អន្តរជាតិ
នាវាមុជទឹកតៃវ៉ាន់ (រូបភាព៖ Reuters)
×![]()
រដ្ឋាភិបាលតៃវ៉ាន់ នៅថ្ងៃទី ២០ ខែវិច្ឆិកា បានប្រកាសថា ខ្លួននឹងចាប់ផ្ដើមកសាងនាវាមុជទឹកផលិតក្នុងស្រុកមួយគ្រឿងដំបូងក្នុងចំណោម៨គ្រឿងនាសប្ដាហ៍ក្រោយ ដែលមានអ្នកស្រីប្រធានាធិបតី Tsai Ing-wen ជាអធិបតីក្នុងកម្មវិធី។ គម្រោងដ៏ចម្រូងចម្រាសនេះ មានគោលដៅពង្រឹងសមត្ថភាពការពារជាតិរបស់កោះតៃវ៉ាន់នៅចំពោះមុខការធ្វើទំនើបកម្មយ៉ាងលឿនរហ័សរបស់យោធាចិន។
ក្នុងសេចក្តីថ្លែងការណ៍មួយ អ្នកនាំពាក្យការិយាល័យប្រធានាធិបតីតៃវ៉ាន់ លោក Xavier Chang បានអះអាងថា ផែនការកសាងនាវាមុជទឹកនេះ គឺជាចំណុចដ៏ចម្បងមួយនៃការធ្វើទំនើបកម្មយោធារបស់អ្នកស្រីប្រធានាធិបតី Tsai Ing-wen និងគម្រោងពឹងផ្អែកលើខ្លួនឯងក្នុងវិស័យការពារជាតិ។
«នេះ តំណាងឲ្យព្រឹត្តិការណ៍ជាប្រវត្តិសាស្ត្រថ្មីមួយក្នុងផែនការផលិតនាវាមុជទឹកថ្នាក់ជាតិ»។ លោក Chang បញ្ជាក់បែបនេះ មុននឹងបន្ថែមថា អ្នកស្រី Tsi ក៏នឹងមានវត្តមានដ៏ខ្ពង់ខ្ពស់ក្នុងពិធីកាត់ខ្សែបូបើកការដ្ឋានសាងសង់នាវាមុជទឹកនាថ្ងៃអង្គារទី ២៤ ខែវិច្ឆិកាខាងមុខផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
នាវាមុជផលិតក្នុងស្រុកលើកដំបូងនេះ គ្រោងដាក់ឲ្យប្រើប្រាស់នាចុងឆ្នាំ២០២៤។ កោះតៃវ៉ាន់ ដែលចិនចាត់ទុកជាដែនដីរបស់ខ្លួន បច្ចុប្បន្នមាននាវាមុជទឹក៤គ្រឿង ក្នុងនោះ២មានអាយុកាលចំណាស់ តាំងពីសង្គ្រាមលោកលើកទី២ ហើយផលិតដោយបរទេស។
កងទ័ពជើងទឹករបស់តៃវ៉ាន់ ពុំអាចប្រៀបបាននឹងរបស់ចិនឡើយ ហើយនេះមិនទាន់និយាយដល់កញ្ចប់ថវិកាជាតិរវាងប្រទេសទាំងពីរផង។ តួយ៉ាង ក្នុងឆ្នាំ២០១៩ ចិនចាយ២៥០ពាន់លានដុល្លារលើវិស័យការពារ ខណៈតៃវ៉ាន់ចាយតែជាង១១ពាន់លានដុល្លារប៉ុណ្ណោះ។
គួរបញ្ជាក់ដែរថា កាលពីខែឧសភា សហរដ្ឋអាមេរិក បានយល់ព្រមលក់ក្បាលគ្រាប់បាញ់ចេញពីនាវាមុជទឹកក្នុងទំហំទឹកប្រាក់ ១៨០លានដុល្លារ ទៅឲ្យកោះតៃវ៉ាន់ ពង្រឹងសមត្ថភាពការពារជាតិ។ សព្វាវុធនេះ រំពឹងដឹកដល់ទឹកដីតៃវ៉ាន់នាចុងឆ្នាំ២០២០នេះ។ ក្រុងប៉េកាំងប្រឆាំងនឹងគម្រោងលក់អាវុធនេះ ហើយអះអាងថាវាបំផ្លាញអធិបតេយ្យភាពនិងសន្តិសុខជាតិចិន៕
Tag:
ចិន
តៃវ៉ាន់
នាវាមុជទឹក
© រក្សាសិទ្ធិដោយ thmeythmey.com
