COVID-19
អន្តរជាតិ
កូវីដ-១៩៖ រដ្ឋមន្ត្រីឥណ្ឌូណេស៊ីម្នាក់ ត្រូវចាប់ខ្លួនរឿងទទួលសំណូកពីក្រុមហ៊ុនផ្ដល់ជំនួយឲ្យប្រជាជន ទីស្នាក់ការគណៈកម្មការបោសសម្អាតអំពើពុករលួយឥណ្ឌូណេស៊ី។ រូបភាព Jakarta Globe
× រដ្ឋមន្ត្រីកិច្ចការសង្គមរបស់ឥណ្ឌូណេស៊ី លោក Juliari Batubara ត្រូវបានចាប់ខ្លួនដោយអាជ្ញាធរប្រឆងអំពើពុករលួយពាក់ព័ន្ធការសង្ស័យថា បានទទួលលុយប្រមាណមួយលានពីរសែនដុល្លារពីក្រុមហ៊ុនឯកជនពីរ ដែលទទួលបានសិទ្ធិចែកចាយជំនួយបន្ទានដល់ពលរដ្ឋរងគ្រោះដោយសារជំងឺកូវីដ-១៩ ។ បើរកឃើញថាមានកំហុស លោក Batubara ប្រឈមមុខទោសប្រហារជីវិតឯណោះ។
គណៈកម្មការបោសសម្អាតអំពើពុករលួយឥណ្ឌូណេស៊ី (KPK) បាននាំខ្លួនលោក Juliari Batubara រដ្ឋមន្ត្រីកិច្ចការសង្គមទៅសួរនាំក្នុងទីស្នាក់ការរបស់ខ្លួននៅព្រឹកថ្ងៃទី៦ ខែធ្នូ ក្រោមការរឹតបន្តឹងសន្តិសុខ។ ការចាប់ខ្លួននេះ ធ្វើឡើងក្រោយមន្ត្រី KPK បើកប្រតិបត្តិការមួយនៅថ្ងៃទី៥ ខែធ្នូ ដោយបានចាប់ខ្លួនបុគ្គលិកក្រុមហ៊ុនឯកជនពីរនាក់ និងមន្ត្រីក្រសួងម្នាក់ ហើយរឹបអូសលុយជាច្រើនលានដុល្លារផងដែរ។
បើតាមទូរទស្សន៍ CNA គណៈកម្មការបោសសម្អាតអំពើពុករលួយសង្ស័យថា លុយទាំងនោះ នឹងត្រូវផ្ញើឲ្យលោក Batubara ដែលលោកបានផ្ដល់កិច្ចសន្យាឲ្យក្រុមហ៊ុនពីរក្នុងការចែកលុយ និងជំនួយចាំបាច់ដល់គ្រួសារ១០លាន ដែលរងប៉ះពាល់ដោយសារជំងឺរាតត្បាត។ ប្រធាន KPK លោក Firli Bahuri និយាយថា លោក Batubara ប្រឈមមុខទោសធ្ងន់ធ្ងរ ប្រសិនបើត្រូវរកឃើញថាមានទោស ព្រោះលោកបានកេងចំណេញពីរដ្ឋអំឡុងពេលមានវិបត្តិ។
ប្រធានគណៈកម្មការដដែលបន្តថា ដោយយោងតាមព័ស្តុតាង និងការសាកសួរសាក្សី លោក Batubara អាចនឹងត្រូវចោទតាមមាត្រា២ នៃច្បាប់ប្រឆាំងអំពើពុករលួយឆ្នាំ១៩៩៩ ដែលអនុញ្ញាតឲ្យអនុវត្តទោសប្រហារជីវិតលើមន្ត្រីណាដែលកេងយកផលប្រយោជន៍សម្រាប់ខ្លួនឯង ហើយធ្វើឲ្យឃ្លាំងលុយរដ្ឋខូចខាតអំឡុងពេលប្រទេសស្ថិតក្រោមភាពអាសន្ន។
«KPK សូមព្រមានមនុស្សទាំងអស់ មិនត្រូវប្រព្រឹត្តិអំពើពុករលួយឡើយ ពិសេសអំឡុងពេលជំងឺរាតត្បាត។ ប្រសិនបើនៅតែមានអ្នកកេងចំណេញប្រយោជន៍ផ្ទាល់ខ្លួន KPK នឹងរារែកក្នុងការចាត់វិធានការម៉ឺងម៉ាត់ឡើយ។» លោក Bahuri ព្រមានបែបនេះក្នុងសន្និសីទសារព័ត៌មានថ្ងៃទី៦ ខែធ្នូ។
លោក Batubara ជារដ្ឋមន្ត្រីចុងក្រោយរបស់រដ្ឋាភិបាលប្រធានាធិបតី ចូកូ វីដូដូ ដែលត្រូវចាប់ខ្លួនពាក់ព័ន្ធករណីពុករលួយ។ កាលពីខែមុន រដ្ឋមន្ត្រីកិច្ចការសមុទ្រ លោក Edhy Prabowo ត្រូវចាប់ខ្លួន ក្រោមការសង្ស័យថា ក្លែងបន្លំលិខិតនាំចេញកូនបង្កង៕
Tag:
ឥណ្ឌូណេស៊ី
កូវីដ-១៩
© រក្សាសិទ្ធិដោយ thmeythmey.com