COVID-19
ជាតិ
បិទផ្សារអ៊ីអន១ បណ្ដោះអាសន្ន ក្រោយអ្នកផ្ទុកកូវីដ-១៩ម្នាក់បានទៅទីនោះ
× ភ្នំពេញ៖ ក្រសួងសុខាភិបាល បានសម្រេចបិទផ្សារអ៊ីអន១ បណ្តោះអាសន្ន ក្រោយអ្នកផ្ទុកកូវីដ-១៩ម្នាក់ បានទៅទីនោះ។ នេះបើតាមសារសំឡេងរបស់ លោកស្រី យក់ សម្បត្តិ អគ្គនាយករដ្ឋបាល និងហិរញ្ញវត្ថុ នៃក្រសួងសុខាភិបាល ដែលចែកផ្សាយតាមប្រព័ន្ធតេឡេក្រាម។
បើតាមសារសំឡេងដដែល ស្ត្រីខ្មែរដែលមានផ្ទុកកូវីដ-១៩ នេះពុំមានប្រវត្តិធ្វើដំណើរចេញ-ចូលក្រៅប្រទេសនោះទេ ហើយក្នុងរយៈពេល១០ថ្ងៃចុងក្រោយនេះ គឺគាត់បានធ្វើដំណើរឡើងចុះភ្នំពេញ-សៀមរាប។ នៅភ្នំពេញ លោកស្រី យ៉ក់ សម្បត្តិបញ្ជាក់ថា អ្នកផ្ទុកជំងឺកូវីដ-១៩ រូបនេះ បានធ្វើដំណើរទៅផ្សារអ៊ីអន១ ។
លោកស្រី យក់ សម្បត្តិ អគ្គនាយករដ្ឋបាល និងហិរញ្ញវត្ថុ នៃក្រសួងសុខាភិបាល ឲ្យដឹងទៀតថា ក្រសួងសុខាភិបាល កំពុងតែស្វះស្វែងរកអ្នកដែលមានពាក់ព័ន្ធនឹងស្ត្រីដែលឆ្លងកូវីដ-១៩ ថ្មីនេះ។ ក្រៅពីនេះ ក្រសួងសុខាភិបាល ក៏គ្រោងស្នើសុំគោលការណ៍ ដើម្បីធ្វើតេស្តជំងឺកូវីដ-១៩ លើមន្ត្រីជាន់ខ្ពស់មួយចំនួននៅក្រសួងមហាផ្ទៃផងដែរ ដោយសារតែស្វាមី ស្ត្រីដែលផ្ទុកកូវីដ-១៩ រូបនេះ បានចូលរួមកិច្ចប្រជុំមួយ នៅក្រសួងមហាផ្ទៃ។
ទន្ទឹមនឹងនេះ លោកស្រី យ៉ក់ សម្បត្តិក៏អំពាវនាវ ឲ្យអ្នកដែលសង្ស័យថាអាចមានពាក់ព័ន្ធនឹងករណីកូវីដ-១៩ ថ្មីនេះ រួសរាន់ធ្វើតេស្តរកកូវីដ-១៩ និងចាប់ផ្តើមធ្វើចត្តាឡីស័កផងដែរ៕
© រក្សាសិទ្ធិដោយ thmeythmey.com