សង្គមអន្តរជាតិ
អន្តរជាតិ
១៣៨ឆ្នាំក្រោយបង្កើតឡើង សួនសត្វជប៉ុនមួយទើបមានកូនដំរីចាប់កំណើតជាលើកដំបូង កូនដំរីទីមួយដែលកើតក្នុងសួនសត្វជប៉ុនមួយ បង្កើតឡើងតាំងពី១៣៨ឆ្នាំមុន ។ រូបពីសារព័ត៌មានជប៉ុន Asahi
× សួនសត្វដ៏ចំណាស់បំផុតមួយរបស់ជប៉ុន បានបង្ហាញជាសាធារណៈ កូនដំរីដំបូងដែលកើតនៅទីនោះ គិតចាប់តាំងពីសួនសត្វនេះ ត្រូវបានបង្កើតឡើងកាលពីជាង១សតវត្សរ៍កន្លងទៅ។ បន្ថែមពីបង្ហាញរូបរាងដ៏គួរឲ្យស្រលាញ់របស់កូនដំរីនេះ សួនសត្វនេះ ក៏បានស្នើសុំឲ្យសាធារណជនជួយពួកគេដាក់ឈ្មោះកូនដំរីមួយនេះថែមទៀតផង។
កូនដំរីឈ្មាលមួយក្បាលនេះ ត្រូវបានបង្ហាញជាសាធារណៈកាលពីថ្ងៃទី ១ ខែធ្នូ ជាលើកដំបូង ចាប់តាំងពីចាប់ប្រសូត្រពីផ្ទៃមេវានៅថ្ងៃទី ៣១ ខែតុលា នៅឯងសួនសត្វ Ueno ក្នុងទីក្រុងតូក្យូ។
មេរបស់កូនដំរីឈ្មោលនេះ ឈ្មោះថា «Authi» និងបារបស់វាឈ្មោះថា «Artid» ។ ដំរីទាំង២ក្បាលនេះ ជាអំណោយរបស់ប្រទសថៃ ក្នុងឆ្នាំ២០០២ ដើម្បីអបអរការប្រសូត្ររបស់ម្ចាស់ក្សត្រី Aiko ដែលជាបុត្រីមួយអង្គគត់របស់ព្រះអធិរាជជប៉ុន Naruhito និងអគ្គមហេសី Masako ។
សួនសត្វ Ueno ដែលត្រូវបានបង្កើតឡើងក្នុងឆ្នាំ១៨៨២ បានស្នើសុំឲ្យសាធារណជនបោះឆ្នោតតាមអនឡាញសម្រាប់ជ្រើសរើសឈ្មោះរបស់កូនដំរីមួយក្បាលនេះ ហើយបេក្ខភាពនៃឈ្មោះទាំងនេះ ត្រូវបានដាក់ស្នើដោយស្ថានទូតថៃប្រចាំក្រុងតូក្យូ។
ជម្រើសមានដូចជា «អរុណ» ដែលមានន័យថា ព្រះអាទិត្យដែលទើបភ្លឺច្រាលពីទិសបូព៌, «អស្ដង្គត» ដែលមានថា ព្រះអាទិត្យហៀបលិច ឬមួយទៀត គឺ «ព្រះអាទិត្យ» តែម្ដង។ ឈ្មោះដែលឈ្នះ នឹងត្រូវប្រកាសនាថ្ងៃទី ១៥ ខែធ្នូ ។
ការចូលទស្សនាកូនដំរី និងមេរបស់វា អាយុ ២២ឆ្នាំ ត្រូវកំណត់ត្រឹម២ម៉ោងក្នុងមួយថ្ងៃ ដើម្បីចៀសវាងការរំខានដល់សត្វទាំងពីរ។ កូនដំរីអាយុជាង១ខែនេះ មានកម្ពស់១០០សង់ទីម៉ែត្រ និង១២០គីឡូក្រាម នៅពេលកើត តែវាបានលូតលាស់គួរឲ្យកត់សម្គាល់មកដល់បច្ចុប្បន្ន។ ជារឿងដ៏អកុសល បារបស់កូនដំរីនេះ បានងាប់នៅអាយុ ២៣ឆ្នាំក្នុងខែសីហាកន្លងទៅដោយសារជំងឺ៕
© រក្សាសិទ្ធិដោយ thmeythmey.com