កីឡាអន្តរជាតិ
អន្តរជាតិ
Tyson ប្តេជ្ញាសង្គ្រោះមនុស្សតាមរយៈប្រដាល់ ក្រោយស្មើ Jones ក្នុងការប្រកួតសប្បុរសធម៌
×![]()
ដោយ: ទេព ពិទូរ្យ
Mike Tyson និង Roy Jones Jr. ស្មើគ្នា ក្នុងការប្រកួតសប្បុរសធម៌ នៅទីក្រុង Los Angeles សហរដ្ឋអាមេរិក នាថ្ងៃទី២៩ ខែវិច្ឆិកា។ អតីតម្ចាស់ខ្សែក្រវាត់ទម្ងន់ធ្ងន់ពិភពលោក Tyson អះអាងថានឹង បង្ហាញខ្លួនលើសង្វៀនប្រដាល់បន្តបន្ទាប់ទៀតក្នុងបុព្វហេតុមនុស្សធម៌ ក្រោយការវិលត្រឡប់នេះ។
Tyson វ័យ៥៤ឆ្នាំរូបនេះបានបង្ហាញខ្លួនជាលើកដំបូង ក្រោយអវត្តមានលើសង្វៀនប្រដាល់រយៈពេល ១៥ ឆ្នាំ ដោយត្រូវតតាំងជាមួយអតីតកំពូលអ្នកប្រដាល់អាមេរិកដូចគ្នា Roy Jones ដែលមានវ័យ ៥១ ឆ្នាំ។
ជំនួបរវាងកីឡាករដែលបូកអាយុចូលគ្នាស្មើ១០៥ឆ្នាំទាំងពីរនេះ ធ្វើឡើងក្នុងចំនួន៨ទឹក និងចាក់ផ្សាយតាមកញ្ចក់ទូរទស្សន៍ដោយមិនមានការបង់ប្រាក់ឡើយ។ យ៉ាងណា ការប្រកួតបែបកម្សាន្តនេះ អាចទទួលបានប្រាក់មួយចំនួនសម្រាប់កម្មវិធីសប្បុរសធម៌។
ក្រោយការប្រកួត៨ទឹកពេញ អាជ្ញាកណ្តាលបានឲ្យ Tyson និង Jones ស្មើគ្នា តាមរយៈការដាក់ពិន្ទុពីចៅក្រម៤រូប។ ចំណោមចៅក្រម៤រូប ក្នុងនោះមានមួយរូបជាតារាចម្រៀងរ៉េបដ៏ល្បីរបស់អាមេរិក Snoop Dogg ផងដែរ។ Snoop Dogg បានរៀបរាប់ពីសកម្មភាពប្រកួតថា៖ «ដូចមើលឪពុកមារបស់ខ្ញុំពីរនាក់កំពុងប្រយុទ្ធគ្នាដើម្បីដើម្បីដណ្តើមសាច់អាំង»។
ក្រោយចប់ការប្រកួតនេះ Tyson ម្ចាស់ខ្សែក្រវាត់ពិភពលោក WBA, WBC និង IBF បានប្រាប់អ្នកសារព័ត៌មានថា រូបគេនឹងប្រឹងប្រែងហ្វឹកហាត់បន្ថែមដើម្បីឡើងសង្វៀនជាបន្តបន្ទាប់ទៀតក្នុងលក្ខណមិនអាជីពក្នុងគោលបំណងជួយ និងសង្គ្រោះមនុស្ស។លោកថា៖ «នេះជំនួបធំជាងការប្រកួតជើងឯក។ យើងធ្វើគ្រាប់យ៉ាងដើម្បីមនុស្សធម៌ យើងកំពុងជួយប្រជាជន។ ខ្ញុំរីករាយ ហើយខ្ញុំនឹងបន្តទៅមុខទៀត និងធ្វើអ្វីៗជាច្រើនទៀតក្នុងបុព្វហេតុសប្បុរសធម៌»។
Mike Tyson មានប្រវត្តិប្រកួតកម្រិតអាជីពចំនួន៥៨ដង ក្នុងនោះឈ្នះ៥០ដង ចាញ់៦ និងមិនមានការប្រកាសលទ្ធផលផ្លូវការ២លើក។
ចំណែកដៃគូ Tyson ដែលជាមិត្តរួមជាតិអាមេរិក Roy Jones អតីតម្ចាស់ខ្សែក្រវាត់ពិភពលោក៤ស្ថាប័នផ្សេងគ្នា មានប្រវត្តិប្រកួត៧៥ដង ឈ្នះ៦៦ដង ចាញ់៩ដង ផ្តួលដៃគូឲ្យសន្លប់៤៧លើក ធ្លាប់ដណ្តើមបានខ្សែក្រវាត់ពិភពលោកលើប្រភេទទម្ងន់ Middleweight, Super-Middleweight, Light-Heavyweight និង Heavyweight អំឡុងពេលប្រកបអាជីពប្រដាល់នេះរយៈពេល៣០ឆ្នាំ៕
Tag:
Mike Tyson
Roy Jones Jr.
សប្បុរសធម៌
© រក្សាសិទ្ធិដោយ thmeythmey.com
