COVID-19
អន្តរជាតិ
ក្រុមហ៊ុនឱសថ Pfizer គ្រោងសុំការអនុញ្ញាតប្រើប្រាស់បន្ទាន់ ក្រោយវ៉ាក់សាំងខ្លួនមានប្រសិទ្ធភាព៩៥ភាគរយ
វ៉ាក់សាំងបង្ការជំងឺCOVID-19 របស់ក្រុមហ៊ុនPfizer។ រូបភាព៖AFP
×![]()
វ៉ាក់សាំងបង្ការជំងឺ COVID-19 ដែលអភិវឌ្ឍដោយក្រុមហ៊ុនឱសថ Pfizer និង BioNTech មានប្រសិទ្ធភាព៩៥ភាគរយ ក្រោយការធ្វើតេស្តចប់សព្វគ្រប់។ ក្រុមហ៊ុន Pfizer នឹងស្នើសុំការអនុញ្ញាតឲ្យប្រើប្រាស់បន្ទាន់វ៉ាក់សាំងរបស់ខ្លួន ខណៈការដឹកជញ្ជូនអាចធ្វើឡើងនៅចុងឆ្នាំ២០២០ នេះ។ ទោះជាយ៉ាងណា បញ្ហាប្រឈមក្នុងការដឹកជញ្ជូន ទំនងជាបង្អាក់ការចែកចាយវ៉ាក់សាំងនេះ។ 
លទ្ធផលចុងក្រោយនៃការសាកល្បងវ៉ាក់សាំង COVID-19 របស់ក្រុមហ៊ុន Pfizer បង្ហាញថា វ៉ាក់សាំង មានប្រសិទ្ធភាពដល់ទៅ៩៥ភាគរយ ដែលលើសលទ្ធផលបឋម៥ភាគរយ។ ក្រោយចេញលទ្ធផលនេះ ក្រុមហ៊ុន Pfizer អះអាងថា ខ្លួននឹងស្នើសុំការប្រើប្រាស់វ៉ាក់សាំងនេះសម្រាប់គ្រាអាសន្នពីអាជ្ញាធរស្បៀង និងឱសថអាមេរិក(FDA) នៅក្នុងសប្តាហ៍ទី៣ នៃខែវិច្ឆិកា។
លោក Albert Bourla នាយកប្រតិបត្តិរបស់Pfizer បានលើកឡើងថា៖«លទ្ធផលនៃការសិក្សាបង្ហាញពីជំហានយ៉ាងសំខាន់រយៈពេល៨ខែ ក្នុងការស្វែងរកវ៉ាក់សាំងដែលមានសមត្ថភាពក្នុងការជួយបញ្ចប់ជំងឺឆ្លងនេះ»។ លោកបន្ថែមថា ដោយមានមនុស្សរាប់សែននាក់ឆ្លងជំងឺ COVID-19 ប្រចាំថ្ងៃ វ៉ាក់សាំងដែលមានប្រសិទ្ធភាព និងសុវត្ថិភាព ជាតម្រូវការចាំបាច់ និងប្រញាប់ខ្លាំង។
ជាទូទៅ ការទទួលវ៉ាក់សាំងមានចំនួន២ដង ដោយការចាក់វ៉ាក់សាំងលើកទី២ ធ្វើឡើងរយៈពេល២៨ថ្ងៃក្រោយការទទួលបានវ៉ាក់សាំងលើកទី១។ ប៉ុន្តែសម្រាប់វ៉ាក់សាំងរបស់ Pfizer ការចាក់លើកទី២មានរយៈពេល២១ថ្ងៃក្រោយការចាក់វ៉ាក់សាំងលើកទី១។ បន្ថែមពីនេះ FDA ក៏កំណត់ផងដែរថា វ៉ាក់សាំងត្រូវមានប្រសិទ្ធភាពយ៉ាងហោចណាស់៥០ភាគរយ។
វ៉ាក់សាំងរបស់ Pfizer ជាវ៉ាក់សាំងប្រភេទថ្មីដែលប្រើប្រាស់បច្ចេកវិទ្យា mRNA ដែលបញ្ជូនសារធាតុសេនេទិកទៅក្នុងរាងកាយរបស់មនុស្ស ដើម្បីឲ្យកោសិកបង្កើតប្រូតេអ៊ីនប្រឆាំងនឹងវីរុស។ ការធ្វើបែបនេះ ប្រៀបដូចជាការបង្រៀនភាពស៊ាំរបស់រាងកាយឲ្យស្គាល់ និងត្រៀមខ្លួនកំចាត់មេរោគ SARS-CoV-2 ដែលបង្កទៅជាជំងឺCOVID-19 នៅពេលចូលទៅក្នុងរាងកាយ។
បើទោះបីជាលទ្ធផលធ្វើតេស្តអាចនឹងផ្តល់ក្តីសង្ឃឹមយ៉ាងណាក្តី វ៉ាក់សាំងរបស់Pfizer នៅជួបបញ្ហាប្រឈមចម្បងមួយចំនួនការស្តុកទុក និងការដឹកជញ្ជូន ក៏ដូចជាការផលិត។ ដើម្បីរក្សាកុំវ៉ាក់សាំងនេះខូច កន្លែងផ្ទុកវ៉ាក់សាំង ត្រូវមានសីតុណ្ហភាព៧០អង្សាក្រោមសូន្យ ដែលទូទឹកកកធម្មតាពុំអាចធ្វើបាន ហើយត្រូវការទូទឹកកកពិសេសដែលមានតម្លៃថ្លៃ។ អ្នកវិទ្យាសាស្ត្ររបស់ Pfizer ក៏អះអាងថា ពេលដាក់ក្នុងទូទឹកកក គេមិនត្រូវបើកទូនេះលើសពី២ដងក្នុងមួយថ្ងៃ និងលើសពី១នាទីឡើយ។
បញ្ហាដូចគ្នាក៏ចោទឡើងចំពោះការដឹកជញ្ជូនផងដែរ ទាំងក្នុងទឹកដីអាមេរិក និងជុំវិញពិភពលោក ដោយសារការដឹកជញ្ជូនយូរអាចនឹងធ្វើឲ្យវ៉ាក់សាំងខូច ឬសីតុណ្ហភាពកើនឡើងនៅពេលកំពុងដឹកជញ្ជូន។ ដើម្បីដោះស្រាយបញ្ហានេះ Pfizer សម្រេចប្រើប្រាស់ទឹកកកស្ងួត។ ចំពោះការផលិតវិញ ក្រុមហ៊ុនេះអាចផលិតបានចំនួន៥០លានដូស គិតត្រឹមចុងឆ្នាំ២០២០ និង១,៣ពាន់លានដូសសម្រាប់ឆ្នាំ២០២១។
ក្រៅតែពីវ៉ាក់សាំងរបស់Pfizer វ៉ាក់សាំងរបស់ក្រុមហ៊ុនModernaមានប្រសិទ្ធិភាព៩៤,៥ភាគរយដែរ និងមិនត្រូវការសីតុណ្ហភាពត្រជាក់ខ្លាំងក្នុងការរក្សាទុកនោះទេ៕
© រក្សាសិទ្ធិដោយ thmeythmey.com
