ច្បាប់ / សិទិ្ធមនុស្ស / តុលាការ
ជាតិ
អង្គការ៦៧ រួមគ្នាស្នើឲ្យដោះលែងអ្នកជាប់ឃុំ ដែលពាក់ព័ន្ធការងារសិទ្ធិមនុស្សនិងនយោបាយ កងកម្លាំង ឈរនៅតុលាការភ្នំពេញ ខណៈតុលាការនេះ បើកសវនាការជំនុំជម្រះលើកដំបូងលើលោក កឹម សុខា ប្រធានអតីតគណបក្សសង្គ្រោះជាតិ ពីបទក្បត់ជាតិ កាលពីពាក់កណ្តាលខែមករា ឆ្នាំ២០២០ (រូបពី AFP)
× នាទិវារម្លឹកខួបសិទ្ធិមនុស្សអន្តរជាតិលើកទី៧២ នៅថ្ងៃទី១០ ខែធ្នូ ឆ្នាំ២០២០ អង្គការសង្គមស៊ីវិលនិងសមាគមសរុប៦៧ស្ថាប័ននៅកម្ពុជា រួមគ្នាអំពាវឲ្យរដ្ឋាភិបាលកម្ពុជា គោរពគោលការណ៍ប្រជាធិបតេយ្យនិងសិទ្ធិមនុស្ស ដែលចែងក្នុងសេចក្តីប្រកាសជាសាកលស្តីពីសិទ្ធិមនុស្សនិងរដ្ឋធម្មនុញ្ញកម្ពុជា។ ការអំពាវនាវរបស់អង្គការសង្គមស៊ីវិលទាំង៦៧ ធ្វើឡើងតាមរយៈសេចក្តីថ្លែងការណ៍ ដែលចេញក្នុងថ្ងៃរម្លឹកខួបសិទ្ធិមនុស្សអន្តរជាតិ១០ធ្នូនេះ។
ក្រុមអង្គការសង្គមស៊ីវិលទាំងនោះ សរសេរដូច្នេះថា៖«យើងខ្ញុំ ក៏អំពាវនាវឲ្យរដ្ឋាភិបាល បញ្ឈប់ជាបន្ទាន់នូវការកំណត់មុខសញ្ញាទៅលើសកម្មជន អ្នកការពារសិទ្ធិមនុស្ស អ្នកសារព័ត៌មាន អ្នកគាំទ្រគណបក្សជំទាស់ និងសំឡេងរិះគន់ដទៃទៀតផងដែរ ដែលប្រការនេះ បានធ្វើឲ្យស្ថានភាពសិទ្ធិមនុស្សកាន់តែមានភាពអាប់អួខ្លាំងក្នុងឆ្នាំ២០២០ ព្រមទាំងសូមឲ្យដោះលែងបុគ្គល ដែលត្រូវបានឃុំខ្លួនទាំងអស់ ដោយគ្មានលក្ខខណ្ឌ»។
លោក ជិន ម៉ាលីន អនុប្រធាននិងជាអ្នកនាំពាក្យគណៈកម្មាធិការសិទ្ធិមនុស្សកម្ពុជា សរសេរលើទំព័រហ្វេសប៊ុករបស់លោកថា គេ មិនគួរឆ្លៀតប្រើប្រាស់ទិវាសិទ្ធិមនុស្សនេះ ដើម្បីបន្តុះបង្អាប់រដ្ឋាភិបាល តាមរយៈការថ្លែងសារនយោបាយ ដែលមានចរិតញុះញង់ បំផ្លើសខុសពីការពិត ហើយផ្ទុយពីរដ្ឋធម្មនុញ្ញនិងច្បាប់កម្ពុជានោះទេ ដូចជា ការដាក់សម្ពាធលើតុលាការ ជាស្ថាប័នឯករាជ្យ ឲ្យដោះលែងជនជាប់ចោទ ដែលកំពុងស្ថិតក្នុងដំណើរការនីតិវិធី ជាដើម។
លោក ជិន ម៉ាលីន ដែលជារដ្ឋលេខាធិការនិងជាអ្នកនាំពាក្យក្រសួងយុត្តិធម៌ដែរនោះ បញ្ចេញយោបល់ដូច្នេះថា៖«ទង្វើនិងសកម្មភាពក្នុងការការពារដោយបំពានច្បាប់ ចំពោះជនដែលបានប្រព្រឹត្តល្មើសទៅនឹងច្បាប់បែបនេះ មិនមែនជាកិច្ចគាំពារនិងលើកស្ទួយសិទ្ធិមនុស្សនោះទេ តែផ្ទុយទៅវិញ វាបាននិងកំពុងលើកទឹកចិត្តមនុស្សឲ្យកាន់តែធ្វើសកម្មភាពបំពានច្បាប់ ដោយមិនមានការញញើត ខ្លាចរអា និងរាងចាល ហើយដែលនេះអាចបង្កជាហានិភ័យធ្ងន់ធ្ងរដល់សង្គម»។
អង្គការសង្គមស៊ីវិល ដែលបានចេញសេចក្តីថ្លែងការណ៍រួមខាងលើ មានដូចជា អង្គការអាដហុក (ADHOC) អង្គការលីកាដូ (LICADHO) មជ្ឈមណ្ឌលសិទ្ធិមនុស្សកម្ពុជា (CCHR) មជ្ឈមណ្ឌលសម្ព័ន្ធភាពការងារនិងសិទ្ធិមនុស្ស (CENTRAL) និង គណៈកម្មាធិការដើម្បីការបោះឆ្នោតដោយសសេរីនិងយុត្តិធម៌នៅកម្ពុជា (COMFREL) ជាដើម។
ដោយសារបារម្ភជំងឺកូវីដ-១៩ ដែលកំពុងរាលដាលក្នុងសហគមន៍ អាជ្ញាធរកម្ពុជា មិនអនុញ្ញាតឲ្យមានការជួបជុំ ដើម្បីប្រាព្ធទិវាសិទ្ធិមនុស្សឡើយ សម្រាប់ឆ្នាំនេះ៕
Tag:
NGO
ទិវាសិទ្ធិមនុស្ស១០ឆ្នូ
© រក្សាសិទ្ធិដោយ thmeythmey.com