Smallworld Smallband នឹងតំណាងកម្ពុជាចូលរួមមហោស្រព ROUND Festival នៅកូរ៉េខាងត្បូង

ជាតិ

តារាល្បីៗ

Smallworld Smallband នឹងតំណាងកម្ពុជាចូលរួមមហោស្រព ROUND Festival នៅកូរ៉េខាងត្បូង

05, Dec 2020 , 8:29 pm

រូបភាព

រូបពីហ្វេសប៊ុក Smallworld Smallband

ដោយ: ប៉ូ សាគុន

ភ្នំពេញ៖ Smallworld Smallband (ក្រុមតូច) នឹងចូលរួមប្រគំតន្ត្រីក្នុងមហោស្រព ROUND Festival រៀបចំដោយទូរទស្សន៍ KBS របស់កូរ៉េខាងត្បូង តាមរយៈអនឡាញ នៅថ្ងៃទី៦ ខែធ្នូ ឆ្នាំ២០២០នេះ។ ស្នាដៃបទចម្រៀងដែលទទួលបានការពេញនិយមខ្លាំង ពីអ្នកគាំទ្ររបស់ខ្លួនកន្លងមក Smallworld Smallband ក្រុមតូច បានយកទៅច្នៃបង្កើតថ្មី ដោយបញ្ចូលឧបករណ៍ភ្លេងបុរាណខ្មែរ ជាមួយភ្លេងបស្ចិមប្រទេស ដើម្បីចូលរួមផ្សព្វផ្សាយពីវប្បធម៌ខ្មែរនិងភាពច្នៃប្រឌិត លើឆាកអន្តរជាតិ។

កញ្ញា ឆាយ សម្បត្តិនីតា អ្នកគ្រប់គ្រងផ្នែកទំនាក់ទំនងព័ត៌មាន របស់ Smallworld Smallband បានបញ្ជាក់ប្រាប់សារព័ត៌មានថ្មីៗថា ក្រុមតូច នឹងនាំយកការបង្ហាញពីតន្ត្រី និងសំឡេងរបស់កម្ពុជានៅសតវត្សរ៍ទី២១ ផ្សារភ្ជាប់សិល្បៈបុរាណនិងសម័យ អមជាមួយនឹងការច្នៃប្រឌិតថ្មី ទៅក្នុងមហោស្រព ROUND Festival។ Smallworld Smallband ដែលជាក្រុមចម្រៀងមានប្រជាប្រិយភាព សម្រាប់ស្រទាប់យុវវ័យនេះ មានឆន្ទៈផ្សព្វផ្សាយពីទម្រង់សិល្បៈបុរាណខ្មែរ ផ្សារភ្ជាប់ជាមួយសិល្បៈសម័យ។

កញ្ញា ឆាយ សម្បត្តិនីតា បញ្ជាក់បន្ថែម៖«បទចម្រៀងដែលគាត់នឹងយកទៅបង្ហាញនៅក្នុងមហោស្រព គឺជាបទចម្រៀងដែលក្រុមតូចបានផ្សព្វផ្សាយរួច ហើយទទួលបានការគាំទ្រខ្លាំងពីទស្សនិកជន។ អ្វីដែលពិសេស គឺគាត់នឹងយកបទចម្រៀងទាំងនោះ ទៅច្នៃបង្កើតថ្មី ដោយបញ្ចូលភ្លេងឧបករណ៍បុរាណខ្មែរ និងភ្លេងក្លាសិករបស់បរទេស ឱ្យវាកាន់តែមានភាពទាក់ទាញ»។

ROUND Festival គឺជាមហោស្រពផ្លាស់ប្ដូរវប្បធម៌ និងពង្រឹងសាមគ្គីភាពរវាងប្រទេសអាស៊ានទាំង១០ និងកូរ៉េខាងត្បូង តាមរយៈតន្ត្រី ដែលប្រមូលផ្ដុំដោយសិល្បករតំណាងឱ្យប្រទេសនីមួយៗ។ ក្នុងនោះមានប្រទេស កម្ពុជា ថ្ងៃ ឡាវ វៀតណាម ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ឥណ្ណូនេស៊ី ប្រ៊ុយណេ និងកូរ៉េខាងត្បូង។

ទស្សនិកជនមកពីប្រទេសកូរ៉េខាងត្បូង និងបណ្ដាប្រទេសក្នុងតំបន់អាស៊ានទាំង១០ ក៏ដូចជានៅជុំវិញពិភពលោក អាចចូលទស្សនាដោយសេរីតាមរយៈអនឡាញ នៅថ្ងៃទី៦ ខែធ្នូ ឆ្នាំ២០២០។ សម្រាប់ព័ត៌មានបន្ថែម លោកអ្នកអាចតាមដានទំព័រហ្វេសប៊ុកផ្លូវការរបស់ Smallworld Smallband ៕