COVID-19
អន្តរជាតិ
កូរ៉េខាងត្បូង រឹតបន្តឹងវិធានគម្លាតសុវត្ថិភាពនៅសេអ៊ូលនិងតំបន់ជុំវិញ ក្រោយករណីឆ្លងបន្តកើនឡើង
រូបភាព Xinhua
×![]()
កូរ៉េខាងត្បូងនៅថ្ងៃទី៧ធ្នូ ប្រកាសពីការរឹតបន្តឹងវិធានគម្លាតសុវត្ថិភាពចាប់ពីថ្ងៃទី៨ ធ្នូ តទៅនៅជុំវិញទីក្រុងសេអ៊ូល ដើម្បីទប់ស្កាត់នឹងការផ្ទុះឡើងសារជាថ្មីនៃជំងឺកូវីដ-១៩។ ករណីឆ្លងថ្មីនៅកូរ៉េខាងត្បូង ហក់ឡើងខ្ពស់បំផុតក្នុងរយៈពេល៩ខែ ជាមួយចំនួនអ្នកឆ្លងជាង៦០០នាក់។
ក្រោមវិធានការគម្លាតសុវត្ថិភាពដែលអនុវត្តចាប់ពីថ្ងៃទី៨ ខែធ្នូ ភាពអាសន្នសុខាភិបាលកម្រិត២,៥ ត្រូវអនុវត្តនៅទីក្រុងសេអ៊ូល និងតំបន់ជុំវិញរួមមានខេត្ត Gyeonggi និងក្រុងកំពង់ផែ Incheon។ ការរឹតបន្តឹងខាងលើមានរយៈពេល៣សប្តាហ៍។ នេះយោងតាមទីភ្នាក់ងារគ្រប់គ្រង និងបង្ការជំងឺឆ្លងកូរ៉េ (KDCA)។ ចំណែកទីកន្លែងឯទៀត នឹងបន្តស្ថិតនៅក្នុងកម្រិតប្រកាសអាសន្នសុខាភិបាល២។ កម្រិតប្រកាសអាសន្នសុខាភិបាលទី៥ ជាកម្រិតខ្ពស់បំផុត។
ការរឹតបន្តឹងសុវត្ថិភាពនេះ នឹងបិទទីតាំងចំនួន១សែន៣ម៉ឺនកន្លែងដែលងាយនឹងឆ្លងជំងឺ។ ការជួបជុំទាំងឡាយណាដែលមានមនុស្សចាប់ពី៥០នាក់ឡើងទៅនឹងត្រូវហាមឃាត់ រួមទាំងពិធីមង្គលការ និងបុណ្យសពផងដែរ។ អាជ្ញាធរកូរ៉េខាងត្បូងទទូចឲ្យ ពលរដ្ឋខ្លួនកាត់បន្ថយសកម្មភាពកំសាន្តសប្បាយនៅប៉ុន្មានសប្តាហ៍ខាងមុខ។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។
កន្លែងហាត់កីឡា និងបន្ទប់ខារ៉ាអូខេ ត្រូវបិទទ្វារត្រឹមម៉ោង៩យប់ រីឯការប្រកួតកីឡាអាចធ្វើទៅបាន ប៉ុន្តែមិនអនុញ្ញាតឲ្យមានអ្នកគាំទ្រចូលរួមឡើយ។ ភោជនីយដ្ឋានវិញ ត្រូវបានហាមមិនឲ្យបើកទ្វារពីម៉ោង៩យប់ទៅ និងអាចត្រឹមបម្រើសេវាកម្មដឹកជញ្ជូនម្ហូបតែប៉ុណ្ណោះ ខណៈហាងកាហ្វេអាចបន្តបើកបានគ្រប់ម៉ោង តែត្រូវមិនអនុញ្ញាតឲ្យមានភ្ញៀវអង្គុយឡើយ។
សកម្មភាពសាសនា ឬសេវាកម្មត្រូវបានរដ្ឋាភិបាលកូរ៉េលើកទឹកចិត្តឲ្យធ្វើតាមអនឡាញ ឬផ្សាយទុក។ ចំពោះសកម្មភាពសាសនាទាំងឡាយណាដែលចាំបាច់ ត្រូវបានអនុញ្ញាត បើសិនជាមានអ្នកចូលរួមតិចជាង២០នាក់។ ចាប់ពីម៉ោង៩យប់ទៅ រោងភាពយន្ត សាលារៀន កន្លែងកំសាន្ត កន្លែងកាត់សក់ ក៏ដូចជាហាងលក់ទំនិញធំៗត្រូវបិទទ្វារ។
ចំណាត់ការរឹតបន្តឹងរបស់រដ្ឋាភិបាលកូរ៉េខាងត្បូងនេះ ធ្វើឡើងបន្ទាប់ពីករណីឆ្លងកើនឡើងក្នុងកម្រិតដ៏ខ្ពស់បំផុតក្នុងរយៈពេល៩ខែចុងក្រោយ រាប់ចាប់តាំងតែពីករណីផ្ទុះឆ្លងក្នុងខែមីនា។ KDCA រាយការណ៍ពីករណីកូវីដ-១៩ ថ្មីចំនួន៦១៥ករណីសម្រាប់ថ្ងៃទី៦ ខែធ្នូ។
អ្នកជំនាញសុខាភិបាល ព្រមានថា បើសិនអាជ្ញាធរមិនចាត់វិធានការបន្តឹងទាន់ពេលទេ នោះក្នុងរយៈពេល១ ទៅ២សប្តាហ៍ខាងមុខ ករណីឆ្លងអាចនឹងកើនឡើងពីចំនួន៧០០ ទៅ១,០០០ករណីក្នុងមួយថ្ងៃ។ គិតត្រឹមថ្ងៃទី៧ ធ្នូនេះ កូរ៉េខាងត្បូងមានករណីឆ្លងកូវីដ-១៩ចំនួន៣៨,១៦១នាក់ ស្លាប់ចំនួន៥៤៩នាក់ និងជាសះស្បើយចំនួន២៩,៣០១នាក់៕
Tag:
កូរ៉េខាងត្បូង
កូវីត-១៩
© រក្សាសិទ្ធិដោយ thmeythmey.com
