកញ្ញាមក។ ក្នុងចំណោមករណីឆ្លងថ្មី ១៩៣នាក់ ជាករណីឆ្លងក្នុងសហគមន៍ និង៣០នាក់ទៀតជាករណីនាំចូល។
បូកទាំងករណីថ្មីនេះ ជំងឺកូវីដ-១៩សរុបនៅកូរ៉េខាងត្បូង ឡើងដល់ ២៨ ៧៦៩ករណី ខណៈអ្នកស្លាប់មាន ៤៩៤នាក់។ ជាង៦៦ភាគរយនៃករណីឆ្លងក្នុងសហគមន៍ កើតចេញពីតំបន់ណែនណាន់តាន់តាប់ខ្លាំងក្នុងទីក្រុងសេអ៊ូល។
អាជ្ញាធរសុខាភិបាលកូរ៉េខាងត្បូង កាលពីថ្មីៗនេះ ក៏បានព្រមានពីការរឹតបន្ដឹងឡើងវិញវិធានការគម្លាតសុវត្ថិភាព ដែលត្រូវបានបន្ធូរបន្ថយកាលពីមួយខែមុនទៅកាន់កម្រិតទាបបំផុត ដ្បិតថាការឆ្លងកូវីដ-១៩ជាលក្ខណៈចង្កោមបន្តកើតមាន។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។
ចំណាត់ការដើម្បីទប់ស្កាត់កូវីដ-១៩ នឹងរួមបញ្ចូលការហាមឃាត់ការជួបជុំមនុស្សនៅទីសាធារណៈចាប់ពី១០០នាក់ឡើងទៅ ការរឹតត្បិតលើការចូលរួមពិធីសាសនា និងការកំណត់ចំនួនអ្នកចូលមើលព្រឹត្តិការណ៍កីឡាត្រឹម៣០នាក់។
ទន្ទឹមនេះ អាជ្ញាធរកូរ៉េខាងត្បូង ក៏តម្រូវឲ្យទីតាំងដែលពួកគេចាត់ទុកថា ប្រឈមហានិភ័យឆ្លងខ្ពស់ រួមមាន ហាងស្រា និងកន្លែងច្រៀងការ៉ាអូខេជាដើម ពង្រីកវិធានការគម្លាតសុវត្ថិភាពក្នុងចំណោមភ្ញៀវពួកគេ។
ប្រធានាធិបតីកូរ៉េខាងត្បូង លោក មូន ចេអ៊ីន កាលពីថ្ងៃទី ១៤ ខែវិច្ឆិកា បានទទូចឲ្យអាជ្ញាធរនិងរដ្ឋាភិបាលតំបន់ពង្រឹងការតាមដានលើការអនុវត្តវិធានការប្រឆាំងកូវីដ-១៩។ ការអំពាវនាវនេះ កើតឡើងមុនការចូលធរមានបទបញ្ជាដាក់ពិន័យជាប្រាក់លើអ្នកអត់ពាក់ម៉ាស់នៅទីសាធារណៈ៕
Tag:
កូរ៉េខាងត្បូង
កូវីដ-១៩
Park Neung-hoo
© រក្សាសិទ្ធិដោយ thmeythmey.com