COVID-19
ជាតិ
កម្ពុជា បន្តផ្តល់ម៉ាស់និងសម្ភារពេទ្យដល់ទីម័រ ខណៈមីយ៉ាន់ម៉ា ថ្លែងអំណរគុណ សម្តេចនាយករដ្ឋមន្រ្តី ហ៊ុន សែន ជួបពិភាក្សាជាមួយលោក Ermenegildo Kupa ឯកអគ្គរដ្ឋទូតនៃសាធារណរដ្ឋប្រជាធិបតេយ្យទីម័រខាងកើត កាលពីថ្ងៃទី២៧ ខែឧសភា ឆ្នាំ២០២០ នៅវិមានសន្តិភាព។
× បន្ទាប់ពីឡាវនិងមីយ៉ាន់ម៉ា គឺទីម័រខាងកើត ដែលបានទទួលអំណោយជាម៉ាស់និងសម្ភារពេទ្យពីកម្ពុជា សម្រាប់ប្រើប្រាស់ក្នុងការទប់ស្កាត់នឹងជំងឺកូវីដ-១៩។ អំណោយទាំងនោះ នឹងត្រូវដឹកទៅកាន់ទីម័រខាងកើត នៅថ្ងៃទី២៩ ខែវិច្ឆិកា ឆ្នាំ២០២០។
ទិន្នន័យ បង្ហោះលើទំព័រហ្វេសប៊ុករបស់លោក ផៃ ស៊ីផាន អ្នកនាំពាក្យរដ្ឋាភិបាល បានឲ្យដឹងថា អំណោយ ដែលកម្ពុជា ឧបត្ថម្ភដល់ទីម័រខាងកើត រួមមាន ម៉ាស់១លាន៦ម៉ឺន វ៉ែនតាការពារ១ម៉ឺន សម្លៀកបំពាក់ការពារ១ម៉ឺន របាំងការពារមុខ១ម៉ឺន ឧបករណ៍វាស់កម្តៅ២៥០ ម៉ាស៊ីនជំនួយដល់ការដកដង្ហើម១០ ម៉ាស៊ីនតាមដានសញ្ញាជីវិត១០ ម្ស៉ៅថ្នាំបាញ់សម្លាប់មេរោគ២៥០ធុង ស្បែកជើងវែង៥០០ និង ទឹកសាប៊ូលាងដៃ១០០។
ជាមួយគ្នានេះ កម្ពុជា បានទទួលលិខិតថ្លែងអំណរគុណពីមីយ៉ាន់ម៉ា ចំពោះការផ្តល់ជំនួយជាម៉ាស់២លាន និងសម្ភារពេទ្យប្រមាណ១០មុខទៀត។ លិខិតនេះ ធ្វើឡើងនៅថ្ងៃទី២៦ ខែវិច្ឆិកា ឆ្នាំ២០២០ ដោយអ្នកស្រី អ៊ុងសាន ស៊ូជី ទីប្រឹក្សារដ្ឋរបស់មីយ៉ាន់ម៉ា ផ្ញើជូនសម្តេចនាយករដ្ឋមន្ត្រី ហ៊ុន សែន។
ក្នុងលិខិតថ្លែងអំណរគុណ អ្នកស្រី ចាត់ទុកថា ជាការផ្តល់ជំនួយដ៏មានតម្លៃ និងឆ្លុះបញ្ចាំងពីចំណងមិត្តភាពពិតប្រាកដ ដែលកម្ពុជា មានចំពោះមីយ៉ាន់ម៉ា។ បន្ថែមពីនេះ អ្នកស្រី ចាត់ទុកជំនួយនេះ ថាជាការឧបត្ថម្ភដ៏ធំធេងដល់មីយ៉ាន់ម៉ា ដែលកំពុងស្ថិតក្នុងកាលៈទេសៈដ៏លំបាកដោយសារជំងឺកូវីដ-១៩។
អ្នកស្រី ជម្រាបសម្តេច ហ៊ុន សែន ថា មីយ៉ាន់ម៉ា នឹងអាចជន្នះលើបញ្ហាប្រឈម ហើយនឹងងើបឡើងកាន់តែរឹងមាំខ្លាំងក្លាថែមទៀត។ ជាមួយគ្នានេះ អ្នកស្រី បានអបអរសាទរសម្តេច ក្នុងការគ្រប់គ្រងជំងឺកូវីដ-១៩ ដោយជោគជ័យ។
មិនខុសពីមីយ៉ាន់ម៉ា ឡាវ ទទួលបានម៉ាស់២លាននិងសម្ភារពេទ្យប្រមាណ១០មុខដូចគ្នាពីកម្ពុជា។ ឡាវ ជាប្រទេសដំបូងគេ ដែលទទួលបានការឧបត្ថម្ភជាម៉ាស់និងសម្ភារពេទ្យពីកម្ពុជា។ មេដឹកនាំឡាវ ក៏បានផ្ញើលិខិតថ្លែងអំណរគុណដល់សម្តេចនាយករដ្ឋមន្ត្រី ហ៊ុន សែន ដែរ។
គិតត្រឹមថ្ងៃទី២៧ ខែវិច្ឆិកា ឆ្នាំ២០២០ កម្ពុជា រកឃើញអ្នកឆ្លងជំងឺកូវីដ-១៩ ៣០៧នាក់ ជាសះស្បើយ២៩៨នាក់ ឡាវ រកឃើញអ្នកឆ្លង៣៩នាក់ ជាសះស្បើយ២៤នាក់ ហើយមីយ៉ាន់ម៉ា រកឃើញអ្នកឆ្លងជាង៨,៥ម៉ឺននាក់ ជាសះស្បើយជាង៦,៤ម៉ឺននាក់ ស្លាប់ជាង១,៨ពាន់នាក់។ កម្ពុជានិងឡាវ គ្មានអ្នកស្លាប់ដោយសារជំងឺកូវីដ-១៩នោះទេ៕
Tag:
COVID-19
កម្ពុជា
ទីម័រខាងកើត
មីយ៉ាន់ម៉ា
ឧបត្ថម្ភម៉ាស់
© រក្សាសិទ្ធិដោយ thmeythmey.com