អន្តរជាតិ
រូបភាព៖ Reuters
×![]()
ដោយ: ធៀន ភារិន្ទ
ដៃគូសន្ទនាសន្តិសុខចតុភាគី(Quad) នៅថ្ងៃទី១៧ ខែវិច្ឆិកា បានចាប់ផ្តើមធ្វើសមយុទ្ធដំណាក់កាលពីរ នៅក្នុងសមុទ្រអារ៉ាប់ ដើម្បីប្រឆាំងនឹងការកើនឡើងឥទ្ធិពលរបស់ចិន។ ចិន បានបង្កើនឥទ្ធិពលរបស់ខ្លួន នៅក្នុងតំបន់សមុទ្រនេះ តាមរយៈគម្រោងគំនិតផ្តួចផ្តើម «ផ្លូវ និងខ្សែក្រវាត់»។
សមយុទ្ធយោធា Quad ដែលមានប្រទេសចំនួន៤ អាមេរិក ជប៉ុន អូស្ត្រាលី និងឥណ្ឌា បានធ្វើម្តងរួចមកហើយ នាដំណាក់កាលដំបូងថ្ងៃទី៣ ដល់ថ្ងៃទី៦ ខែវិច្ឆិកា នៅក្នុងឈូងសមុទ្រ Bengal ដែលមានឈ្មោះថា Malabar។ សមយុទ្ធយោធានេះ ត្រូវបានអូស្ត្រាលីចូលរួមជាលើកដំបូង បើគិតចាប់ពីឆ្នាំ២០១៥ ដែលជាឆ្នាំអាមេរិក ជប៉ុន និងឥណ្ឌា ធ្វើសមយុទ្ធត្រីភាគីលើកដំបូង។ នេះបើតាមការចុះផ្សាយរបស់ទីភ្នាក់ងារព័ត៌មាន Kyodo។
សមយុទ្ធបន្ទាប់ ជាដំណាក់កាលពីរ នៃ Malabar ដែលត្រូវបានធ្វើឡើង ចាប់ពីថ្ងៃទី១៧ ដល់ថ្ងៃទី២០ ខែវិច្ឆិកា នៅភាគខាងជើងនៃសមុទ្រអារ៉ាប់។ បើតាមការបញ្ជាក់របស់ក្រសួងការពារជាតិឥណ្ឌា សមយុទ្ធយោធា Malabar ជាការពង្រឹងសាមគ្គីភាពរវាងប្រទេសប្រកាន់លទ្ធប្រជាធិបតេយ្យទាំងបួនលើតំបន់សមុទ្រមួយនេះ។
យ៉ាងណាក៏ដោយ សមយុទ្ធនេះ ត្រូវបានមើលថា ជាការទប់ស្កាត់ឥទ្ធិពលរបស់ចិននៅក្នុងតំបន់សមុទ្រអារ៉ាប់។ សមុទ្រអារ៉ាប់ មានទីតាំងស្ថិតនៅជិតផ្លូវនាវាចរណ៍ ដែលភ្ជាប់ពីតំបន់អាស៊ី-បាស៊ីហ្វិក ទៅតំបន់មជ្ឈិមបូព៌ា។ តាមរយៈគំនិតផ្តួចផ្តើមរបស់ខ្លួន ចិនបានបង្កើនសកម្មភាពផ្លូវទឹកយ៉ាងខ្លាំង នៅក្នុងផ្លូវនាវាចរណ៍នេះ។ ថ្មីៗនេះ ចិនក៏បានបញ្ជូននាវាមុជទឹករបស់ខ្លួនមកក្នុងតំបន់នេះដែរ។
សមយុទ្ធយោធាដំណាក់កាលពីរនេះ មានវត្តមានរបស់ក្រុមនាវាដឹកយុទ្ធហោះរបស់ឥណ្ឌា Vikramaditya, ក្រុមនាវាដឹកយន្តហោះរបស់អាមេរិក Nimitz, នាវា Ballarat របស់អូស្ត្រាលី និងនាវាពិឃាដ Murasame និងនាវាមុជទឹក ដែលជារបស់កងស្វ័យការពារជប៉ុន។
សមយុទ្ធយោធា Malabar បានចាប់ផ្តើមឡើងតាំងពីឆ្នាំ១៩៩២ មកម្លេះ ប៉ុន្តែកាលនោះ មានតែអាមេរិក និងឥណ្ឌាប៉ុណ្ណោះ។ ជប៉ុន បានចូលរួមសមយុទ្ធនេះ នៅឆ្នាំ២០១៥ និងប្រទេសចុងក្រោយ គឺអូស្ត្រាលី ដែលបានចូលរួម នៅក្នុងឆ្នាំ២០២០ ៕
Tag:
អាមេរិក
អូស្ត្រាលី
ជប៉ុន
ចិន
ឥណ្ឌា
Quad
© រក្សាសិទ្ធិដោយ thmeythmey.com
