COVID-19
អន្តរជាតិ
នាយករដ្ឋមន្ត្រីឡាវ ស្នើសហគមន៍អន្តរជាតិធានាតម្លៃវ៉ាក់សាំងកូវីដ-១៩ សមរម្យសម្រាប់ប្រទេសក្រីក្រ
×![]()
រដ្ឋាភិបាលក្រុងវៀងចន្ទន៍ បានស្នើដល់សហគមន៍អន្តរជាតិផ្តល់ការការពារជាតិដល់ប្រជាជនសកលតាមរយៈការផ្តល់នូវវ៉ាក់សាំងជំងឺកូវីដ-១៩ ក្នុងតម្លៃសមរម្យ និងធូរថ្លៃ។ សម្រាប់ក្រុងវៀងចន្ទន៍ប្រសិនបើអន្តរជាតិ មិនអាចធានាបានពីការយោគយល់គ្នាមួយនេះនោះទេ ប្រជាជនប្រទេសក្រីក្រ នឹងរងការគំរាមសុខភាពសាធារណៈជាក់ជាពុំខាន។
មិនខុសពីបណ្តាមេដឹកនាំ នៃប្រទេសកំពុងអភិវឌ្ឍ ឬប្រទេសក្រីក្រដទៃផ្សេងទៀតនោះទេ លោកនាយករដ្ឋមន្ត្រីឡាវ ថងលួន ស៊ីសូលីត តាមរយៈកិច្ចប្រជុំរបស់មហាសន្និបាតអង្គការសហប្រជាជាតិស្តីពីការឆ្លើយតបជំងឺរាតត្បាតកូរ៉ូណានាពេលថ្មីៗនេះ បានទទូចឲ្យសហគមន៍អន្តរជាតិគាំទ្រ COVAX ដែលជាគំនិតផ្តួចផ្តើមមួយបង្កើតឡើងដើម្បីធានាពីការទទួលបានវ៉ាក់សាំងកូវីដ-១៩ ជាសកល និងសមធម៌។
តាមការចុះផ្សាយរបស់សារព័ត៌មាន Vientiane Times នាឱកាសដដែលនោះ លោកនាយករដ្ឋមន្ត្រី បានស្នើដោយចំហរដល់សហគមន៍អន្តរជាតិក្នុងការជួយធានាដល់វ៉ាក់សាំង កូវីដ-១៩ ផ្គត់ផ្គង់ក្នុតម្លៃធូរថ្លៃ និងសមរម្យ ដែលចំណុចនេះ លោកនាយករដ្ឋមន្ត្រី យល់ឃើញថា ក៏នឹងជួយធ្វើឲ្យវ៉ាក់សាំង កូវីដ-១៩ ក្លាយជាទំនិញសាធារណសកលផងដែរ។
លោកនាយករដ្ឋមន្ត្រី មានយោបល់ទៅកាន់វេទិកាមហាសន្និបាតអង្គការសហប្រជាជាតិតាមរយៈប្រព័ន្ធវីដេអូបែបនេះ បន្ទាប់ពីមានក្រុមហ៊ុន និងស្ថាប័នស្រាវជ្រាវមួយចំនួន បានប្រកាសជោគជ័យបឋមផ្លូវការក្នុងការអភិវឌ្ឍន៍ វ៉ាក់សាំង កូវីដ-១៩ ដែលវ៉ាក់សាំងនេះ ក៏ត្រូវបានចាប់ផ្តើមប្រើប្រាស់ក្នុងប្រទេសអឺរ៉ុបមួយចំនួន ហើយក៏នឹងអាចក្លាយជាផលិតផលទូទៅសម្រាប់អន្តរជាតិនាពេលខាងមុខដ៏ខ្លីផងដែរ។
គួរជម្រាបផងដែរថា គិតត្រឹមថ្ងៃ៦ ធ្នូ ឡាវ មានករណីឆ្លង កូវីដ-១៩ សរុបទាំងអស់ ៣៦ ករណីប៉ុណ្ណោះ ហើយក៏មិនមានករណីស្លាប់ផងដែរ។ ឡាវ ក៏ស្ថិតនៅក្នុងចំណោមប្រទេសរបស់ពិភពលោក ដែលមានវិធានការ និងការគ្រប់គ្រងការរាតត្បាតវីរុស កូវីដ-១៩ តឹងរ៉ឹង និងរឹងមាំ៕
Tag:
ឡាវ
Covid19
© រក្សាសិទ្ធិដោយ thmeythmey.com
