សម្តេចសង្ឃច្រើនអង្គ ចូលរួមបរិច្ចាគបច្ច័យជូនរដ្ឋាភិបាល សម្រាប់ទិញវ៉ាក់សាំងកូវីដ-១៩

COVID-19

ជាតិ

សម្តេចសង្ឃច្រើនអង្គ ចូលរួមបរិច្ចាគបច្ច័យជូនរដ្ឋាភិបាល សម្រាប់ទិញវ៉ាក់សាំងកូវីដ-១៩

11, Dec 2020 , 6:29 pm

រូបភាព

ជួរខាងលើពីឆ្វេងដៃទៅ៖ សម្តេច ទេព វង្ស សម្ដេច អំ លីមហេង និង សម្តេច ណយ ច្រឹក។ ជួរកណ្តាលពីឆ្វេងដៃទៅ៖ សម្តេច មួង រ៉ា សម្តេច ឃឹម សន និង សម្តេច សៅរ៍ ចន្ទថុល្ល។ ជួរខាងក្រោមពីឆ្វេងដៃទៅ៖ សម្តេច ឈឹង ប៊ុនឈា សម្តេច ឃី សុវណ្ណរតនា និង សម្តេច រ័ត្ន សារឿន។ រូបពីលេខាធិការដ្ឋានគណៈសង្ឃនាយក

ដោយ: សារព័ត៌មានថ្មីៗ

មិនមែនតែគ្រហស្ថឡើយ សម្តេចសង្ឃជាច្រើនអង្គ រួមទាំងព្រះសង្ឃទូទៅ ក៏បានបរិច្ចាគបច្ច័យជូនរដ្ឋាភិបាលកម្ពុជាដែរ ដើម្បីទិញវ៉ាក់សាំងការពារជំងឺកូវីដ-១៩ យកមកចាក់ជូនប្រជាជនដោយឥតគិតថ្លៃ។ ទំព័រហ្វេសប៊ុករបស់លេខាធិការដ្ឋានគណៈសង្ឃនាយក បានបង្ហោះព័ត៌មានជាបន្តបន្ទាប់គ្នាអំពីសម្តេចសង្ឃនិងមន្ត្រីសង្ឃ បរិច្ចាគបច្ច័យជូនរដ្ឋាភិបាល។

សម្តេចព្រះអគ្គមហាសង្ឃរាជ ទេព វង្ស សម្តេចសង្ឃដែលមានឋានៈខ្ពស់បំផុតផ្នែកគណៈមហានិកាយ បរិច្ចាគ១ម៉ឺនដុល្លារ, សម្ដេចព្រះពោធិវ័ង្ស អំ លីមហេង សម្ដេចព្រះសង្ឃនាយករងទី១ បរិច្ចាគ១ម៉ឺនដុល្លារ, សម្តេចព្រះវនរ័ត ណយ ច្រឹក សម្តេចព្រះសង្ឃនាយករងទី២ បរិច្ចាគ៤ពាន់ដុល្លារ, សម្តេចព្រះឧត្តមវង្សា មួង រ៉ា សម្តេចព្រះសង្ឃនាយករងទី៣ បរិច្ចាគ៥ពាន់ដុល្លារ, សម្តេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋានគណៈសង្ឃនាយក បរិច្ចាគ២,៥ពាន់ដុល្លារ, សម្ដេចព្រះធម្មលិខិត សៅរ៍ ចន្ទថុល្ល ឧត្ដមប្រឹក្សាគណៈមហានិកាយ បរិច្ចាគ២,៥ពាន់ដុល្លារ, សម្តេចព្រះឧត្តមចរិយា ឈឹង ប៊ុនឈា ព្រះអនុប្រធានថេរសភានៃពុទ្ធសាសនាកម្ពុជា បរិច្ចាគ២,៥ពាន់ដុល្លារ, សម្តេចព្រះមហាអរិយវង្ស ឃី សុវណ្ណរតនា ព្រះអនុប្រធានលេខាធិការដ្ឋានគណៈសង្ឃនាយក បរិច្ចាគ២,៥ពាន់ដុល្លារ, សម្តេចព្រះសាក្យមុនី រ័ត្ន សារឿន សមាជិកថេរសភានៃព្រះពុទ្ធសាសនាកម្ពុជា បរិច្ចាគ៣ពាន់ដុល្លារ ។ល។

