COVID-19
អន្តរជាតិ
Youtube សម្រេចមិនផលិតវីដេអូ «Rewind» ឆ្នាំ២០២០ ដោយសារកូវីដ-១៩
× YouTube បានប្រកាសថាខ្លួននឹងមិនផលិតវីដេអូចុងឆ្នាំ «Rewind» សម្រាប់ឆ្នាំ២០២០នេះឡើយ ហើយនោះគឺដោយសារតែជំងឺរាតត្បាតសកលកូវីដ-១៩ ដែលបច្ចុប្បន្នចម្លងមនុស្សជិត៥៤លាននាក់នៅទូទាំងពិភពលោក។
៩ឆ្នាំមកហើយ YouTube តែងតែងផលិតវីដេអូរំឮកពីព្រឹត្តិការណ៍ធំៗដែលកើតឡើងលើបណ្ដាញចែកចាយវីដេអូដ៏ធំមួយនេះ ហើយក៏មានចូលរួមសម្តែងពីសំណាក់តារា YouTube ល្បីៗ ផងដែរ។
ក៏ប៉ុន្តែ ក្នុងសេចក្តីថ្លែងការណ៍មួយ ដែលចុះផ្សាយនៅថ្ងៃទី ១៣ ខែវិច្ឆិកា YouTube អះអាងថា ឆ្នាំ២០២០នេះ គឺខុសប្លែកជាងឆ្នាំរាល់ដង ក៏ព្រោះតែជំងឺរាតត្បាតសកលកូវីដ-១៩ ដូច្នេះហើយទើប YouTube សម្រេចផ្អាកធ្វើវីដេអូ Rewind បែបនេះ។
កាលពីឆ្នាំ២០១៩ សម្រាប់ទម្រង់នៃវីដេអូ Rewind របស់ YouTube ត្រូវបានជ្រើសរើសចេញពីវីដេអូដែលមានចំនួនចុច Like ច្រើនបំផុត។
អ្នកកាសែតម្នាក់ ឈ្មោះថា Chris Stokel-Walker ដែលសរសេរពី YouTube និងបណ្ដាញសង្គមដទៃទៀត បានប្រាប់ទូរទស្សន៍ BBC ថា វាជារឿងដ៏អាម៉ាស់ខ្លាំងណាស់ដែលវីដេអូ Rewind ត្រូវផ្អាក ព្រោះថា YouTube បានប្រែក្លាយជាប្រភពដ៏សំខាន់មួយនៃសេវាកម្មកម្សាន្តនិងលើកទឹកចិត្តសម្រាប់មនុស្សអំឡុងពេលជំងឺកូវីដ-១៩។
យ៉ាងណាមិញ លោក បញ្ជាក់ថា សម្រាប់ឆ្នាំ២០២០នេះ YouTube ហាក់ពុំមានបង្កើតចំណីអារម្មណ៍អ្វីថ្មីច្រើនសម្រាប់អ្នកប្រើប្រាស់ ហើយ YouTube ត្រូវកម្មវិធីទូរសព្ទផលិតវីដេអូខ្លីៗ TikTok សឹងតែវ៉ាដាច់ទៅហើយរឿងបង្កើត Trends ថ្មី៕
© រក្សាសិទ្ធិដោយ thmeythmey.com