ជាតិ
សង្គមជាតិ
ម៉ាឡេស៊ី ផ្តល់ភាពស្របច្បាប់ដល់ពលករខ្មែរ និងពលករ១៤ប្រទេសទៀត តែត្រូវបង់ប្រាក់មួយចំនួន ពលរដ្ឋខ្មែរជាង១០០នាក់ ដែលជាពលករ ជាសិក្ខាកាមយោធា និង ជានិស្សិត ជាដើម ស្ថិតក្នុងព្រលានយន្តហោះប្រទេសម៉ាឡេស៊ី រៀបចំឡើងយន្តហោះមកកាន់កម្ពុជា កាលពីខែកក្កដា ឆ្នាំ២០២០ (រូបពីស្ថានទូតកម្ពុជាប្រចាំម៉ាឡេស៊ី)
× ភ្នំពេញ៖ រដ្ឋាភិបាលម៉ាឡេស៊ីបានប្រកាសផ្តល់ភាពស្របច្បាប់ដល់ពលករខុសច្បាប់ នៃប្រទេស១៥ ដោយក្នុងនោះ មានទាំងពលករខុសច្បាប់របស់កម្ពុជាផងដែរ។ ការផ្តល់ភាពស្របច្បាប់នេះ គឺសំដៅដល់កម្មករខុសច្បាប់ ដែលកំពុងបម្រើការនៅក្នុងវិស័យសំណង់ ឧស្សាហកម្ម ដាំដុះ និង កសិកម្ម នៅក្នុងប្រទេសម៉ាឡេស៊ី។
សេចក្តីជូនដំណឹងរបស់ស្ថានទូតកម្ពុជាប្រចាំប្រទេសម៉ាឡេស៊ី បានបញ្ជាក់ពីលក្ខខណ្ឌថា មុននឹងនិយោជក និងកម្មករខុសច្បាប់ អាចទទួលបានសិទ្ធស្របច្បាប់នេះ គឺពួកគេ មិនត្រូវមានឈ្មោះនៅក្នុងបញ្ជីខ្មៅ(Black list) របស់អគ្គនាយកដ្ឋានអន្តោប្រវេសន៍, ត្រូវបង់ប្រាក់តម្កល់៥០០រីងហ្គីត(ជាង១២០ដុល្លារ), បង់ថ្លៃផាកពិន័យ១៥០០រីងហ្គីត(៣៦៩ដុល្លារ) តាមប្រព័ន្ធអនឡាញ សម្រាប់ពលករម្នាក់, ត្រូវពិនិត្យសុខភាពនៅមជ្ឈមណ្ឌល FOMEMA, ត្រូវបង់ពន្ធ, បង់សេវាដំណើរការឯកសា និង ទិដ្ឋាការ។
លក្ខខណ្ឌបន្ទាប់មកទៀត គឺ ពលករ ត្រូវមានលិខិតឆ្លងដែនដែលមានសុពលភាពយ៉ាងតិច១៨ខែ, ជាពលករដែលបានចូលទៅធ្វើការនៅម៉ាឡេស៊ីដោយប្រើទិដ្ឋាការទេសចរណ៍ (Social Visit Pass) ឬជាពលករដែលមានទិដ្ឋាការការងារផុតសុពលភាពមុនថ្ងៃទី៣១ ខែធ្នូ ឆ្នាំ២០២០ ឬ ត្រូវបានរាយការណ៍ថារត់ចេញពីនិយោជក។ បន្ថែមពីនេះ ពលករត្រូវមានវិញ្ញាបនបត្របញ្ជាក់ថាគ្មានជំងឺកូវីដ-១៩ ដែលមានសុពលភាពរយៈពេល៣ថ្ងៃមុនថ្ងៃសម្ភាស។
ក្រោយពលករបានបំពេញលក្ខខណ្ឌខាងលើបានសមស្របហើយ ពលករអាចដាក់ពាក្យស្នើសុំផ្តល់ភាពស្របច្បាប់ដល់ពលករតាមរយៈអ៊ីមែលទៅកាន់
.my ។ ក្រោយមកទៀត ពលករទាំងអស់ ត្រូវទាក់ទងផ្ទាល់ជាមួយអគ្គនាយកដ្ឋានអន្តោប្រវេសន៍ និងអគ្គនាយកដ្ឋានការងារម៉ាឡេស៊ីដោយគ្មានការពាក់ព័ន្ធជាមួយនឹងភាគីទីបី និងទីភ្នាក់ងារជ្រើសរើសពលករឡើយ។ នេះបើតាមស្ថានទូតកម្ពុជាប្រចាំប្រទេសម៉ាឡេស៊ី ដែលអះអាងថា ការផ្តល់ភាពស្របច្បាប់ដល់ពលករខុសច្បាប់នេះ ត្រូវបានអនុវត្តពីខែវិចិ្ឆកា ឆ្នាំ២០២០មក រហូតដល់ខែមិថុនា ឆ្នាំ២០២១៕
© រក្សាសិទ្ធិដោយ thmeythmey.com