វត្តមានរបស់ Russell ជំនួស Hamilton មិនសូវរលូន ដោយការប្តូរកង់រថយន្តច្រឡំ

COVID-19

កីឡាអន្តរជាតិ

អន្តរជាតិ

វត្តមានរបស់ Russell ជំនួស Hamilton មិនសូវរលូន ដោយការប្តូរកង់រថយន្តច្រឡំ

07, Dec 2020 , 5:14 pm

រូបភាព

ដោយ: ទេព ពិទូរ្យ

ក្រុមប្រណាំងរថយន្ត Mercedes ត្រូវពិន័យជាប្រាក់ចំនួនពីរម៉ឺនផោន (២៦៨០០ដុល្លារ) ដោយសារពួកគេប្តូរកង់មុខឲ្យរថយន្តរបស់កីឡាករ George Russell មិនត្រឹមត្រូវ នាការប្រណាំង Formula One នៅប្រទេសបារ៉ែន ក្នុងកម្មវិធី Sakhir Grand Prix។

George Russell បានចូលខ្លួនទៅបើកជំនួសម្ចាស់ជើងឯក Lewis Hamilton ដែលឆ្លងជំងឺ COVID-19 នាការប្រណាំងនៅទីលានទី១៦ រដូវកាលឆ្នាំ២០២០ នៅថ្ងៃទី៦ ខែធ្នូ។

ក្រុមប្រណាំង Mercedes ដែលក្លាយជាជើងឯក F1 ផ្នែកគ្រឿងម៉ាស៊ីនទៅហើយនោះ បានច្រឡំយកកង់របស់រថយន្តកីឡាករ Valtteri Bottas ទៅដាក់ឲ្យរថយន្តរបស់ Russell។ ដោយសារច្រឡំ រថយន្តដែលបើកបរដោយកីឡាករវ័យក្មេងសញ្ជាតិអង់គ្លេសរូបនេះ ត្រូវចូលទៅទីតាំង pitstop ដើម្បីប្តូរសម្បកកង់ម្តងទៀត ហើយ Russell ត្រូវធ្លាក់ទៅលេខ៥។

ក្នុងការប្រណាំងនេះ Russell បញ្ចប់ក្នុងចំណាត់ថ្នាក់ទី៩ ខណៈមិត្តរួមក្រុម Mercedes កីឡាករ Bottas នៅលេខ៨។ Sergio Perez ដែលបើកឲ្យក្រុម Racing Points ទទួលបានចំណាត់ថ្នាក់ទី១ ដោយប្រើថេរវេលា ១ម៉ោង ៣១នាទី និង១៥វិនាទី។ Esteban Ocon របស់ Renaul និង Lance Stroll របស់ក្រុម Racing Points ធ្វើបានចំណាត់ថ្នាក់ទី២ និងទី៣។

ក្រោយចប់ការប្រកួត ក្រុម Mercedes ត្រូវស្ថាប័ន F1 ពិន័យជាប្រាក់ ២៦៨០០ដុល្លារ ពីបទរំលោភលើលក្ខខណ្ឌប្រណាំងរថយន្តលំដាប់ពិភពលោក បើទោះមានការបកស្រាយពីសមាជិកក្រុម ថា មកពីបញ្ហាបច្ចេកទេសវិទ្យុទាក់ទងក៏ដោយ៕