អង្គការសុខភាពពិភពលោក (WHO) បានណែនាំមិនឲ្យមានការពាក់ម៉ាស់អំឡុងពេលរាងកាយធ្វើសកម្មភាពកម្រិតធ្ងន់ដូចជា រត់ ហាត់ប្រាណ លើកទម្ងន់ជាដើម ព្រោះវាអាចបង្កឲ្យមានផលប៉ះពាល់ ដល់ប្រព័ន្ធបេះដូង និងប្រព័ន្ធសួត។ នេះបើតាមការចុះផ្សាយរបស់កាសែតSouth China Morning Post នៅថ្ងៃទី៣ ខែធ្នូ ដែលបន្តថា ការណែនាំនេះ មិនត្រូវបានអ្នកជំនាញយល់ស្របឡើយ។
ក្នុងពេលពិភពលោក កំពុងរងការអុកឡុកពីកូវីដ-១៩ មិនស្រាកស្រាន្ត អង្គការសុខភាពពិភពលោក បានបន្ថែមព័ត៌មានណែនាំមួយចំនួន ជុំវិញការពាក់ម៉ាស់។ ដូចការលើកឡើងកន្លងមក អង្គការសុខភាពពិភពលោក បានបញ្ជាក់ថា ម៉ាស់ មិនអាចជាអាវុធដ៏សំខាន់ ក្នុងការលុបបំបាត់កូវីដ-១៩ ទេ តែជាផ្នែកមួយនៃការយកឈ្នះលើជំងឺឆ្លងសកលនេះដែរ។ ប៉ុន្តែប្រជាជនទាំងអស់ គួរជៀសវាងពាក់ម៉ាស់ ក្នុងពេលធ្វើសកម្មភាពរាងកាយកម្រិតធ្ងន់មួយចំនួន ដូចជាការរត់ហាត់ប្រាណ លើកទម្ងន់ជាដើម។
បើទោះបីជាគ្មានការស្រាវជ្រាវឲ្យស៊ីជម្រៅលើបញ្ហាពាក់ម៉ាស់ ក្នុងពេលធ្វើលំហាត់ប្រាណខ្លាំងក្ដី WHO បានអះអាងដោយយកតាមការសិក្សាមួយចំនួន ថា ការពាក់ម៉ាស់ ក្នុងពេលធ្វើសកម្មភាពរាងកាយកម្រិតមធ្យម វាអាចនាំឲ្យមានផលប៉ះពាល់ទៅដល់ប្រព័ន្ធបេះដូង និងសួតជាដើម ទាំងលើមនុស្សដែលមានសុខភាពល្អ និងអ្នកមានជំងឺប្រព័ន្ធផ្លូវដង្ហើម។
ទន្ទឹមនេះ អ្នកដែលពាក់ឧបករណ៍ជំនួយផ្លូវដង្ហើមក៏ដូចជាអ្នកមានជំងឺផ្លូវដង្ហើម ឬជំងឺសួត ការពាក់ម៉ាស់ ក្នុងពេលធ្វើលំហាត់ប្រាណ វាអាចបង្កឲ្យមានស្ថានភាពអាក្រក់ថែមទៀត។ បើតាម WHO ប្រជាជនមិនគួរពាក់ម៉ាស់ ក្នុងពេលធ្វើសកម្មភាពរាងកាយកម្រិតធ្ងន់ គឺការម៉ាស់នឹងកាត់បន្ថយការដកដង្ហើមឲ្យបានត្រឹមត្រូវ ញើសដែលកើតចេញពីសកម្មភាពទាំងនោះ នឹងធ្វើឲ្យទទឹកម៉ាស់ ដែលធ្វើឲ្យពិបាកដកដង្ហើមថែមទៀត និងបង្កើតឲ្យមេរោគឲ្យកាន់តែច្រើន។
តាមរបាយការណ៍របស់ WHO ការរក្សាគម្លាតសុវត្ថិភាព និងការដកដង្ហើមចេញចូល ត្រូវមានគម្លាតយ៉ាងហោចណាស់ ១ម៉ែត្រ ទើបជាការល្អ។ បើសិនបើអ្នកហាត់ប្រាណមិនអាចរក្សាគម្លាតបានទេ មជ្ឈមណ្ឌលហាត់ប្រាណទាំងនោះ គួរតែបិទបណ្តោះអាសន្ន។ យ៉ាងណាក៏ដោយ សេចក្តីណែនាំរបស់អង្គការសុខភាពពិភពលោក គឺផ្ទុយពីស្រាវជ្រាវរបស់អ្នកជំនាញមួយចំនួន។
លោកស្រីវេជ្ជបណ្ឌិត Linsey Marr អ្នកជំនាញជំងឺឆ្លងនៅក្នុងខ្យល់ បានលើកយកកន្លែងហាត់ប្រាណមួយនៅក្នុងរដ្ឋ Virginia មកបកស្រាយថា ពេលមួយមានគ្រូបង្រៀនហាត់ប្រាណម្នាក់ឆ្លងកូវីដ-១៩ និងមានអ្នកហាត់ប្រាណចំនួន ៥០នាក់ ប៉ុន្តែអ្នកទាំងនោះ មិនបានឆ្លងកូរ៉ូណាវីរុសឡើយ ដោយសារម្នាក់ៗរក្សាគម្លាតប្រមាណ ៣ម៉ែត្រពីគ្នា ដែលនេះ គឺផ្ទុយសេចក្តីណែនាំរបស់WHO ដែលមានត្រឹម ១ម៉ែត្រ។
លោកស្រីវេជ្ជបណ្ឌិត បានបន្តទៀតថា ក្នុងពេលហាត់ប្រាណ មនុស្សមួយចំនួនប្រាកដជាដកដង្ហើមចេញចូលកម្រិតខ្លាំង ដែលនេះវាធ្វើឲ្យដំណក់ទឹកតូចៗ ខ្ទាតមកក្នុងខ្យល់កាន់តែឆ្ងាយ ដែលធ្វើឲ្យការរក្សាគម្លាតប្រមាណ ១,៨ម៉ែត្រ មិនអាចធានាសុវត្ថិភាពបានឡើយ។ ការណ៍នេះ មនុស្សមួយចំនួន គួរទៅហាត់ប្រាណពេលមានមនុស្សតិច ឬពាក់ម៉ាស់ ប្រសិនបើមានមនុស្សច្រើន។
ចំណែកអ្នកជំនាញវេជ្ជសាស្ត្របន្ទាន់មួយម្នាក់ទៀត លោកស្រីវេជ្ជបណ្ឌិត Megan Ranney បានបញ្ជាក់ថា ការណែនាំរបស់អង្គការសុខភាពពិភពលោក ជាការបំភ័យ ព្រោះវាហាក់ដូចជាមិនពិតឡើយ។ បើតាមលោកស្រីវេជ្ជបណ្ឌិត ការសិក្សាមួយចំនួន បានបង្ហាញថា ម៉ាស់ មិនអាចបង្អាក់ ការដកដង្ហើម ឬកម្រិតអុកស៊ីសែនឡើយ ក្នុងពេលហាត់ប្រាណ ចំណែកកម្រិតអុកស៊ីសែននៅក្នុងឈាម និងសាច់ដុំ ក៏មិនប៉ះពាល់អ្វីដែរ៕