អន្តរជាតិ
លោកNicolas Sarkozy អតីតប្រធានាធិបតីបារាំង។ រូបភាព៖AFP
×![]()
អតីតប្រធានាធិបតីបារាំងលោក នីកូឡាស់ សាកូហ្ស៊ី (Nicolas Sarkozy) នៅថ្ងៃទី២៣ វិច្ឆិកាឡើងសវនាការក្នុងក្តីក្តាំរឿងសូកប៉ាក់ចៅក្រម ប្រើប្រាស់ឥទ្ធិពលដើម្បីបានព័ត៌មានស្តីពីការស៊ើបអង្កេតលើរូបលោក និងអំពើពុករលួយ។ ការស៊ើបអង្កេត និងក្តីក្តាំក្នុងតុលាការនេះ នឹងអាប់អោនដល់អាជីពនយោបាយរាប់ឆ្នាំរបស់លោក។
លោក នីកូឡាស់ សាកូហ្ស៊ី ជាប្រធានាធិបតីបារាំងពីឆ្នាំ២០០៧ ដល់២០១២។ រដ្ឋអាជ្ញាបារាំង បានចោទលោកពីបទប្រើប្រាស់ឥទ្ធិពលដើម្បីផ្តល់តំណែងនៅម៉ូណាកូទៅចៅក្រម Gilbert Azibert ដើម្បីទទួលបានព័ត៌មានស្តីពីការស៊ើបអង្កេតលើរូបលោកក្នុងការទទួលថវិការមិនស្របច្បាប់ក្នុងយុទ្ធនាការឃោសនាបោះឆ្នោតប្រធានាធិបតីឆ្នាំ២០០៧ ពីលោកស្រី Liliane Bettencourt អ្នកស្នងតំណែងក្រុមហ៊ុន L’Oreal ។ នេះបើយោងតាមទីភ្នាក់ងារព័ត៌មាន Reuters ។
លោក សាកូហ្ស៊ី បដិសេធនូវរាល់ការចោទប្រកាន់ទាំងអស់។ លោកអះអាងថា បទចោទមកលើរូបលោកគឺពាក់ព័ន្ធទៅនឹងរឿងនយោបាយ។ អតីតប្រធានាធិបតីបារាំងរូបនេះ បន្តមានឥទ្ធិពលក្នុងឆាកនយោបាយបារាំង ជាពិសេសក្នុងចំណោមអ្នកអភិរក្សនិយម។
ចាប់តាំងតែពីឆ្នាំ២០១៣ មក អ្នកស៊ើបអង្កេតបានលួចស្តាប់ទូរស័ព្ទរបស់លោក សាកូហ្ស៊ី និងមេធាវី Thierry Herzog។ គ្រានោះអ្នកស៊ើបអង្កេតកំពុងស្វែងរកព័ត៌មានជុំវិញការសង្ស័យដែលលោក សាកូហ្ស៊ី ទទួលបានប្រាក់ពីមេដឹកនាំផ្តាច់ការលីប៊ី លោកមូអាម៉ា ហ្គាដាហ្វ៊ីក្នុងយុទ្ធនាការឃោសនាបោះឆ្នោតប្រធានាធិបតីឆ្នាំ២០០៧។
តាមរយៈការស្តាប់នេះ រដ្ឋអាជ្ញាបារាំងអះអាងថា លោក សាកូហ្ស៊ី និងលោក Herzgo បានពិភាក្សាគ្នាជាច្រើនដងក្នុងការទាក់ទងលោក Azibert ដែលជាចៅក្រមតុលាការព្រហ្មទណ្ឌកំពូល។ រដ្ឋអាជ្ញាបន្តថា លោក សាកូហ្ស៊ី សន្យាផ្តល់ការងារខ្ពស់មួយឲ្យលោក Azibert នៅម៉ូណាកូ។ ប៉ុន្តែ លោក សាកូហ្ស៊ី អះអាងក្នុងទូរទស្សន៍ BFM ថា លោក Azibert មិនដែលទទួលបានការងារនេះឡើយ។
លោក Herzgo លោក សាកូហ្ស៊ី និងលោក Azibert ត្រូវចូលសវនាការពីបទពុករលួយ និងប្រើប្រាស់ឥទ្ធិពលដើម្បីបានរបស់តបមកវិញ។ បុគ្គលទាំង៣ខាងលើ ក៏ជាប់ចោទពីការបំពានការសំងាត់ក្នុងវិជ្ជាជីវៈផងដែរ។ បើរកឃើញថាមានទោសមែន បុគ្គលទាំង៣ខាងលើអាចជាប់ពន្ធាគារដល់១០ឆ្នាំ និងការពិន័យជាប្រាក់យ៉ាងសន្ធឹកសន្ធាប់។
បន្ថែមពីនេះ ក្នុងខែមីនា ដល់ខែឧសភា ឆ្នាំ២០២១ លោក សាកូហ្ស៊ី ក៏ត្រូវឡើងសវនាការពីបទចោទ លើការបំពានច្បាប់ហិរញ្ញវត្ថុស្តីពីយុទ្ធនាការបោះឆ្នោត ក្នុងឆ្នាំ២០១២ផងដែរ។ ក្នុងរឿងក្តីនេះ អតីតប្រធានាធិបតីបារាំងត្រូវជាប់ការសង្ស័យក្នុងការលាក់ខ្ទង់ចំណាយពិតប្រាកដសម្រាប់យុទ្ធនាការឃោសនា។
ក្រៅពីរឿងខាងលើ រដ្ឋអាជ្ញាបារាំងកំពុងបន្តស៊ើបអង្កេតលើការលើកឡើងថា អតីតមេដឹនាំផ្តាច់ការលីប៊ី មូអាម៉ា ហ្គាដាហ្វ៊ី ផ្តល់ប្រាក់រាប់លានអឺរ៉ូតាមវ៉ាលីមកឲ្យលោក សាកីហ្ស៊ី សម្រាប់ការចំណាយលើយុទ្ធនាការឃោសនាបោះឆ្នោតប្រធានាធិបតីឆ្នាំ២០០៧។ អ្នកដែលចោទលោក សាកូហ្ស៊ី ពីរឿងនេះគឺអ្នកជំនួញសញ្ជាតិបារាំងនិងលីបង់ម្នាក់ ប៉ុន្តែបានដកពាក្យទៅវិញ។ យ៉ាងណាក៏ដោយតុលាការបារាំងនៅបន្តស៊ើបអង្កេតលើរឿងនេះ៕
Tag:
បារាំង
នីកូឡាស់ សាកូហ្ស៊ី
© រក្សាសិទ្ធិដោយ thmeythmey.com
