អន្តរជាតិ
នយោបាយអន្តរជាតិ
តៃវ៉ាន់ ដាក់ឲ្យប្រើប្រាស់នាវាល្បាតថ្មីដែលអាចបំពាក់ក្បាលគ្រាប់មីស៊ីល អ្នកស្រីប្រធានាធិបតីតៃវ៉ាន់ Tsai Ing-wen ថ្លែងក្នុងពិធីប្រគល់នាវាល្បាត «Anping» នៅថ្ងៃទី ១១ ខែធ្នូ ។ រូបពី Reuters
× តៃវ៉ាន់ ដាក់ដំណើរការនាវាល្បាតថ្មីមួយគ្រឿង នៅថ្ងៃទី ១១ ខែធ្នូ ដែលអាចបំពាក់ក្បាលគ្រាប់មីស៊ីលអំឡុងពេលធ្វើសង្គ្រាម ខណៈដែនកោះមួយនេះ ប្ដេជ្ញាពង្រឹងសមត្ថភាពការពារជាតិខ្លួននៅចំពោះមុខការគំរាមកំហែងពីចិន។
ក្នុងពិធីដាក់ដំណើរការនាវាល្បាតផលិតក្នុងស្រុកតម្លៃ៣៧,៣លានដុល្លារ ឈ្មោះថា «Anping» ក្នុងទីក្រុង Kaohsiung អ្នកស្រីប្រធានាធិបតី Tsai Ing-wen បានលើកសរសើរពីសមត្ថភាពពិសេសរបស់នាវាល្បាតមួយដែលអាចប្រើប្រាស់ជានាវាប្រយុទ្ធក្នុងពេលមានជម្លោះ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
«ប្រសិនបើចាំបាច់ វាអាចប្រែក្លាយភ្លាមៗទៅជាកម្លាំងដ៏សំខាន់មួយសម្រាប់ការពារ»។ អ្នកស្រី Tsai បញ្ជាក់បែបនេះ មុននឹងបន្ថែមថា ខណៈកងនាវាល្បាតពង្រឹងការអនុវត្តច្បាប់ កងកម្លាំងការពារជាតិ នឹងត្រូវពង្រឹងសមត្ថភាពផងដែរ។
នាវាល្បាត Anping គឺស្រដៀងគ្នានឹងនាវាចម្បាំងខ្នាតតូចប្រភេទ Tuo Chiang ដែលអាចបំពាក់ក្បាលគ្រាប់មីស៊ីលកម្ទេចនាវាសត្រូវ តែវាត្រូវបានបន្ថែមដោយសម្ភារជំនួយដល់ប្រតិបត្តិការសង្គ្រោះប៉ុណ្ណោះ។
និយាយដល់នាវាចម្បាំងប្រភេទ Tuo Chiang គឺ វាមានល្បឿនលឿននិងងាយស្រួលក្នុងបត់បែន ហើយមានបេសកកម្មចម្បងកម្ទេចនាវាសត្រូវធំៗ ដែលប្រតិបត្តិការក្បែរសមុទ្រតៃវ៉ាន់។ បច្ចុប្បន្ននាវាចម្បាំងប្រភេទនេះ កំពុងបើកប្រតិបត្តិការ ហើយត្រូវប្រសិទ្ធនាមដោយកងទ័ពជើងទឹកតៃវ៉ាន់ថា «អ្នកពិឃាដនាវាផ្ទុកយន្តហោះ»។
ដោយសារសមត្ថភាពយោធារបស់តៃវ៉ាន់ចាញ់ប្រៀបចិន អ្នកស្រីប្រធានាធិបតី Tsai បានជំរុញយុទ្ធសាស្ត្រធ្វើសង្គ្រាមមួយ ហៅថា សង្គ្រាមរវាងអំណាចយោធាមិនស្មើគ្នា។ នេះមានន័យថា កងទ័ពតៃវ៉ាន់ នឹងបំពាក់បន្ថែមសព្វាវុធ ដែលងាយស្រួលក្នុងការចល័ត និងពិបាកឲ្យសត្រូវវាយប្រហារបាន។
ទន្ទឹមនេះ អ្នកស្រី Tsai Ing-wen ក៏ប្តេជ្ញាផ្ដល់អាទិភាពខ្លាំងលើការធ្វើទំនើបកម្មយោធាតៃវ៉ាន់ផងដែរ ហើយនោះគឺការដំឡើងកញ្ចប់ថវិកាជាតិ និងទិញសព្វាវុធទំនើបៗបន្ថែមទៀត។ ចិន ដែលចាត់ទុកតៃវ៉ាន់ជាដែនអធិបតេយ្យភាពរបស់ខ្លួន ធ្លាប់ប្រកាសថានឹងប្រើកម្លាំងទ័ពវាយដណ្ដើមតៃវ៉ាន់ដាក់ក្រោមការគ្រប់គ្រងខ្លួន បើប្រជាជាតិកោះមួយហ៊ានប្រកាសឯករាជ្យ។
ខណៈសហរដ្ឋអាមេរិក នៅតែជាប្រទេសផ្គត់ផ្គង់អាវុធសំខាន់បំផុតរបស់តៃវ៉ាន់ អ្នកស្រីប្រធានាធិបតី Tsai ក៏បានប្ដេជ្ញាពង្រឹងឧស្សាហកម្មការពាររបស់ប្រជាជាតិកោះមួយនេះ ជាពិសេស តាមរយៈផែនការសាងសង់នាវាមុជទឹក៨គ្រឿងដោយខ្លួនឯង ខណៈចិនមាននាវាផ្ទុកយន្តហោះ២គ្រឿង ដែលបើកប្រតិបត្តិការ ហើយក៏កំពុងសាងសង់យ៉ាងតិចមួយទៀតផងដែរ៕
Tag:
តៃវ៉ាន់
កងទ័ពជើងទឹក
© រក្សាសិទ្ធិដោយ thmeythmey.com