ក្រៅពីសម្តេចព្រះសង្ឃជាន់ខ្ពស់ ដែលរាយព្រះនាមខាងលើ មន្ត្រីសង្ឃតាមបណ្តាខេត្តនានា ក៏បានរិច្ចាគបច្ច័យជូនរដ្ឋាភិបាលដែរ ហើយក៏ប្រហែលជានៅមានសម្តេចសង្ឃ មន្ត្រីសង្ឃ និងព្រះសង្ឃផ្សេងទៀត ដែលបន្តបរិច្ចាគបច្ច័យជូនរដ្ឋាភិបាល។

សម្តេចព្រះសង្ឃរាជ ទេព វង្ស បានប្រទានព្រះរាជសារ ជូនទៅសម្តេចនាយករដ្ឋមន្ត្រី ហ៊ុន សែន ដើម្បីជម្រាបសម្តេចនាយករដ្ឋមន្ត្រី អំពីការបរិច្ចាគបច្ច័យ១ម៉ឺនដុល្លាររបស់ព្រះអង្គ ជូនទៅរដ្ឋាភិបាល។ សម្តេចព្រះសង្ឃរាជ បានសរសេរក្នុងព្រះរាជសារដូច្នេះថា៖«សូមឧទ្ទិសបួងសួង ឲ្យពិភពលោកទាំងមូលបានសុខ សន្តិភាព! សូមឲ្យអពមង្គល កាឡកិណី និមិត្តអាក្រក់ទាំងឡាយ បរវាសចៀសចេញឲ្យឆ្ងាយពីព្រះរាជាណាចក្រកម្ពុជា!»។

ទំព័រហ្វេសប៊ុករបស់លេខាធិការដ្ឋានគណៈសង្ឃនាយក បង្ហោះសារបួងសួងថា៖«សូមឲ្យប្រជាពុទ្ធបរិស័ទខ្មែរនិងសព្វសត្វទូទាំងប្រទេស មានតែសេចក្តីសុខនិងបានរួចផុតពីសេចក្តីទុក្ខទាំងឡាយទាំងពួង ជាពិសេសសូមចៀសឲ្យផុតពីជំងឺកូវីដ-១៩»។

បើតាមការចុះផ្សាយរបស់ Fresh News មកដល់ថ្ងៃទី១១ ខែធ្នូ ឆ្នាំ២០២០នេះ រដ្ឋាភិបាល ទទួលបានថវិកាជាង៤០លានដុល្លារហើយ ពីសប្បុរសជន សម្រាប់ទិញវ៉ាក់សាំងការពារជំងឺកូវីដ-១៩។

រដ្ឋាភិបាលកម្ពុជា មានគម្រោងទិញវ៉ាក់សាំង ចាក់ជូនប្រជាជនឲ្យបានប្រមាណ១០លាននាក់ឯណោះ ក្នុងចំណោមប្រជាជនខ្មែរទាំងអស់ជាង១៦លាននាក់។ ប៉ុន្តែ ជាជំហានដំបូង រដ្ឋាភិបាលកម្ពុជា ដាក់ផែនការទិញវ៉ាក់សាំងការពារជំងឺកូវីដ-១៩ ត្រឹម១លានដូសសិនប៉ុណ្ណោះ ដែលអាចចាក់ជូនប្រជាជនបានប្រមាណកន្លះលាននាក់។

ប្រមុខរដ្ឋាភិបាល ផ្តល់អាទិភាពដល់គ្រូពេទ្យ គ្រូបង្រៀន និង កងកម្លាំងប្រដាប់អាវុធ ដែលត្រូវបានវ៉ាក់សាំងការពារជំងឺកូវីដ-១៩មុនគេ ពេលកម្ពុជា នាំចូលវ៉ាក់សាំងនេះ។ ប្រមុខរដ្ឋាភិបាល យល់ថា ក្រុមមនុស្សទាំង៣ប្រភេទនេះ ប្រឈមនឹងហានិភ័យជាងគេក្នុងការឆ្លងជំងឺកូវីដ-១៩ ព្រោះពួកគេ ត្រូវជួបប្រជាជនច្រើនជាងគេ។

រដ្ឋាភិបាលកម្ពុជា មិនទាន់កំណត់ជាក់លាក់ថា នឹងទិញវ៉ាក់សាំងការពារជំងឺកូវីដ-១៩ នៅពេលណាឡើយ ហើយក៏មិនទាន់សម្រេចចិត្តដែរថា នឹងទិញពីប្រទេសណា៕